ഈ വർഷത്തിന്റെ രണ്ടാം പാദത്തിൽ വില്പനക്ക് ഒരുങ്ങുന്ന കുഷാഖ് 2020 ഫെബ്രുവരിയിൽ നടന്ന ഫോക്സ്‌വാഗൺ ഗ്രൂപ്പ് നൈറ്റിൽ സ്കോഡ അവതരിപ്പിച്ച വിഷൻ ഇൻ (Vision IN) കോൺസെപ്റ്റ് അടിസ്ഥാനപ്പെടുത്തി തയ്യാറാക്കിയതാണ്. സ്‌കോഡയുടെയും ഉടമയായ ഫോക്സ്‌വാഗൺ ഇന്ത്യയ്ക്കായി പ്രത്യേകം തയ്യാറാക്കിയ വിലക്കുറവുള്ള MQB A0-IN പ്ലാറ്റഫോമിൽ നിർമ്മിച്ച ആദ്യ വാഹനമാണ് കുഷാഖ്. പേരിൽ പോലും അല്പം ഇന്ത്യൻ ടച് വരുത്തിയിട്ടുണ്ട് സ്കോഡ. സംസ്കൃതത്തിലെ കുഷാക് എന്ന വാക്കാണ് ഈ പേരിന് ആധാരം. അർഥം രാജാവ്, ചക്രവർത്തി എന്നൊക്കെ. കോഡിയാക്ക്, കാമിക്ക്, കാറോക്ക് എന്നിങ്ങനെ സ്കോഡയുടെ അന്താരാഷ്ട്ര വിപണിയിലുള്ള എസ്‌യുവികളുമായി യോജിച്ചു പോകുന്നതാണ് കുഷാഖ്.
സ്കോഡ കുഷാഖ് - എക്സ്റ്റീരിയർ
സ്കോഡയുടെ ആഗോളനിരയിലെ കോംപാക്ട് എസ്‌യുവിയായ കാമിക്കുമായി ധാരാളം സാമ്യം പുലർത്തുന്ന വിധത്തിലാണ് വിഷൻ ഇൻ കോൺസെപ്റ്റ് ഒരുക്കിയത്. ഈ കോൺസെപ്റ്റിൽ നിന്നും കാര്യമായ മാറ്റങ്ങൾ ഇല്ലാതെയാണ് ലോഞ്ചിന് തയ്യാറായ കുഷാഖും ഒരുക്കിയിരിക്കുന്നത്. സ്കോഡ കാറുകളുടെ മുഖമുദ്രയായ ക്രോം ടച്ചുകളോടുകൂടിയ കൂടിയ ബട്ടർഫ്‌ളൈ ഗ്രിൽ, രണ്ടായി ഭാഗിച്ച പ്രോജക്റ്റർ ഹെഡ്‍ലാംപ്, സ്കിഡ് പ്ളേറ്റുകൾ ചേർന്ന സ്പോർട്ടി മുൻ,പിൻ ബമ്പറുകൾ, പ്ലാസ്റ്റിക് ക്ലാഡിങ്ങുകൾ എന്നിങ്ങനെ എസ്‌യുവി ഭാഷ്യം ഊട്ടിയുറപ്പിക്കുന്ന രീതിയിലാണ് സ്കോഡ കുഷാഖിനെ രൂപകല്പന ചെയ്തിരിക്കുന്നത്. 17-ഇഞ്ച് ഡ്യുവൽ-ടോൺ അലോയ് വീലുകൾ ഏറെ ശ്രദ്ധ നേടും എങ്കിലും അത് ഉയർന്ന വേരിയന്റിൽ മാത്രമാണ്. മറ്റുള്ള വേരിയന്റുകൾക്ക് 16 ഇഞ്ച് വീൽ ആണ്.
4,221 മില്ലീമീറ്റർ നീളവും 1,760 മില്ലീമീറ്റർ വീതിയും 1,612 മില്ലീമീറ്റർ ഉയരവുമാണ് സ്കോഡ കുഷാഖിന്റെ അളവുകൾ. സെഗ്മെന്റിലെ ഏറ്റവും ദൈർഘ്യമേറിയ 2,651 മില്ലിമീറ്ററാണ് വീൽബേസ്. 188 മില്ലീമീറ്റർ ഗ്രൗണ്ട് ക്ലിയറൻസുമുണ്ട്. കാൻഡി വൈറ്റ്, ബ്രില്യന്റ് സിൽവർ, കാർബൺ സ്റ്റീൽ, ഹണി ഓറഞ്ച്, ടൊർണാഡോ റെഡ് എന്നിങ്ങനെ 5 നിറങ്ങളിൽ സ്കോഡ കുഷാഖ് വില്പനക്കെത്തും.
മുഹൂർത്തം കുറിച്ചു! സിട്രോൺ സി5 എയർക്രോസ്സ് ഇന്ത്യ ലോഞ്ച് തിയതി പുറത്ത്
സ്കോഡ കുഷാഖ് - ഇന്റീരിയർ, ഫീച്ചറുകൾ
നേർത്ത ക്രോം ബാർ വേർതിരിക്കുന്ന ലേയേർഡ് ഡാഷ്‌ബോർഡ് ആണ് കുഷാഖിന്. ഫ്രീ-സ്റ്റാൻഡിംഗ് 10 ഇഞ്ച് ടച്ച്‌സ്‌ക്രീൻ ആണ് ഡാഷ്ബോർഡിൽ ആകർഷണം. ആപ്പിൾ കാർപ്ലേയ്, ആൻഡ്രോയിഡ് ഓട്ടോ, വയർലെസ്സ് മിറർലിങ്ക് കണക്ടിവിറ്റി എന്നിവ ഈ ഡിസ്‌പ്ലേയ്ക്കുണ്ട്. വെന്റിലേറ്റഡ് മുൻനിര സീറ്റുകൾ, പുറകിലേക്ക് എസി വെന്റുകൾ, എംഐഡി ഇൻസ്ട്രുമെന്റ് കൺസോൾ, ക്രൂയിസ് കൺട്രോൾ, ആംബിയന്റ് ലൈറ്റിംഗ്, സെവൻ സ്പീക്കർ മ്യൂസിക് സിസ്റ്റം, ടു-സ്‌പോക്ക് സ്റ്റിയറിംഗ് വീൽ, ഓട്ടോ-ഡിമ്മിംഗ് ഐ‌ആർ‌വി‌എമ്മുകൾ, സ്റ്റിയറിംഗ്- മൗണ്ടഡ് നിയന്ത്രണങ്ങൾ, വയർലെസ് ചാർജർ, മൈ സ്കോഡ കണക്റ്റ് എന്നിവ എന്നിവയാണ് പ്രധാന ഫീച്ചറുകൾ.
ആറ് എയർബാഗുകൾ, ഇ.എസ്.സി, ഹിൽ-ഹോൾഡ് കൺട്രോൾ, ടയർ പ്രഷർ മോണിറ്ററിംഗ്, ഐസോഫിക്സ് ചൈൽഡ് സീറ്റ് മൗണ്ടുകൾ, ഓട്ടോ ഹെഡ്‌ലാമ്പുകളും വൈപ്പറുകളും, മൾട്ടി-കൊളീഷൻ ബ്രേക്കിംഗ് സിസ്റ്റം എന്നിങ്ങനെ നിരവധി സുരക്ഷാ സവിശേഷതകളും സ്കോഡ കുഷാഖിൽ ഉൾപെടുത്തിയിട്ടുണ്ട്.
11 ലക്ഷം രൂപ കുറച്ച് 'മെയ്ഡ് ഇൻ ഇന്ത്യ' ജീപ്പ് റാൻഗ്ലർ വിപണിയിൽ
സ്കോഡ കുഷാഖ് - വേരിയന്റുകൾ, എൻജിൻ, ഗിയർബോക്‌സ്
ആക്റ്റീവ്, അംബീഷൻ, സ്റ്റൈൽ എന്നിങ്ങനെ മൂന്ന് പതിപ്പുകളിൽ ആണ് സ്കോഡ കുഷാഖ് വില്പനക്കെത്തുക. രണ്ട് ടർബോ പെട്രോൾ എൻജിൻ ഓപ്ഷനുകളാണ് കുഷാഖിന്. 113 ബിഎച്ച്പി പവർ നിർമ്മിക്കുന്ന 1.0 ലിറ്റർ, 3 സിലിണ്ടർ ടർബോ-പെട്രോൾ എൻജിൻ 6-സ്പീഡ് മാന്വൽ, ടോർക്ക് കൺവെർട്ടർ ഓട്ടോമാറ്റിക് എന്നിങ്ങനെ രണ്ട് ഗിയർബോക്‌സ് ഓപ്ഷനൊപ്പം ലഭിക്കും. 147 ബിഎച്ച്പി പവർ നിർമിക്കുന്ന, 1.5-ലിറ്റർ ടർബോ-പെട്രോൾ നാല് സിലിണ്ടർ എൻജിൻ 6-സ്പീഡ് മാന്വൽ, 7-സ്പീഡ് ഡിസിടി ഓട്ടോമാറ്റിക് ഗിയർബോക്‌സുകളിൽ ലഭിക്കും. പ്രാദേശിക ഘടകങ്ങൾ കൂടുതലായി ഉൾപെടുത്തിയിരിക്കുന്നതിനാൽ ഏകദേശം 10 ലക്ഷം മുതൽ 16 ലക്ഷം വരെയാവും സ്കോഡ കുഷാഖിന്റെ എക്‌സ്-ഷോറൂം വില എന്നാണ് കണക്കാക്കുന്നത്.