ടാറ്റ സഫാരി നിരയിലെ ഏറ്റവും പ്രീമിയം പതിപ്പായാണ് സഫാരി ഗോൾഡ് എഡിഷൻ അവതരിപ്പിച്ചിരിക്കുന്നത്. മാന്വൽ ഗിയർബോക്‌സുള്ള സഫാരി ഗോൾഡ് എഡിഷൻ പതിപ്പിന് 21.89 ലക്ഷം രൂപയും, ഓട്ടോമാറ്റിക് പതിപ്പിന് 23.18 ലക്ഷവുമാണ് എക്‌സ്-ഷോറൂം വില. കഴിഞ്ഞ ദിവസം ദുബായിൽ ആരംഭിച്ച ഈ വർഷത്തെ ഇന്ത്യൻ പ്രീമിയർ ലീഗിന്റെ രണ്ടാം പദത്തിന്റെ ആദ്യ മത്സരത്തിലാണ് സഫാരി ഗോൾഡ് എഡിഷൻ മുഖം കാണിച്ചത്.
രണ്ട് സ്പെഷ്യൽ നിറങ്ങൾ, ക്രോം കടക്ക് പുറത്ത്
നിരവധി എക്സ്റ്റീരിയർ, ഇന്റീരിയർ ഡീറ്റൈലിങ്ങുകൾ ചേർത്ത്‌ പ്രീമിയം ലുക്കിലാണ് ടാറ്റ മോട്ടോർസ് സഫാരി ഗോൾഡ് എഡിഷൻ അവതരിപ്പിച്ചിരിക്കുന്നത്. ഇതിൽ പ്രധാനം എക്സ്റ്റീരിയർ നിറങ്ങളാണ്. വൈറ്റ് ഗോൾഡ്, ബ്ലാക്ക് ഗോൾഡ് എന്നിങ്ങനെ രണ്ട് നിറങ്ങളിൽ മാത്രമാണ് സഫാരി ഗോൾഡ് എഡിഷൻ വാങ്ങാനാവുക. ഫ്രോസ്റ്റ് വൈറ്റ് ബോഡി നിറവും ഒപ്പം കറുപ്പ് നിറത്തിലുള്ള റൂഫും ചേർന്നതാണ് വൈറ്റ് ഗോൾഡ്. അതെ സമയം കാപ്പിക്കുരുക്കിന്റെ നിറത്തോട് സാദൃശ്യമുള്ളതാണ് ബ്ലാക്ക് ഗോൾഡ് നിറം.
ഇതുകൂടാതെ പുത്തൻ സഫാരിയുടെ എക്‌സ്റ്റീരിയറിലെ എല്ലാ ക്രോം ഘടകങ്ങളും ഗോൾഡ് എഡിഷൻ പതിപ്പിൽ സ്വർണ നിറത്തിലാണ്. ഗ്രില്ലിലെ ട്രൈ-ആരോ പാറ്റേൺ, ഹെഡ്ലാംപ് ഗാർണിഷ്, ഡോർ ഹാൻഡിലുകൾ, ബാഡ്ജിങ്ങുകൾ എന്നിവയെക്കാൾ സ്വർണ നിറത്തിലാണ്. റൂഫ് റെയിലിലും ഈ സ്വർണ നിറത്തിന്റെ ടച്ചുണ്ട്.
2021 ടാറ്റ സഫാരി അഡ്വഞ്ചർ പെർസോണാ; എന്താണ് സ്പെഷ്യൽ എഡിഷന്റെ പ്രത്യേകത?
ഇന്റീരിയറും സ്പെഷ്യൽ, കൂടുതൽ ഫീച്ചർ
ഓയിസ്റ്റർ വൈറ്റ് ഇന്റീരിയർ തീം തന്നെയാണ് ഗോൾഡ് എഡിഷൻ മോഡലിന്റെ ഇന്റീരിയറിന്. അതെ സമയം വൈറ്റ് ഗോൾഡ് നിറത്തിന്റെ ഡാഷ്ബോർഡിന് വെള്ള നിറത്തിലുള്ള മാർബിൾ ഫിനിഷും അതിന്‌ താഴെയായി സ്വർണ നിറത്തിലുള്ള ഒരു ലൈനിംഗും നൽകിയിട്ടുണ്ട്. ബ്ലാക്ക് ഗോൾഡ് നിറത്തിൽ കറുപ്പ് നിറത്തിന്റെ മാർബിൾ ഫിനിഷ് ആണ്. അതെ സമയം താഴെയുള്ള ലൈനിങ് ഈ പതിപ്പിൽ കറുപ്പ് നിറത്തിലാണ്. ഇത് കൂടാതെ ബാഡ്ജുകൾ, എസി വെന്റുകൾ, ഇൻസ്ട്രുമെന്റ് ക്ലസ്റ്റർ, ഡോർ ഹാൻഡിലുകൾ എന്നിവിടങ്ങളിലും സ്വർണ നിറം പൂശിയിട്ടുണ്ട്.
കൂടുതൽ ഫീച്ചറുകളും ഗോൾഡ് എഡിഷനിൽ ടാറ്റ മോട്ടോർസ് ചേർത്തിട്ടുണ്ട്. ഒന്നും രണ്ടും നിരകളിൽ വെന്റിലേഷൻ ഉള്ള ഡയമണ്ട് ക്വിൽറ്റഡ് ലെതർ സീറ്റുകൾ, വയർലെസ് ചാർജർ, എയർ പ്യൂരിഫയർ, വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ കണക്റ്റിവിറ്റി എന്നിവയാണ് പുതിയ ഫീച്ചറുകൾ.
ഇന്ത്യയിൽ സഡൻബ്രേയ്‌ക്ക് ചവിട്ടി ഫോർഡ്, പക്ഷെ ഈ 3 പുതിയ കാറുകൾ അവതരിപ്പിക്കും
എൻജിൻ, ഗിയർബോക്‌സ്
ഹാരിയറിനെ ചലിപ്പിക്കുന്ന 2.0-ലിറ്റർ ക്രയോടെക്‌ ഡീസൽ എൻജിൻ തന്നെയാണ് ടാറ്റ സഫാരി ഗോൾഡ് എഡിഷനും. ഭാരത് സ്റ്റേജ് 6 (BS6) മലിനീകരണ നിയന്ത്രണ മാനദണ്ഡങ്ങൾ പാലിക്കും വിധം പരിഷ്കരിച്ച ഈ എൻജിൻ 170 എച്ച്പി പവറും നിർമ്മിക്കും. 6-സ്പീഡ് മാന്വൽ, 6-സ്പീഡ് ഓട്ടോമാറ്റിക് എന്നിവയാണ് ഗിയർബോക്‌സ് ഓപ്ഷനുകൾ. മഹിന്ദ്ര എക്സ്‌യുവി700, എംജി ഹെക്ടർ പ്ലസ്, ഹ്യുണ്ടേയ് അൽകസാർ എന്നിവയാണ് സഫാരിയുടെ എതിരാളികൾ.