നിസ്സാൻ/ ഡാറ്റ്സൺ
ജാപ്പനീസ് കാർ നിർമ്മാതാക്കളായ നിസ്സാനും സബ്-ബ്രാൻഡ് ഡാറ്റ്സണും ഇത്തവണ ഓട്ടോ എക്സ്പോയ്ക്കില്ല. എന്താണ് കാരണം എന്ന് നിസ്സാൻ വ്യക്തമാക്കിയിട്ടില്ല എങ്കിലും ആഗോള വിപണിയിലെ വില്പനയിടിവും അത് വഴിയുള്ള സാമ്പത്തിക പ്രശ്നങ്ങളും ആവണം നിസ്സാന്റെ ഈ തീരുമാനത്തിന് പിന്നിൽ. മാത്രമല്ല നിസ്സാന്റെ മുൻ സിഇഒ കാർലോസ് ഖോസന്റെ അറസ്റ്റുമായി ബന്ധപ്പെട്ടുണ്ടായ പ്രശ്നങ്ങളും തത്കാലത്തേക്ക് അധികചിലവുള്ള ഓട്ടോ എക്സ്പോയിൽ നിന്ന് മാറി നിൽക്കാൻ നിസ്സാൻ പ്രേരിപ്പിച്ചിട്ടുണ്ട് എന്നാണ് അണിയറ സംസാരം. ഡാറ്റ്സൺ ബ്രാൻഡിനെ സംബന്ധിച്ചിടത്തോളം, നിസാൻ ഗ്രൂപ്പിന്റെ സാമ്പത്തിക സ്ഥിതി മെച്ചപ്പെടുത്തുന്നതിനായി ഈ ബഡ്ജറ്റ് ബ്രാൻഡിന്റെ പ്രവർത്തനം തന്നെ അവസാനിപ്പിക്കാൻ നിസ്സാൻ പദ്ധതിയിടുന്നുണ്ടത്രേ.
ഫോർഡ്
2020 ഓട്ടോ എക്സ്പോയിൽ പങ്കെടുക്കുന്നില്ല എന്നുള്ള അമേരിക്കൻ വാഹന നിർമ്മാതാക്കളായ ഫോർഡിന്റെ തീരുമാനം രണ്ട് കാരണങ്ങൾ കൊണ്ട് അത്ഭുതം ഉളവാക്കുന്നതല്ല. ഇന്ത്യൻ വിപണിയെ സംബന്ധിച്ച് പ്രാധാന്യമുള്ള ഒരു പുത്തൻ വാഹനവും അവതരിപ്പിക്കാൻ തയ്യാറായിട്ടില്ല എന്നുള്ളതാണ് ആദ്യത്തെ കാര്യം. മാത്രമല്ല ഘടനാപരമായി ചില മാറ്റങ്ങളിലൂടെ കടന്നു പോകുകയാണ് ഫോർഡ് ഇന്ത്യ. ഫോർഡ് ഇന്ത്യയുടെ 51 ശതമാനം ഓഹരി ഈയടുത്താണ് മഹിന്ദ്ര & മഹിന്ദ്ര വാങ്ങിയത്. ഈ സാഹചര്യത്തിൽ ഫോർഡിന്റെ അഭാവം സ്വാഭാവികം മാത്രം. അതെ സമയം 2022-ലെ ഓട്ടോ എക്സ്പോയിൽ മഹിന്ദ്ര-ഫോർഡ് കൂട്ടുകെട്ടിലെ ആദ്യ എസ്യുവി ആവും താരം.
ഹോണ്ട കാർസ്
കഴിഞ്ഞ വർഷത്തിന്റെ അവസാന പാദത്തിൽ ആഗോള വിപണിയിൽ പുത്തൻ ജാസ് ഹാച്ച്ബാക്കിനെയും അടുത്ത തലമുറ സിറ്റി സെഡാനെയും ഹോണ്ട അവതരിപ്പിച്ചു. ഈ രണ്ട് മോഡലുകളും ഇന്ത്യയെ സംബന്ധിച്ച് പ്രാധാന്യമുള്ളതും ഈ വർഷം ലോഞ്ച് ചെയ്യും എന്ന് കരുതുന്നവയുമാണ്. അതുകൊണ്ടുതന്നെ ഇത്തവണ ഓട്ടോ എക്സ്പോയിൽ ഹോണ്ടയുടെ സാന്നിദ്ധ്യം പ്രതീക്ഷിച്ചിരുന്നു. എന്നാൽ 2020 ഓട്ടോ എക്സ്പോയിൽ ഹോണ്ട കാർസ് ഇന്ത്യ പങ്കെടുക്കുന്നില്ല. കഴിഞ്ഞ വർഷം മുതൽ അനുഭവപ്പെടുന്ന വില്പനമാന്ദ്യം നടുവൊടിച്ച ഒരു വാഹന നിർമ്മാതാവാണ് ഹോണ്ട. ഒരു പക്ഷെ ഇതാവാം അധിക ചിലവുള്ള മേളയിൽ നിന്ന് മാറി നിൽക്കാൻ ഹോണ്ട കാർസ് ഇന്ത്യയെ പ്രേരിപ്പിച്ചത്.
ടൊയോട്ട
വില്പനമാന്ദ്യം കാര്യമായായി ബുദ്ധിമുട്ടിച്ച അല്ലെങ്കിൽ ഇപ്പോഴും ബുദ്ധിമുട്ടിച്ചു കൊണ്ടേയിരിക്കുന്ന ഒരു വാഹന നിർമ്മാതാവാണ് ടൊയോട്ട. ഇക്കഴിഞ്ഞ മാസത്തെ വില്പനകണക്കിൽ പോലും ജനുവരി 2019-മായി താരതമ്യം ചെയ്യുമ്പോൾ 41 ശതമാനത്തിന്റെ വില്പനയിടിവാണ് ടൊയോട്ട രേഖപ്പെടുത്തിയത്. വാഹന വിൽപ്പനയിലെ ഈ തിരിച്ചടി തന്നെയാവണം 2020 ഓട്ടോ എക്സ്പോയിൽ പങ്കെടുക്കാതിരിക്കാൻ ടൊയോട്ടയെ നിർബന്ധിച്ചത്. പുത്തൻ യാരിസ്, കൊറോള ഹൈബ്രിഡ്, വെൽഫയർ, റെയ്സ് എന്നീ വാഹനങ്ങൾ അടുത്ത് കാണാൻ കാത്തിരുന്ന ടൊയോട്ട ആരാധകർക്ക് നിരാശ മാത്രം ബാക്കി.
ജീപ്പ്
വിറ്റാര ബ്രെസയോടും, നെക്സോണിനോടും, വെന്യുവിനോടും മത്സരിക്കുന്ന ഇന്ത്യ-സ്പെക് റെനെഗേഡ് കോംപാക്ട് എസ്യുവി, ഫോർച്യൂണറിനോടും, എൻഡവറിനോടും മത്സരിക്കുന്ന 7-സീറ്റർ ഫുൾ സൈസ് എസ്യുവി പോരാത്തതിന് കോമ്പസ്സിന്റെ മുഖം മിനുക്കിയ അവതാരം, ഇത്രയും പ്രതീക്ഷിച്ചിരുന്ന ജീപ്പ് ആരാധർക്ക് നിരാശ മാത്രം നൽകിയാണ് അമേരിക്കൻ എസ്യുവി നിർമ്മാതാക്കൾ 2020 ഓട്ടോ എക്സ്പോയിൽ പങ്കെടുക്കുന്നില്ല എന്ന് തീരുമാനിച്ചത്. ജീപ്പിന്റെ പിൻവാങ്ങലിലും പ്രധാന വില്ലൻ വില്പനമാന്ദ്യം തന്നെ എന്ന് വേണം കണക്കാക്കാൻ. കൂടാതെ എംജി ഹെക്ടർ, ടാറ്റ ഹരിയർ എസ്യുവികളുടെ വരവോടെ കോമ്പസ്സിന്റെ വില്പനയിൽ കുറവ് വന്നിരുന്നു.
Also read: ഈ 15 കാറുകളാണ് ഇത്തവണ ഓട്ടോ എക്സ്പോയിലെ താരങ്ങൾ!
വോൾവോ
ബിഎസ് 6 മലിനീകരണ നിയന്ത്രണ മാനദണ്ഡങ്ങൾക്കനുസരിച്ച് തങ്ങളുടെ വാഹനങ്ങൾ പരിഷ്കരിക്കുന്നതിന്റെ തിരക്കിലാണ് സ്വീഡിഷ് വാഹന നിർമ്മാതാക്കളായ വോൾവോ. ഇതാണ് ഇത്തവണ ഓട്ടോ എക്സ്പോയിൽ നിന്ന് മാറി നില്ക്കാൻ വോൾവോയെ പ്രേരിപ്പിച്ചത്. ഇത് പക്ഷെ ഒരു അവസരം പാഴാക്കി കളയലായി എന്ന് വേണം കരുതാൻ. ഇലക്ട്രിക്ക് വാഹനങ്ങൾ ധാരാളമായി പുറത്തിറക്കാൻ തയ്യാറെടുക്കുന്ന വോൾവോയ്ക്ക് XC40 ഇലക്ട്രിക്കിനെ ഇന്ത്യൻ വിപണിക്ക് പരിചയപ്പെടുത്താൻ പറ്റിയ വേദിയായിരുന്നു 2020 ഓട്ടോ എക്സ്പോ. ഇനി 2022 ഓട്ടോ എക്സ്പോയിൽ പൂർണമായും ഇലക്ട്രിക് വാഹനങ്ങൾ നിർമാണ വോൾവോ പവലിയൻ പ്രതീക്ഷിക്കാം.
ഓഡി
ജനുവരിയിൽ പുറത്തിറങ്ങിയ Q8 എസ്യുവി കൂടാതെ പുതുപുത്തൻ A8 ലക്ഷുറി സെഡാൻ, പുതിയ A6, പുത്തൻ Q3, മാത്രമല്ല ബ്രാൻഡിന്റെ ആദ്യ ഇലക്ട്രിക് എസ്യുവി ഇ-ട്രോൺ എന്നിങ്ങനെ ഒരു പിടി മോഡലുകൾ ജർമൻ ആഡംബര കാർ നിർമ്മാതാക്കളായ ഓഡി ഈ വർഷം ഇന്ത്യയിൽ അവതരിപ്പിക്കാൻ തയ്യാറാക്കിയിട്ടുണ്ട്. അത് കൊണ്ടുതന്നെ ഔഡിയുടെ സാന്നിദ്ധ്യം ഇത്തവണ ഓട്ടോ എക്സ്പോയിൽ തീർച്ചയായും പ്രതീക്ഷിച്ചിരുന്നു. പക്ഷെ ഓഡി ഇക്കുറി ഓട്ടോ എക്സ്പോയ്ക്കില്ല. എന്തുകൊണ്ട് ഓഡി വിട്ടു നില്കുന്നു എന്നുള്ള ചോദ്യത്തിന് വ്യക്തമായ മറുപടികളില്ല.
Also read: ഇവരാണ് ഇന്ത്യയിലെ പ്രശസ്തരായ ടെസ്ല കാർ ഉടമകൾ
ബിഎംഡബ്ള്യു
ബിഎംഡബ്ള്യു ബ്രാൻഡിന്റെ കാറുകളും, ബിഎംഡബ്ള്യു മോട്ടറാഡ് ഡിവിഷന്റെ കീഴിൽ ആഡംബര ബൈക്കുകളും നിറഞ്ഞ വലിപ്പമേറിയ പവലിയൻ ആയിരുന്നു കഴിഞ്ഞ തവണ ഓട്ടോ എക്സ്പോയ്ക്ക്. പക്ഷെ ഇത്തവണത്തെ ഓട്ടോ എക്സ്പോയ്ക്ക് ബിഎംഡബ്ള്യു 'കട്ട്' അടിച്ചു. 2 സീരീസ് ഗ്രാൻഡ് കൂപെ, വമ്പൻ കിഡ്നി ഗ്രില്ലുമായി ശ്രദ്ധനേടിയ കോൺസെപ്റ് 4, കറുപ്പ് നിറത്തിന്റെ റേഞ്ച് എന്താണെന്ന് മനസ്സിലാക്കി തന്ന കഴിഞ്ഞ വർഷം വൈറൽ ആയ എക്സ്6 വാന്റാ ബ്ലാക്ക് എന്നീ കിടിലൻ കാറുകൾ പ്രതീക്ഷിച്ചിരുന്ന ബിഎംഡബ്ള്യു ആരാധകർ നിരാശപ്പെട്ടെ മതിയാകൂ.
ജാഗ്വർ / ലാൻഡ് റോവർ
ടാറ്റ മോട്ടോർസ് ഓട്ടോ എക്സ്പോയിൽ നിറസാന്നിദ്ധ്യമായി ഇക്കുറിയുമുണ്ടെങ്കിലും അവരുടെ ബ്രിട്ടീഷ് ആഡംബര വാഹന ബ്രാൻഡുകളായ ജാഗ്വറും ലാൻഡ് റോവറും 2020 ഓട്ടോ എക്സ്പോയ്ക്കില്ല. കാരണം വ്യക്തമാണ്. 2008-ൽ ടാറ്റ മോട്ടോഴ്സിന്റെ കരങ്ങളിലെത്തിയതിൽ പിന്നെ ടോപ് ഗിയറിലായിരുന്ന ജാഗ്വർ ലാൻഡ് റോവറിന്റെ വില്പന കഴിഞ്ഞ വർഷം ഇടിഞ്ഞിരുന്നു. ഇതായിരിക്കിക്കണം ഓട്ടോ എക്സ്പോയിൽ നിന്ന് മാറി നിൽക്കാൻ ജാഗ്വർ ലാൻഡ് റോവറിനെ പ്രേരിപ്പിച്ചത്. എങ്കിലും പുതു പുത്തൻ ഡിഫൻഡർ, ഇലക്ട്രിക്ക് എസ്യുവി ഐ-പെയ്സ് എന്നിവ ഈ വർഷം തന്നെ ഈ ബ്രിട്ടീഷ് ബ്രാൻഡുകളിൽ നിന്ന് ഇന്ത്യൻ വിപണിയിലെത്തും എന്നുള്ളതാണ് വാഹന പ്രേമികളെ സംബന്ധിച്ച് ആശ്വാസകരമായ വാർത്ത.
Also read: ലോകത്തിലെ ഏറ്റവും വിലപിടിപ്പുള്ള 10 കാറുകൾ
ലെക്സസ്
ജനുവരി 31-നാണ് ജാപ്പനീസ് വാഹന നിർമ്മാതാക്കളായ ടൊയോട്ടയുടെ ആഡംബര വാഹന ഡിവിഷൻ ലെക്സസ് LC 500h എന്ന ലക്ഷുറി ഗ്രാൻഡ് ട്യൂറർ മോഡലിനെ ഇന്ത്യയിലവതരിപ്പിച്ചത്. ഈ വർഷം ഇനി ലെക്സസിന് ഇന്ത്യയിൽ കാര്യമായ ലോഞ്ചുകൾ ഒന്നും തന്നെയില്ല. ഇതാവണം ലെക്സസ് ഓട്ടോ എക്സ്പോയിൽ നിന്ന് മാറി നിൽക്കാൻ കാരണം. ഇക്കഴിഞ്ഞ ടോക്കിയോ മോട്ടോർ ഷോയിൽ ധാരാളം ഇലക്ട്രിക്ക് മോഡലുകൾ ലെക്സസ് അവതരിപ്പിച്ചിരുന്നു. ഈ മോഡലുകളിൽ ചിലതെങ്കിലും ഇന്ത്യൻ ഉപഭോക്താക്കൾക്ക് പരിചയപ്പെടുത്താൻ കിട്ടിയ സുവർണാവസരമാണ് ഓട്ടോ എക്സ്പോയിൽ പങ്കെടുക്കാതെ ലെക്സസ് തുലച്ചത്.