ഇന്ത്യയ്ക്കായി പ്രത്യേകം തയ്യാറാക്കിയ കോംപാക്ട് എസ്‌യുവി ടൈഗൺ, മിഡ് സൈസ് എസ്‌യുവി ടി-റോക്ക്, 7-സീറ്റർ എസ്‌യുവി ടിഗ്വാൻ ഓൾസ്പേസ്, ഇലക്ട്രിക്ക് എസ്‌യുവി കോൺസെപ്റ്റ് ഐഡി.ക്രോസ് എന്നിങ്ങനെ എണ്ണം പറഞ്ഞ നാല് എസ്‌യുവികൾ ആയിരുന്നു ജർമൻ കാർ നിർമ്മാതാക്കളായ ഫോക്സ്‌വാഗൺ ഇത്തവണ ഓട്ടോ എക്‌സ്‌പോയിൽ അവതരിപ്പിച്ചത്. ഇതിൽ ടിഗ്വാൻ ഓൾസ്പേസ് ഈ മാസത്തിന്റെ തുടക്കത്തിൽ ലോഞ്ച് ചെയ്ത ഫോക്സ്‌വാഗൺ, ബുധനാഴ്ച (മാർച്ച് 18) രണ്ടാമത് മോഡൽ ടി-റോക്കിനെ ലോഞ്ച് ചെയ്യും. യുവാക്കളെ ലക്‌ഷ്യം വച്ച് പുറത്തിറക്കുന്ന ടി-റോക്കിനായി ഇപ്പോൾ തന്നെ 300-ൽ അധികം ബുക്കിംഗ് ഫോക്സ്‌വാഗണ് ലഭിച്ചിട്ടുണ്ട് എന്നാണ് വിവരം. ടി-റോക്ക് വാങ്ങാൻ നിങ്ങൾക്കും പ്ലാനുണ്ടോ? എങ്കിൽ ലോഞ്ചിന് മുൻപായി ഈ 7 കാര്യങ്ങൾ മനസ്സിലാക്കുക.
1. ഒരു സ്‌പോർട്ടി ക്രോസ്സ്ഓവർ എസ്‌യുവിയാണ് ടി-റോക്ക്. 2500 കാറുകൾ ഒരു വാഹന നിർമാതാവിന് ഇന്ത്യൻ ഹോമോളോഗേഷൻ നിയമങ്ങൾക്ക് വിധേയമാകാതെ വില്പനക്കെത്തിക്കാം എന്ന പുതിയ നിയമത്തിന്റെ ചുവട് പിടിച്ചാണ് ടി-റോക്കിന്റെ വരവ്.
2. ക്രോം ലൈനുകളുള്ള ഗ്രിൽ, ഡേടൈം റണ്ണിങ് ലാമ്പുകൾ ചേർന്ന ഫുൾ എൽഇഡി ഡ്യുവല്‍ ബീം ഹെഡ്‍ലാംപ്, വലിയ എയര്‍ ഡാം, ഡ്യുവൽ ടോൺ അലോയ് വീൽ, പ്ലാസ്റ്റിക് ക്ലാഡിങ്ങുകൾ, വലിപ്പം കൂടിയ വീൽ ആർച്ചുകൾ എന്നിവയാണ് ടി-റോക്കിന്റെ എക്സ്റ്റീരിയർ ആകർഷണങ്ങൾ.
3. ഡിജിറ്റൽ ഇൻസ്ട്രുമെന്റ് ക്ലസ്റ്റർ, ഡ്യുവൽ സോൺ ഓട്ടോമാറ്റിക് ക്ലൈമറ്റ് കൺട്രോൾ, 8.0 ഇഞ്ച് ടച്ച്‌സ്‌ക്രീൻ, പനോരമിക് സൺറൂഫ്, 'വിയന്ന' ലെതർ സീറ്റുകൾ എന്നിവയാണ് ഇന്റീരിയറിലെ ഫീച്ചറുകൾ. സുരക്ഷയ്ക്കായി ആറ് എയർബാഗുകൾ, ഇബിഡിയോട് കൂടിയ എബിഎസ്, ഇലക്ട്രോണിക് സ്റ്റെബിലിറ്റി കൺട്രോൾ, ടയർ പ്രഷർ മോണിറ്ററിംഗ് സിസ്റ്റം, പാർക്കിംഗ് ക്യാമറ എന്നിവയും ടി-റോക്കിലുണ്ടാവും.
Also read: സേഫ്റ്റി ഫസ്റ്റാണോ? ഏറ്റവും സുരക്ഷിതമായ 7 ഇന്ത്യൻ കാറുകൾ
4. 150 എച്ച്പി പവറും 340 എൻഎം ടോർക്കും ഉത്പാദിപ്പിക്കുന്ന 1.5 ലിറ്റർ നാല് സിലിണ്ടര്‍ ടര്‍ബോചാര്‍ജ്ഡ് ടിഎസ്‌ഐ പെട്രോള്‍ എൻജിൻ ആയിരിക്കും ടി-റോക്കിന്റെ ഹൃദയം. 7 സ്പീഡ് ഡ്യുവൽ ക്ലച്ച് ഓട്ടോമാറ്റിക് ആയിരിക്കും ഗിയർ ബോക്‌സ്. ഡീസൽ എൻജിനിൽ ടി-റോക്ക് ലഭിക്കില്ല.
5. 4229 എംഎം ആണ് ടി-റോക്കിൻ്റെ നീളം. 2595 മില്ലിമീറ്റർ ആണ് വീൽബേസ്. ഫോക്സ്വാഗന്റെ ടിഗ്വാനേക്കാളും ടിഗ്വാൻ ഓൾസ്‌പെയ്‌സിനേക്കാളും ചെറുതാണ് ടി-റോക്ക്. വീൽബേസും ടിഗ്വാൻ ഓൾസ്‌പെയ്‌സിനേക്കാൾ 200 മില്ലിമീറ്ററോളം കുറവാണ്.
6. കുർക്കുമ യെല്ലോ, പ്യുവർ വൈറ്റ്, റെവെന്ന ബ്ലൂ, എനർജി ഓറഞ്ച്, ഇൻഡിയം ഗ്രേ എന്നീ അഞ്ച് ഡ്യുവൽ ടോൺ നിറങ്ങൾ ആവും ടി-റോക്ക് വില്പനക്കെത്തുക. ഈ കളറുകൾക്ക് കറുപ്പ് നിറത്തിലുള്ള റൂഫ് ആയിരിക്കും. അതെ സമയം ഡീപ് ബ്ലാക്ക് പേൾ മാത്രമായിരിക്കും ഏക സിംഗിൾ ടോൺ നിറം.
7. എല്ലാ ഫീച്ചറുകളും ചേർന്ന ഒറ്റ വേരിയന്റിലാവും ടി-റോക്ക് വില്പനക്കെത്തിക്കുക. പൂർണമായും വിദേശത്ത് നിർമിച്ചു ഇന്ത്യയിൽ ഇറക്കുമതി ചെയ്യുന്ന രീതി അവലംബിച്ചാണ് ടി-റോക്ക് ഇന്ത്യൻ വിപണിയിലെത്തുന്നത്. അത് കൊണ്ടുതന്നെ വിലയും അല്പം കൂടുതലാവും. ഏകദേശം 20 ലക്ഷം രൂപയാണ് (എക്സ്-ഷോറൂം) ടി-റോക്കിന് വില പ്രതീക്ഷിക്കുന്നത്.