വാഹന ഉടമസ്ഥാവകാശ കൈമാറ്റം; പ്രസക്തമായ ചില സംശയങ്ങളും ഉത്തരങ്ങളും

കഴിഞ്ഞ ദിവസം ആണ് കേരള മോട്ടോർ വാഹന വകുപ്പ് വാഹനങ്ങളുടെ ഉടമസ്ഥാവകാശം മാറ്റാനുള്ള നടപടി ക്രമങ്ങൾ ലഘൂകരിച്ചതിനെപ്പറ്റി ഫേസ്ബുക്കിൽ പോസ്റ്റ് ചെയ്തത്. വാഹനം വിൽക്കുന്ന വ്യക്തിയുടെയും വാങ്ങുന്നയാളുടെയും സ്ഥലങ്ങളിലെ ആർടിഓ ഓഫീസുകളിൽ കയറി ഇറങ്ങി ഇനി സമയം നഷ്ടപ്പെടില്ല എന്നതാണ് ഓൺലൈൻ ആയി ഒരുക്കിയ ഈ പുത്തൻ സംവിധാനത്തിന്റെ പ്രത്യേകത. അതെ സമയം ഈ പോസ്റ്റിനൊപ്പം ഇതുമായി ബന്ധപ്പെട്ട് നിരവധി സംശയങ്ങൾ വാഹന ഉടമകൾ ഉന്നയിച്ചിരുന്നു. പ്രസക്തമായ ചില ചോദ്യങ്ങളക്ക് ഉത്തരവുമായി കേരളം മോട്ടോർ വാഹന വകുപ്പ് തന്നെ മുന്നോട്ട് വന്നു. ഈ ചോദ്യങ്ങളും ഉത്തരങ്ങളും തുടർന്ന് വായിക്കാം;

☛ ഏത് വെബ് വിലാസത്തിലാണ് അപേക്ഷിക്കേണ്ടത്?
www.parivahan.gov.in

☛ ഓൺലൈനായി ഇത്തരം അപേക്ഷകൾ കൈകാര്യം ചെയ്ത് പരിചയം ഇല്ല. എന്ത് ചെയ്യാം?
താങ്കൾക്ക് അടുത്തുള്ള അക്ഷയ കേന്ദ്രം വഴിയോ അല്ലെങ്കിൽ ഇൻറർനെറ്റ്‌ സൗകര്യമുള്ള കമ്പ്യൂട്ടറിൽ നിന്നോ മൊബൈലിൽ നിന്നോ സ്വയമോ മറ്റാരുടെയെങ്കിലും സഹായത്താലോ അപേക്ഷ സമർമിപ്പിക്കാം.

☛ ആരാണ് അപേക്ഷിക്കേണ്ടത്?
വാഹനം വാങ്ങുന്ന വ്യക്തിയും വാഹനം വിൽക്കുന്ന വ്യക്തിയും സംയുക്തമായാണ് അപേക്ഷിക്കേണ്ടത്.

☛ എങ്ങനെയാണ് അപേക്ഷിക്കേണ്ടത്?
വിൽക്കുന്ന വ്യക്തിയുടെ രജിസ്റ്റർ ചെയ്ത മൊബൈൽ നമ്പറിൽ വരുന്ന OTP നമ്പർ രേഖപ്പെടുത്തിയാണ് അപേക്ഷാ സമർപ്പണം ആരംഭിക്കുന്നത്.

☛ വാങ്ങുന്ന ആളുടെ മൊബൈൽ നമ്പർ ആവശ്യമുണ്ടോ?
വാങ്ങുന്ന ആളുടെ മേൽവിലാസവും മൊബൈൽ നമ്പറും രേഖപ്പെടുത്തണം. മേൽവിലാസം തെളിയിക്കുന്ന രേഖ നിർബന്ധമാണ്. ആ മേൽവിലാസം ആണ് അപേക്ഷയിൽ രേഖപ്പെടുത്തേണ്ടത്.

പുസ്തക രൂപത്തിലുള്ള ഡ്രൈവിംഗ് ലൈസൻസ് എങ്ങിനെ കാർഡാക്കി മാറ്റം?

☛ എന്തൊക്കെയാണ് മേൽവിലാസം തെളിയിക്കുന്ന രേഖകൾ?
ആധാർ കാർഡ്, പാസ്പോർട്ട്, ഇലക്ടറൽ റോൾ തുടങ്ങിയവ (മോട്ടോർ വാഹന ചട്ടത്തിൽ പ്രതിപാദിച്ചിട്ടുള്ളവ മാത്രം)

☛ വാങ്ങുന്ന ആളുടെ മൊബൈലിൽ വരുന്ന OTP രേഖപ്പെടുത്തേണ്ടതുണ്ടോ?
തീർച്ചയായും, ആ OTP രേഖപ്പെടുത്തിയാൽ മാത്രമേ അപേക്ഷാ സമർപ്പണം പൂർത്തിയാവുകയുള്ളൂ.

☛ ഏത് ഓഫീസിലാണ് അപേക്ഷ സമർപ്പിക്കേണ്ടത്?
വാങ്ങുന്നയാളുടെയോ വിൽക്കുന്നയാളുടെയോ സ്ഥിര താമസസ്ഥലത്തുള്ള ഓഫീസിൽ സമർപ്പിക്കാം.

☛ എത്രയാണ് ഫീസ് ?
ഇരുചക്രവാഹനങ്ങൾ - Rs 150, ലൈറ്റ് മോട്ടോർ വെഹിക്കിൾ (പ്രൈവറ്റ്) - Rs 300, ലൈറ്റ് മോട്ടോർ വെഹിക്കിൾ (ട്രാൻസ്പോർട്ട്) & മീഡിയം - Rs 500, ഹെവി വാഹനങ്ങൾ - Rs 750.

☛ ഇറക്കുമതി ചെയ്ത വാഹനങ്ങളുടെ ഫീസ് എങ്ങനെയാണ്?
ഇരുചക്ര വാഹനങ്ങൾ - Rs 1250, മറ്റുള്ള വാഹനങ്ങൾ - Rs 2500.

ലോക്ക്ഡൗണിന് ശേഷം യാത്ര ചെയ്യുമ്പോൾ ശ്രദ്ധിക്കേണ്ട കാര്യങ്ങൾ

☛ ഇതിലൊന്നും ഉൾപ്പെടാത്ത മറ്റ് വണ്ടികളുടെ (JCB പോലുള്ളവ ) ഫീസ് എത്രയാണ്?
Rs 1500.

☛ ഫീസ് കൂടാതെ മറ്റെന്തെങ്കിലും ചാർജുകളുണ്ടോ?
ഉണ്ട്, സർവ്വീസ് ചാർജ്. ഇരുചക്രവാഹനങ്ങൾ - Rs 35, ലൈറ്റ് - Rs 60, മീഡിയം - Rs 110, ഹെവി - Rs 170.

☛ ഫീസും സർവ്വീസ് ചാർജും എങ്ങനെ അടക്കും?
അപേക്ഷ സമർപ്പിക്കുമ്പോൾ തന്നെ ഓൺലൈനായി ഫീസ് അടക്കാം. ATM കാർഡോ/ ഇൻ്റർനെറ്റ് ബാങ്കിങ്ങോ ഉപയോഗിക്കാവുന്നതാണ്.

☛ വാഹനത്തിന് ലോൺ ഉണ്ടെങ്കിലോ?
ലോൺ അവസാനിപ്പിക്കുകയോ (Termination), ലോൺ തുടരുകയോ (Continuation) ചെയ്യാം .

☛ ലോൺ അവസാനിപ്പിക്കാൻ ഫിനാൻസിയറുടെ പക്കൽ നിന്ന് രേഖകൾ എന്തെങ്കിലും വാങ്ങേണ്ടതുണ്ടോ?
ഉണ്ട്. ലോൺ അവസാനിപ്പിക്കുന്നതിനോ / നിലനിർത്തുന്നതിനോ ഫിനാൻസിയറുടെ ഒപ്പും സീലും പതിപ്പിച്ച ഫോം വാങ്ങണം.

☛ ലോൺ അവസാനിപ്പിക്കാൻ ഫീസുണ്ടോ?
ഇല്ല. എന്നാൽ സർവ്വീസ് ചാർജ് ആയി 85 രൂപ ഈടാക്കും.


☛ അപേക്ഷാ ഫോറവും ഫീസ് റസീറ്റും പ്രിൻ്റ് എടുത്ത് എങ്ങനെ അയക്കണം?
അവ പ്രിൻ്റെടുത്ത് ഒപ്പിട്ട് അപ് ലോഡ് ചെയ്യണം. ഫിനാൻസിയർ ഒപ്പിട്ട ഫോറവും അപ് ലോഡ് ചെയ്യണം.

☛ അപ് ലോഡ് ചെയ്താൽ മാത്രം മതിയോ?
പോര. ഒറിജിനൽ RC, ഫീസ് റസീപ്റ്റ്, അപ് ലോഡ് ചെയ്ത അപേക്ഷാ ഫോറം, അഡ്രസ് പ്രൂഫ്, ട്രാൻസ്പോർട്ട് വാഹനമാണെങ്കിൽ പെർമിറ്റ് ക്യാൻസൽ ചെയ്ത / ട്രാൻസ്ഫർ ചെയ്ത ഉത്തരവ് എന്നിവ സഹിതം നേരത്തെ അപേക്ഷിച്ച ഓഫീസിലേക്ക് തപാൽ മാർഗം അയക്കുകയോ അല്ലെങ്കിൽ RT ഓഫിസിൽ സ്ഥാപിച്ച പെട്ടിയിൽ നിക്ഷേപിക്കുകയോ ചെയ്യണം.

☛ ട്രാൻസ്പോർട്ട് വാഹനങ്ങളുടെ പെർമിറ്റ് ക്യാൻസൽ ചെയ്ത ഉത്തരവോ പെർമിറ്റ് ട്രാൻസ്ഫർ ഗ്രാൻഡ് ഉത്തരവോ കിട്ടാൻ ആർ.ടി.ഓഫീസിൽ പോവണോ?
വേണ്ട. ആ ഉത്തരവുകൾ ഓൺലൈനായി പ്രിൻ്റ് എടുക്കാം.

☛ ലോൺ തുടരാനാഗ്രഹിക്കുന്നെങ്കിൽ ഫീസ് എത്ര?
ഇരു ചക്രവാഹനങ്ങൾ - Rs 500, ലൈറ്റ് - Rs 1500, മീഡിയം & ഹെവി - Rs 3000. കൂടാതെ Rs 85 രൂപ സർവ്വീസ് ചാർജും.

☛ പുതുതായി ലോൺ എടുക്കന്നുണ്ട് എങ്കിലോ?
അതും സാധിക്കും. ഫിനാൻസ് നോട്ടിംഗ് ഫീസ് അടച്ചാൽ മതി. ഫീസ് നിരക്കും സർവ്വീസ് ചാർജും തൊട്ട് മുകളിലുള്ള ചോദ്യത്തിൻ്റെ ഉത്തരത്തിലുള്ളത് തന്നെയാണ്.

☛ വാങ്ങിയാൾക്ക് പുതിയ RC എങ്ങിനെ കിട്ടും?
തപാൽ വഴി. അതിനായി വാങ്ങിയ ആളുടെ മേൽവിലാസം എഴുതി സ്പീഡ് പോസ്റ്റിനാവശ്യമായ സ്റ്റാമ്പ് ഒട്ടിച്ച കവർ കൂടി അപേക്ഷയോടൊപ്പം നൽകാൻ മറക്കരുത്.

☛ വാഹനത്തിൻ്റെ പേരിൽ എന്തെങ്കിലും ശിക്ഷാ നടപടികളോ ചെക്ക് റിപ്പോർട്ടോ പെൻ്റിംഗ് ഉണ്ടെങ്കിലോ?
അത്തരം ശിക്ഷാ നടപടികളോ ചെക്ക് റിപ്പോർട്ടോ തീർപ്പ് കൽപ്പിച്ചതിന് ശേഷമേ ഉടമസ്ഥാവകാശം മാറ്റാൻ സാധിക്കുകയുള്ളൂ. അല്ലാത്ത പക്ഷം ആയത് തീർപ്പ് കൽപ്പിക്കുമ്പോഴുള്ള ബാദ്ധ്യത വാങ്ങിയാൾക്കായിരിക്കും.