പുതിയ 300 സിസി ബൈക്കുമായി ഹീറോ ഇന്ത്യയിലേക്ക്

പുതുവർഷത്തിൽ അവതരിപ്പിക്കാനായി ഒരുപിടി പുത്തൻ ബൈക്കുകളെയാണ് ഹീറോ കരുതിവച്ചിരിക്കുന്നത്. പുതിയ എക്സ്ട്രീം 200 എസ് ബൈക്കിനെ ജനുവരി 30 ന് വിപണിയിലെത്തിക്കുമെന്ന് ഹീറോ നേരത്തെ വ്യക്തമാക്കിയിരുന്നു. അതുകൂടാതെ ഫെബ്രുവരിയിൽ നടക്കുന്ന ഓട്ടോ എക്സ്പോയിൽ ഹീറോ എക്സ്പ്ലസ് കോൺസ്പെറ്റിന്‍റെ അവതരണം നടത്താനൊരുങ്ങുകയാണ് ഹീറോ. ഈ കോൺസ്പെറ്റിന് പുറമെ ഓട്ടോഎക്സ്പോയിൽ പുതിയ 300സിസി മോട്ടോർബൈക്കിന്‍റെ അവതരണം കൂടി നടത്തുന്നതായിരിക്കും.

2016 ഓട്ടോ എക്സ്പോയിൽ അവതരണം നടത്തിയ എക്സ്എഫ്3ആർ കോൺസെപ്റ്റിനെ അടിസ്ഥാനപ്പെടുത്തി ആയിരിക്കും പുതിയ 300 സിസി ബൈക്ക് അവതരിക്കുക. 25 പിഎസ് കരുത്തും 24 എൻഎം ടോർക്കും സൃഷ്ടിക്കുന്ന 300 സിസി സിങ്കിൾ സിലിണ്ടർ എൻജിനായിരിക്കും ഈ ബൈക്കിന് കരുത്ത് പകരുക. ചക്രങ്ങളിലേക്ക് വീര്യമെത്തിക്കാൻ 6 സ്പീഡ് ഗിയർബോക്സും ഇടംപിടിക്കുന്നതായിരിക്കും.

മുന്നിൽ യുഎസ്എഡി ഫോർക്കുകളും പിന്നിൽ മോണോഷോക്കുകളും ആയിരിക്കും ഉണ്ടാവുക. ബ്രേക്കിങ് സാധ്യമാക്കാൻ ഡിസ്ക് ബ്രേക്കുകളും ഇടംനേടും. കൂടുതൽ സുരക്ഷ ഉറപ്പാക്കാൻ എബിഎസും ഉൾപ്പെടുത്തുവാനുള്ള സാധ്യതയുണ്ട്. ഇന്ത്യയിൽ ഉത്സവക്കാലത്തോട് അനുബന്ധിച്ചായിരിക്കും ഹീറോ പുതിയ 300 സിസി ബൈക്കിന്‍റെ അവതരണം നടത്തുക. 1.7 ലക്ഷത്തിനും 1.9 ലക്ഷത്തിനും ഇടയിലായിരിക്കും വില. മഹീന്ദ്ര മോജോ, കെടിഎം 250 ഡ്യൂക്ക്, ബജാജ് ഡോമിനാർ 400 എന്നീ എതിരാളികളോടായിരിക്കും ഹീറോയുടെ 300 സിസി ബൈക്കിന് പോരാടേണ്ടി വരിക.