2018 എച്ച്എഫ് ഡൊൺ കമ്മ്യൂട്ടർ ബൈക്കുമായി ഹീറോ

പുതിയ കമ്മ്യൂട്ടർ ബൈക്കുമായി ഹീറോ എത്തി. എച്ച്എഫ് ഡൊൺ എന്ന പേരിൽ അവതരിച്ചിരിക്കുന്ന ബൈക്കിന് 37,400 രൂപയാണ് ഡൽഹി എക്സ്ഷോറൂം വില. നിലവിൽ ഒഡീഷയിൽ മാത്രമാണ് ഈ ബൈക്ക് ലഭ്യമാക്കിയിരിക്കുന്നത്. വരും ദിവസങ്ങളിൽ ഇന്ത്യയിലുടനീളമുള്ള ഡീലർഷിപ്പുകളിൽ എച്ച്എഫ് ഡൊൺ എത്തുമെന്നും ഹീറോ അറിയിച്ചു.

ഒരു ഇടവേളയ്ക്ക് ശേഷം എച്ച്എഫ് ഡൊൺ വിപണിയിലേക്ക് എത്തിയിരിക്കുകയാണ്. ബിഎസ് IV മാനദണ്ഡങ്ങള്‍ പ്രാബല്യത്തില്‍ വരുത്തിയതിനാൽ കഴിഞ്ഞ വർഷം മെയിലായിരുന്നു എച്ച്എഫ് ഡൊൺ നിരത്തിൽ നിന്നും പിൻമാറിയത്. അതുകൊണ്ടുതന്നെ പുതിയ ബിഎസ് IV എൻജിനിലാണ് പുതിയ എച്ച്എഫ് ഡൊൺ ഒരുങ്ങിയിരിക്കുന്നത്. 8 ബിഎച്ച്പിയും 8 എൻഎം ടോർക്കും നൽകുന്ന 97.2 സിസി സിങ്കിൾ സിലിണ്ടർ എയർ കൂൾഡ് എൻജിനാണ് എച്ച്എഫ് ഡൊണിന്‍റെ കരുത്ത്.

വീലുകള്‍, എൻജിൻ, എക്‌സ്‌ഹോസ്റ്റ്, ഡ്രമ്മുകള്‍, ലെഗ് ഗാര്‍ഡ്, ഫോര്‍ക്ക് എന്നിവയില്‍ ബ്ലാക്ഡ്-ഔട്ട് തീം ലഭിച്ചിട്ടുണ്ട്. കൂടാതെ ഡീക്കലുകളും പുതിയ എച്ച്എഫ് ഡൊണിന്‍റെ പ്രത്യേകതയാണ്. മുൻചക്രത്തിൽ 130 mm ഡ്രം ബ്രേക്കും പിന്നിൽ 110 mm ഡ്രം ബ്രേക്കുമാണ് ഉൾക്കൊള്ളിച്ചിരിക്കുന്നത്. സസ്പെൻഷൻ കർത്തവ്യങ്ങൾക്കായി ടെലിസ്‌കോപിക് ഫോര്‍ക്കും, ട്വിന്‍-സ്പ്രിംഗ് ഷോക്ക് അബ്‌സോര്‍ബറുകളും ഇടംതേടിയിട്ടുണ്ട്. റെഡ്, ബ്ലാക് എന്നീ രണ്ട് പുത്തൻ നിറങ്ങളിലാണ് പുതിയ എച്ച്എഫ് ഡൊൺ ലഭ്യമാവുക.