ജാഗ്വർ എഫ്-ടൈപ് ഇൻജെനിയം പെട്രോൾ പതിപ്പ് ഇന്ത്യയിൽ

പുതിയ എഫ്-ടൈപ് ഇൻജെനിയം പെട്രോൾ പതിപ്പിനെ ജാഗ്വർ ഇന്ത്യയിലെത്തിച്ചു. കൂപ്പെ, കൺവർട്ടബിൾ മോഡലുകളിൽ എത്തിയിരിക്കുന്ന പുതിയ എഫ് ടൈപ്പിന് യഥാക്രമം 90.93 ലക്ഷം, 1.01 കോടി രൂപയാണ് വില. 300പിഎസ് കരുത്തും 400 എൻഎം ടോർക്കും സൃഷ്ടിക്കുന്ന 2.0 ലിറ്റർ പെട്രോൾ എൻജിനാണ് കരുത്തേകുന്നത്. 8 സ്പീഡ് ഓട്ടോമാറ്റിക് ഗിയർബോക്സ് ഘടിപ്പിച്ചിരിക്കുന്ന ഈ എൻജിന് നിലവിലെ എൻജിനെക്കാളും 52 കി.ഗ്രാം ഭാര കുറവുണ്ട്. അതുകൊണ്ട് തന്നെ കേവലം 5.7 സെക്കൻഡിൽ പൂജ്യത്തിൽ നിന്നും 100 കിലോമീറ്റർ വേഗത കൈവരിക്കാൻ സാധിക്കുമെന്ന് കമ്പനി അവകാശപ്പെടുന്നു.

ഇന്‍ജെനിയം എൻജിനുകളുടെ സിലിണ്ടര്‍ ചുമരുകളില്‍ ഏറെ ഘര്‍ഷണം സൃഷ്ടിക്കുകയില്ല അതുകൊണ്ടു തന്നെ കരുത്തുല്പാദനം കാര്യക്ഷമമായി നടക്കുമെന്നാണ് കമ്പനി പറയുന്നത്. മാത്രമല്ല ഈ വാഹനത്തിലെ സ്റ്റിയറിങ് നിയന്ത്രണവും ബോഡി കൺട്രോളും യാത്രാ സുഖവും ഏറെ മികവുറ്റതാണെന്നും കമ്പനി അവകാശപ്പെടുന്നു. ഇന്ത്യയിൽ പോർഷെ കെയ്മാൻ, ബോക്സ്റ്റർ എന്നിവരാണ് കരുത്തരായ എതിരാളികൾ.