എബിഎസ് സുരക്ഷയോടെ പുതിയ നിഞ്ച 300 വിപണിയിൽ

പുതിയ കാവസാക്കി നിഞ്ച 300 ഇന്ത്യയിൽ അവതരിച്ചു. ഡൽഹി എക്സ്ഷോറൂം 2.98 ലക്ഷം രൂപയ്ക്കാണ് പുതിയ നിഞ്ച 300 വിപണിയിൽ എത്തിയിരിക്കുന്നത്. നിലവിലെ മോഡലുകളെക്കാളും 62,000 രൂപ വിലക്കിഴിവിലാണ് പുതിയ നിഞ്ച 300 എത്തിയിരിക്കുന്നത് എന്നതാണ് ഏറെ ശ്രദ്ധേയമായിരിക്കുന്നത്. മാത്രമല്ല എബിഎസ് ഇല്ലെന്നുള്ള പരാതി കൂടി ഇക്കുറി കമ്പനി പരിഹരിച്ചിട്ടുണ്ട്.

മുൻപിൻ ടയറുകളിൽ എബിഎസ് സുരക്ഷ ഉറപ്പുവരുത്തി കൊണ്ടാണ് പുതിയ നിഞ്ച 300 ന്‍റെ അവതരണം. ലൈം ഗ്രീൻ എബണി, ക്യൻസി പ്ലാസ്മ ബ്ലൂ എന്നീ രണ്ട് നിറങ്ങളും പുത്തൻ സവിശേഷതകളാണ്. ഫെയറിങ്, ഡ്യുവൽ ഹെഡ് ലാമ്പ്, വിൻഡ് സ്ക്രീൻ എന്നിവ പ്രധാന ഡിസൈൻ സവിശേഷതകളായി പറയാം. മെക്കാനിക്കൽ സംബന്ധിച്ച മാറ്റങ്ങളൊന്നും വരുത്തിയിട്ടില്ല. അതെ 296സിസി പാരലൽ ട്വിൻ സിലിണ്ടർ എൻജിൻ തന്നെയാണ് കരുത്തേകുന്നത്.

38ബിഎച്ച്പിയും 27എൻഎം കരുത്തും നൽകുന്ന എൻജിനിൽ 6 സ്പീഡ് സ്ലിപ്പർ ക്ലച്ച് പിന്തുണയുള്ള ഗിയർബോക്സും നൽകിയിട്ടുണ്ട്. സസ്പെൻഷൻ നിർവഹിക്കാൻ മുന്നിൽ ടെലിസ്കോപിക് ഫോർക്കുകളും പിന്നിൽ മോണോഷോക്കും ഇടംതേടിയിട്ടുണ്ട്. കെടിഎം RC390,ടിവിഎസ് അപാച്ചെ RR310,യമഹ R3 എന്നിവരായിരിക്കും നിഞ്ച 300 ന്‍റെ മുൻനിര എതിരാളികൾ.