പുതിയ സിയാസ് എത്തുന്നു ഈ മാസം 21 ന്

മാരുതിയുടെ പുതുക്കിയ സിയാസ് ഈ മാസം 21ന് വിപണിയിലെത്തും. പ്രീമിയം ഡീലർഷിപ്പായ നെക്സ വഴിയായിരിക്കും വിൽപ്പന. ലോഞ്ചോടനുബന്ധിച്ച് നെക്സ ഡീലർഷിപ്പുകളിൽ പുതിയ സിയാസിന്‍റെ ബുക്കിങ്ങുകൾ ആരംഭിച്ചു. 25000 രൂപയാണ് ബുക്കിങ് തുകയായി ഈടാക്കുന്നത്.

രൂപഭാവത്തിൽ ഏറെക്കുറെ മാറ്റങ്ങളുമായാണ് പുതിയ സിയാസിന്‍റെ വരവ്. പുതിയ ഹെഡ് ലാമ്പ്, പരിഷ്കരിച്ച ബമ്പർ, പുത്തൻ ഗ്രിൽ, മോടികൂട്ടിയ ടെയിൽ ലാമ്പ് എന്നിവയാണ് പഴയ സിയാസിൽ നിന്നും പുത്തൻ മോഡലിനെ വ്യത്യസ്തനാക്കുന്ന ഘടകങ്ങൾ. അകത്തളത്തിലും ശ്രദ്ധേയമായ മാറ്റങ്ങൾ വരുത്തിയിട്ടുണ്ട്. പുതിയ ഇൻസ്ട്രമെന്‍റ് ക്ലസ്റ്റർ, വുഡൻ പാനൽ, ടച്ച്സ്ക്രീൻ സിസ്റ്റം എന്നിവയാണ് അവകാശപ്പെടാവുന്ന മാറ്റങ്ങൾ.

103 ബിഎച്ച്പിയും 138 എൻഎം ടോർക്കും സൃഷ്ടിക്കുന്ന 1.5 ലിറ്റർ പെട്രോൾ എൻജിനാണ് പുതിയ സിയാസിന് കരുത്തേകുന്നത്. ട്രാൻസ്മിഷൻ നിർവഹിക്കാനായി 5 സ്പീഡ് മാനുവലും 4 സ്പീഡ് ഓട്ടോമാറ്റിക് ഗിയർബോക്സും ഒരുങ്ങുന്നതായിരിക്കും. നിലവിലുള്ള അതെ 1.3 ലിറ്റർ ഡിഡിഐഎസ് എൻജിൻ തന്നെയായിരിക്കും പുതിയ സിയാസിലും തുടരുക. 89ബിഎച്ച്പിയും 200 എൻഎം ടോർക്കും നൽകുന്ന എൻജിനിൽ 5 സ്പീഡ് മാനുവൽ ഗിയർബോക്സാണുള്ളത്.