കെ.ആര്‍ വിജയയുടെ പുതിയ ജീപ്പ് കോമ്പസ്

അറുപതുകളിൽ തമിഴ്, തെലുങ്ക്, മലയാളം സിനിമകളിലൂടെ തെന്നിന്ത്യ മുഴുവൻ പ്രസിദ്ധിയാർജ്ജിച്ച ചലച്ചിത്ര താരം കെ. ആർ വിജയ പുതിയ കാർ സ്വന്തമാക്കിയിരിക്കുന്നു. അമേരിക്കൻ വാഹന നിർമാതാക്കളായ ജീപ്പിന്‍റെ പുതിയ കോമ്പസ് എസ്‍യുവിയാണ് താരം സ്വന്തമാക്കിയിരിക്കുന്നത്. കൊച്ചിയിലെ ജീപ്പ് ഷോറൂമിൽ നിന്നാണ് താരം കോമ്പസിന്‍റെ ഏറ്റവും ഉയർന്ന പതിപ്പായ ലിമിറ്റഡ് എഡിഷൻ ഡീസൽ മോഡൽ സ്വന്തമാക്കിയത്.



18.72 ലക്ഷം രൂപയാണ് ജീപ്പ് കോമ്പസ് ലിമിറ്റഡ് എഡിഷന്‍റെ വില. നിലവിൽ ഏറ്റവും കൂടുതൽ വില്പന കാഴ്ചവെക്കുന്ന മോഡലാണ് ജീപ്പ് കോമ്പസ്. കോംപാക്ട് എസ്‍യുവി സെഗ്മെന്‍റിൽ പ്രീമിയം ഫീച്ചറുകൾ ഉൾപ്പെടുത്തി കുറഞ്ഞ വിലയ്ക്ക് എത്തിയ മോഡൽ എന്ന നിലയ്ക്ക് കോമ്പസിന് വൻ സ്വീകാര്യതയാണ് ഇന്ത്യയിൽ ലഭിച്ചത്.173 കുതിരശക്തിയും 350 എന്‍എം ടോര്‍ക്കുമേകുന്ന 2.0 ലിറ്റര്‍ മള്‍ട്ടിജെറ്റ് ഡീസല്‍ എന്‍ജിനാണ് താരം സ്വന്തമാക്കിയ ലിമിറ്റഡ് എഡിഷൻ കോമ്പസിന് കരുത്തേകുന്നത്.



163 കുതിരശക്തിയും 250 എന്‍എം ടോര്‍ക്കും നല്‍കുന്ന 1.4 ലിറ്റര്‍ മള്‍ട്ടി എയര്‍ പെട്രോള്‍ എന്‍ജിൻ കൂടി കോമ്പസിന് കരുത്തേകുന്നുണ്ട്. സുരക്ഷ ഉറപ്പു വരുത്തുവാൻ ഇലക്ട്രോണിക് പാര്‍ക്കിങ് ബ്രേക്ക്, എബിഎസ്, ഹില്‍ സ്റ്റാര്‍ട്ട് അസിസ്റ്റ്, ആള്‍ സ്പീഡ് ട്രാക്ഷന്‍ കണ്‍ട്രോള്‍ സിസ്റ്റം, ഇലക്ട്രോണിക് റോള്‍ മിറ്റിഗേഷന്‍, ഇലക്ട്രോണിക് ബ്രേക്ക് ഡിസ്ട്രിബ്യൂഷന്‍, ഇലക്ട്രോണിക് സ്‌റ്റെബിലിറ്റി കണ്‍ട്രോള്‍ തുടങ്ങിയ ഫീച്ചറുകളും ജീപ്പ് കോമ്പസിന്‍റെ ഭാഗമാക്കിയിട്ടുണ്ട്.