വില്പന മാന്ദ്യം നേരിടാൻ മാരുതി സുസുക്കി; കാറുകൾക്ക് വമ്പൻ വിലക്കിഴിവ്, 2 ദിവസം പ്ലാന്റുകൾ അടച്ചിടും

അഗസ്റ്റിലെ വാഹന വിൽപ്പനയിലും മാരുതി സുസുക്കിക്ക് ആശ്വസിക്കാനൊന്നുമില്ല. 2018 ഓഗസ്റ്റ് മാസത്തെ വിൽപ്പനയുമായി തട്ടിച്ചു നോക്കുമ്പോൾ കഴിഞ്ഞ മാസം 36 ശതമാനത്തോളമാണ് വില്പന നഷ്ടം. 2018-ൽ 1,14,700 വാഹനങ്ങൾ വിറ്റഴിച്ച സ്ഥാനത്ത് കഴിഞ്ഞ മാസം വെറും 94,728 വാഹനങ്ങളാണ് ഇന്ത്യയിലെ ഏറ്റവും വലിയ വാഹന നിർമാതാക്കൾക്ക് വിറ്റഴിക്കാൻ സാധിച്ചത്. ഈ അടുത്ത കാലം വരെ മാരുതിക്ക് ഏറ്റവും വില്പനയുണ്ടായിരുന്ന മോഡലായ ആൾട്ടോ ഉൾപ്പെടുന്ന എൻട്രി-ലെവൽ വിഭാഗത്തിലാണ് കനത്ത നഷ്ടം. 35,895 വാഹനം വിറ്റിരുന്നിടത്തു നിന്ന് കഴിഞ്ഞ മാസത്തെ വില്പന 10,123 എണ്ണമായി കൂപ്പുകുത്തി. നഷ്ടം 71.8 ശതമാനം.

ആശങ്കാജനമായ ഈ കണക്കുകൾ, ചില അടിയന്തിര നടപടികളെടുക്കാൻ മാരുതി സുസുകിയെ പ്രേരിപ്പിച്ചിരിക്കുകയാണിപ്പോൾ. ആദ്യ പടിയായി വാഹന നിർമാണം കുറയ്ക്കും. ഇതിനായി ഈ മാസം 7,9 തീയതികൾ മാരുതിയുടെ ഹരിയാനയിലെ ഗുരുഗ്രാം, മനേസർ പ്ലാന്റുകൾ അടച്ചിടും. ഈ ദിവസങ്ങൾ നോ-പ്രൊഡക്ഷൻ ഡേ ആയിരിക്കുമെന്നു മാരുതി സുസുക്കി വാർത്ത കുറിപ്പിൽ അറിയിച്ചു.

തുടർച്ചയായ പത്താം മാസമാണ് മാരുതി സുസുകിയടക്കം ഇന്ത്യയിലെ ഏറെക്കുറെ എല്ലാ വാഹന നിർമാതാക്കളും വില്പന നഷ്ടത്തിലൂടെ കടന്നു പോകുന്നത്. ഡീലർഷിപ്പുകളിൽ പുതിയ വാഹനങ്ങൾ കുമിഞ്ഞു കൂടാതിരിക്കാൻ കഴിഞ്ഞ കുറെ മാസങ്ങളായി മാരുതി സുസുക്കി വാഹനനിർമാണത്തിൽ കുറവ് വരുത്തിയിരുന്നു. കഴിഞ്ഞ മാസം വാഹനനിർമ്മാണം മൂന്നിൽ ഒന്നായി കുറച്ചിരുന്നു.

വമ്പൻ വിലക്കിഴിവും

വാഹന നിർമ്മാണം നിയന്ത്രിക്കുന്നതോടൊപ്പം വമ്പൻ വിലക്കിഴിവുമായി ഉപഭോക്താക്കളെ ആകർഷിക്കാനും മാരുതി സുസുക്കി ശ്രമിക്കുന്നുണ്ട്. അരീന ഡീലർഷിപ്പുകൾ വഴി വിൽക്കുന്ന വിറ്റാര ബ്രെസ, ഡിസയർ, സ്വിഫ്റ്റ്, ആൾട്ടോ, സെലേറിയോ, ഈക്കോ, ഒമിനി, വാഗൺ-ആർ എന്നീ മോഡലുകൾക്കാണ് വിലക്കിഴിവ്.

ഇതിൽ വിറ്റാര ബ്രെസ ഒരു ലക്ഷം രൂപയോളം വിലക്കുറവിൽ ഇപ്പോൾ സ്വന്തമാക്കാം എന്നാണ് വിപണിയിൽ നിന്നുള്ള വിവരം. ഈ സെഗ്മെന്റിൽ ഏറ്റവും വില്പനയുള്ള മോഡലാണെങ്കിലും ടാറ്റ നെക്‌സോൺ, ഹ്യൂണ്ടായ് വെന്യൂ എന്നീ മോഡലുകളുടെ വരവും, ഡീസൽ എൻജിനിൽ മാത്രമേ വില്പനയുള്ളൂ എന്നുള്ളതും വിറ്റാര ബ്രെസയുടെ വിൽപ്പനയെ അല്പം ബാധിച്ചിട്ടുണ്ട്. ആനുകൂല്യങ്ങൾ വഴി അരീന ഡീലർഷിപ്പുകൾ ബ്രെസയുടെ വില്പന വർധിപ്പിക്കാനുള്ള കഠിന പരിശ്രമത്തിലാണ്.

Also read: മാരുതി സുസുക്കി എക്‌സ്എൽ6 പ്രീമിയം എംപിവിയെപ്പറ്റി നിങ്ങൾക്കറിയേണ്ടതെല്ലാം

90,000 രൂപവരെയുള്ള അനൂകൂല്യങ്ങളാണ് ഡിസയറിന്റെ ഡീസൽ വേരിയന്റുകൾക്ക്. എക്സ്ചേഞ്ച് ബോണസ്, ക്യാഷ് ഡിസ്‌കൗണ്ട്, വർധിപ്പിച്ച വാറന്റി പാക്കേജ് എന്നിങ്ങനെയാണ് ഈ ആനുകൂല്യങ്ങൾ. പെട്രോൾ വേരിയന്റുകൾ 60,000 രൂപവരെ ആനുകൂല്യങ്ങളിൽ ഇപ്പോൾ വാങ്ങാം. ഡിസയറിന്റെ ഹാച്ച്ബാക്ക് വകഭേദം, സ്വിഫ്റ്റിന് ചില അരീന ഡീലർഷിപ്പുകൾ 80,000 രൂപ വരെ ആനുകൂല്യങ്ങൾ നൽകുന്നുണ്ട്. ക്യാഷ് ഡിസ്‌കൗണ്ടുകൾ, എക്സ്ചേഞ്ച് ഓഫർ, വർധിപ്പിച്ച വാറന്റി പാക്കേജ് എന്നിങ്ങനെയാണ് സ്വിഫ്റ്റിലും ഈ ആനുകൂല്യങ്ങൾ ലഭിക്കുന്നത്.

ആൾട്ടോയുടെ 800 സിസി മോഡലും, K10 മോഡലും 70,000 രൂപ വരെ ആനുകൂല്യവുമായാണ് വിൽക്കുന്നത്. ക്യാഷ് ഡിസ്‌കൗണ്ടായി 40,000 രൂപയും എക്സ്ചേഞ്ച് ബോണസായി 30,000 രൂപവരെയും ഇതിൽ പെടും. ഈക്കോ, ഒമിനി എന്നീ വാൻ മോഡലുകൾ യഥാക്രമം 55,000, 35,000 രൂപയുടെ അനുകൂല്യങ്ങളിലാണ് വിൽക്കുന്നത്. മാരുതിയുടെ മറ്റൊരു പ്രധാന മോഡലായ വാഗൺ-ആർ ഇപ്പോൾ 25,000 രൂപ വരെ ആനുകൂല്യത്തിൽ വാങ്ങാം.

നെക്സ കാറുകൾക്കും വിലക്കിഴിവ്

അരീന ഡീലർഷിപ്പുകൾ വഴി വിൽക്കുന്ന മോഡലുകൾ മാത്രമല്ല, നെക്സ ശ്രേണിയിൽ വിൽക്കുന്ന ഈയടുത്തു പുറത്തിറങ്ങിയ XL6 ഒഴികെയുള്ള കാറുകൾക്കും വിലക്കിഴിവുണ്ട്. പ്രീമിയം ഹാച്ച്ബാക്ക് ബലേനോക്കു 65,000 രൂപവരെയാണ് ആനുകൂലങ്ങൾ. BS4 മാനദണ്ഡങ്ങൾക്കനുസരിച്ച 1.0-ലിറ്റർ ടർബോ-പെട്രോൾ എൻജിനുള്ള ബലെനോ ആർഎസ് ഉടനെ വിറ്റഴിക്കേണ്ടതിനാൽ ഇപ്പോൾ 85,000 രൂപ വരെ അനുകൂല്യത്തിലാണ് വിൽക്കുന്നത്. ഇതുകൂടാതെ വർധിപ്പിച്ച 5-വർഷ ഗ്യാരന്റിയും ബലെനോ മോഡലുകൾക്കൊപ്പമുണ്ട്.

ഇഗ്നിസും സിയാസും യഥാക്രമം 75,000, 95,000 രൂപ വരെ ആനുകൂല്യത്തിലാണ് നെക്സ ഡീലർഷിപ്പുകൾ വിൽക്കുന്നത്. സിയാസിന്റെ 1.3-ലിറ്റർ ഡീസൽ മോഡലുകൾക്കാണ് വൻ വില്പന. ബലേനോയെ പോലെ തന്നെ വർധിപ്പിച്ച 5-വർഷ ഗ്യാരന്റിയോടൊപ്പമാണ് സിയാസ് വേരിയന്റുകളും ഈ മാസം തുടക്കം മുതൽ വിൽക്കുന്നത്.

നെക്സ ശ്രേണിയിൽ ഏറ്റവുമധികം ആനുകൂല്യം എസ്-ക്രോസ്സ് ക്രോസ്സോവർ മോഡലിനാണ്. ഓരോ നെക്സ ഡീലർഷിപ്പുകളിലെയും വേരിയന്റുകളുടെ ലഭ്യതക്കനുസരിച്ചു, ഒരു ലക്ഷത്തിനു മുകളിൽ ആനുകൂല്യങ്ങളോടെ എസ്-ക്രോസ്സ് ഇപ്പോൾ ലഭ്യമാണ്.

മേല്പറഞ്ഞ എല്ലാ ആനുകൂല്യങ്ങളും ഡിസ്‌കൗണ്ടുകളും മാരുതി സുസുക്കി നേരിട്ട് പ്രഖ്യാപിച്ചതല്ല. അതിനാൽ ഓരോന്നും ഡീലർഷിപ്പുകളനുസരിച്ചു ഏറിയും കുറഞ്ഞുമിരിക്കും. നിങ്ങളുടെ അടുത്തുള്ള മാരുതി സുസുക്കി അരീന, നെക്സ ഡീലർഷിപ്പുകളുമായി ബന്ധപ്പെട്ടാൽ ആനുകൂല്യങ്ങളെപ്പറ്റി കൂടുതൽ വ്യക്തത ലഭിക്കും.