എബിഎസ് സുരക്ഷയിൽ ബജാജ് പൾസർ 220F എത്തുന്നു

പൾസർ തങ്ങളുടെ എല്ലാ ബൈക്കുകളും പുതുക്കി അവതരിപ്പിക്കുന്നതിന്‍റെ ഭാഗമായി 220എഫിന്‍റെ പരിഷ്കരിച്ച പതിപ്പുമായി വിപണിയിൽ എത്തുന്നു. എബിഎസ് പിന്തുണയോടെയാണ് പൾസർ 220എഫ് എത്തുന്നത്. പ്ലാസ്മ ബ്ലൂ, മിഡ്നൈറ്റ് ബ്ലാക്ക്, വൈൻ റെഡ് എന്നീ നിറങ്ങളിൽ എത്തുന്ന പുതിയ 220 എഫിന് 85,955 രൂപ പ്രൈസ് ടാഗിലായിരിക്കും എത്തുക. എബിഎസിനൊപ്പം ഡ്യുവൽ ഡിസ്ക് ബ്രേക്ക് കൂടി ഉൾപ്പെടുത്തുന്നതായിരിക്കും.

വലുപ്പമേറിയ വൈസർ, ഡ്യുവൽ ബീം എൽഇഡി പ്രൊജക്ഷൻ ലാമ്പ്, എൽഇഡി ടെയിൽ ലാമ്പ്, ഡിജിറ്റൽ ഇൻസ്ട്രമെന്‍റ് ക്ലസ്റ്റർ എന്നിവയാണ് പ്രധാന സവിശേഷതകൾ. മുൻഭാഗത്ത് ടെലിസ്കോപിക് സസ്പെൻഷനും പിന്നിൽ ക്രമീകരിക്കാൻ കഴിയുന്ന നെട്രോക്സ് സസ്പെൻഷനുമാണ് ലഭ്യമാക്കിയിരിക്കുന്നത്.

21പിഎസ് കരുത്തും 19എൻഎം ടോർക്കും സൃഷ്ടിക്കുന്ന 220സിസി ഓയിൽ കൂൾഡ് സിങ്കിൾ സിലിണ്ടർ എൻജിനാണ് ഈ ബൈക്കിന് കരുത്തേകുന്നത്. ബിഎസ് VI മാനദണ്ഡങ്ങൾ പാലിക്കുന്ന ഈ എൻജിനിൽ 5 സ്പീഡ് ഗിയർബോക്സാണ് ട്രാൻസ്മിഷൻ നിർവഹിക്കുന്നത്.