എൻഫീൽഡിന് എതിരാളിയാകാൻ ഇംപീരിയാലെ 400 എത്തുന്നു

റോയൽ എൻഫീൽഡിന് എതിരാളിയാകാൻ ബെനലിയുടെ ഇംപീരിയാലെ 400 എത്തുന്നു. കഴിഞ്ഞ വർഷം നടന്ന EICMA മോട്ടോർ ഷോയിലായിരുന്നു റെട്രോ സ്റ്റൈലിലുള്ള ഈ മോട്ടോർസൈക്കിൾ അവതരിച്ചത്. കരുത്തിലും ഡിസൈനിലും എൻഫീൽഡിന് ഒരു കടുത്ത എതിരാളി തന്നെയായിരിക്കും ഇംപീരിയാലെ 400. അടുത്ത വർഷത്തോടെ വിപണിയിൽ അവതരിക്കുമെന്നാണ് റിപ്പോർട്ട്.

ഡബിൾ ക്രാഡിൽ സ്റ്റീൽ ട്യൂബ് ഫ്രെയിമിലാണ് ബൈക്ക് ഒരുങ്ങിയിരിക്കുന്നത്. ഉയർന്നിരിക്കുന്ന ട്വിൻ പോഡ് ഇൻസ്ട്രുമെന്‍റ് ക്ലസ്റ്റർ ആണ് ഈ ബൈക്കിന്‍റെ മുഖ്യാകർഷണം. ടാക്കോമീറ്റര്‍, ഓഡോമീറ്റര്‍, സ്പീഡോ മീറ്റര്‍, ഫ്യുവല്‍ ഗേജ് എന്നിവയടങ്ങുന്നതാണ് ഇതിലെ ഇൻസ്ട്രുമെന്‍റ് ക്ലസ്റ്റർ. മുൻഭാഗത്ത് ടെലസ്‌കോപ്പിക് ഫോര്‍ക്കും പിന്നില്‍ ഡ്യുവല്‍ ഷോക്ക് അബ്‌സോര്‍ബേഴ്‌സുമാണ് സസ്‌പെന്‍ഷന്‍ നിറവേറുന്നത്. ഇരുചക്രങ്ങളിലും ഡിസ്ക് ബ്രേക്കുകളാണ് ബ്രേക്കിങ് സാധ്യമാക്കുന്നത്. സുരക്ഷാ ഫീച്ചറായി ഡ്യുവൽ ചാനൽ എബിഎസും ഒരുക്കിയിട്ടുണ്ട്.

19ബിഎച്ച്പി കരുത്തും 28 എൻഎം ടോർക്കും നൽകുന്ന 373.3 സിസി സിങ്കിൾ സിലിണ്ടർ എൻജിനാണ് ഈ ബൈക്കിന് കരുത്തേകുന്നത്. 5 സ്പീഡാണ് ഇതിലെ ഗിയർബോക്സ്. ഇന്ത്യയിൽ ഇംപീരിയാലെ 400 ന് 2.5-3 ലക്ഷത്തിനുള്ളിൽ വില പ്രതീക്ഷിക്കാം. നിലവിൽ റോയൽ എൻഫീൽഡ് ആണ് ഇംപീരിയാലെ 400 ന് ആകെയുള്ള ഒരു എതിരാളി.