മോദിക്ക് 71 ലക്ഷത്തിന്‍റെ ജീപ്പുമായി ഇസ്രായേൽ പ്രധാനമന്ത്രി

ഇസ്രയേൽ പ്രധാനമന്ത്രി ബഞ്ചമിൻ നെതന്യാഹു ഇന്ത്യ സന്ദർശിക്കാനെത്തുന്നത് മോദിക്ക് ഒരു സ്പെഷ്യൽ സമ്മാനവുമായി. കടൽ വെള്ളം ശുദ്ധീകരിച്ച് കുടിവെള്ളമാക്കാൻ കഴിയുന്നൊരു ജീപ്പാണ് ബഞ്ചമിൻ മോദിക്കായി സമ്മാനിക്കുന്നത്. നാലു ദിവസം നീളുന്ന സന്ദർശനത്തിനായി ജനുവരി 14 നാണ് ഇസ്രയേൽ പ്രധാനമന്ത്രി ഇന്ത്യയിലെത്തുന്നത്.

ഇസ്രായേലിൽ നിർമ്മിച്ച 'ഗാൽ മൊബൈൽ' എന്ന ജീപ്പാണ് ബഞ്ചമിൻ നെതന്യാഹു സമ്മാനമായി നൽകുന്നത്. കഴിഞ്ഞതവണ മോദി ഇസ്രായേൽ സന്ദർശിച്ചപ്പോൾ മെഡിറ്ററേനിയൻ തീരത്ത് വച്ച് ജീപ്പിന്‍റെ പ്രവർത്തന രീതി ചോദിച്ച് മനസിലാക്കുകയും ഈ സാങ്കേതികയിൽ മോദി താല്പര്യം പ്രകടിപ്പിക്കുകയും ചെയ്തിരുന്നു. തുടർന്നാണ് ജീപ്പ് ഇന്ത്യയിലെത്തിക്കാൻ ഇസ്രയേൽ പ്രധാനമന്ത്രി തീരുമാനിച്ചത്.

390,000 ഇസ്രയേലി ഷെക്കല്‍ അതായത് ഏതാണ്ട് 71 ലക്ഷം രൂപയോളം വില വരും ഈ ജീപ്പിന്. ഒരു ദിവസം 20000 ലീറ്റർ കടൽ ജലവും 80000 ലീറ്റർ നദി ജലവും ശുദ്ധീകരിക്കാനാകുമെന്നാണ് ഇസ്രായേൽ അവകാശപ്പെടുന്നത്. 1540 കിലോഗ്രാം ഭാരമുള്ള ജീപ്പിന് മണിക്കൂറിൽ 90 കിലോമീറ്ററാണ് പരമാവധി വേഗത.