ലോകത്തിലെ ഏറ്റവും ഉയരം കൂടിയ റെയില്‍വേ ലൈന്‍ ഇന്ത്യക്ക് സ്വന്തം!

ചരിത്രത്തില്‍ വീണ്ടും ഇടം നേടാന്‍ ഒരുങ്ങി ഇന്ത്യ. ലോകത്തിലെ ഏറ്റവും ഉയരത്തിലുള്ള റെയില്‍വേ ലൈന്‍ എന്ന നേട്ടമാണ് ഇനി ഇന്ത്യയ്ക്കു സ്വന്തമാകാന്‍ പോകുന്നത്. ചൈനയുടെ ക്വിന്‍ഗായി-ടിബറ്റ് റെയില്‍വേ ലൈനിനെ മറികടന്നാണ് ഇന്ത്യയുടെ ബിലാസ്‍പൂര്‍-മണാലി-ലെഹ് ലൈന്‍ പുതു ചരിത്രം രചിക്കാനൊരുങ്ങുന്നത്.

2019 ഒാടെ സര്‍വ്വേ നടപടികള്‍ അവസാനിപ്പിച്ച് 2020ല്‍ പ്രതിരോധ മന്ത്രാലയത്തിന് റിപ്പോര്‍ട്ട് സമര്‍പ്പിക്കാന്‍ ഒരുങ്ങുകയാണ് ഇന്ത്യന്‍ റെയില്‍വേ. പദ്ധതിയുടെ ആകെ ചിലവായി കണക്കാക്കിയിരിക്കുന്നത് 83,360 കോടി രൂപയാണ്.

പദ്ധതിയില്‍ 74 തുരങ്കങ്ങള്‍, 124 വലിയ പാലങ്ങള്‍, 396 ചെറിയ പാലങ്ങള്‍, എന്നിവയാണ് ആദ്യ സര്‍വ്വേയുടെ അടിസ്ഥാനത്തില്‍ ആവശ്യമായുള്ളത്.

ചൈനയുടെ ക്വിന്‍ഗായി-ടിബറ്റ് റെയില്‍വേ ലൈനിന് സമുദ്ര നിരപ്പില്‍ നിന്ന് 2,000 മീറ്റര്‍ ഉയരമാണുള്ളത്. എന്നാല്‍ നിര്‍ദ്ദിഷ്ട ബിലാസ്പൂര്‍ - മണാലി - ലേ റെയില്‍വെ ലൈന്‍ പ്രാവര്‍ത്തികമാകുന്നതോടെ സമുദ്രനിരപ്പില്‍ നിന്ന് 5,360 മീറ്റര്‍ ഉയരം ഉണ്ടാകും. ബിലാസ്പൂരില്‍ നിന്ന് പാത ആരംഭിക്കുമ്പോള്‍ 500 സമുദ്ര നിരപ്പില്‍ നിന്ന് 500 മീറ്റര്‍ ഉയരവും ഇത് ലഡാക്കിലെത്തുമ്പോഴേക്കും 3,215 മീറ്റര്‍ എത്തും. പിന്നീട് ജമ്മുകാശ്മീര്‍ തഗ്ലാന്‍റ് സ്റ്റേഷനിലെത്തുമ്പോഴേക്കും ഉയരം 5,360 എത്തും. കടന്നുപോകുന്ന പാതയുടെ നീളം 465 കിലോമീറ്ററാണ്.

വായുസമ്മര്‍ദ്ദമുള്ള കോച്ചുകളാണ് ട്രെയിന് ഉപയോഗിക്കുക. ഉയരം കൂടുമ്പോള്‍ യാത്രക്കാര്‍ക്ക് ശ്വാസസംബന്ധമായ പ്രശ്നങ്ങള്‍ ഉണ്ടാകാതിരിക്കാണ് ഇവ ക്രമീകരിച്ചിരിക്കുന്നത്.

2022 ല്‍ പദ്ധതി പൂര്‍ത്തീകരിക്കാന്‍ കഴിയുമെന്നാണ് റെയില്‍വേ കരുതുന്നത്.