3 സീരീസ് ഷാഡോ എഡിഷനുമായി ബിഎംഡബ്ല്യൂ ഇന്ത്യയിൽ

3 സീരീസ് ഷാഡോ എഡിഷനുമായി ബിഎംഡബ്ല്യൂ ഇന്ത്യയിൽ. പെട്രോൾ, ഡീസൽ വകഭേദങ്ങളിലാണ് ബിഎംഡബ്ല്യൂ ഈ പ്രത്യേക പതിപ്പിനെ എത്തിച്ചിരിക്കുന്നത്. 320d സ്പോർട് ഷാഡോ, 330i എം സ്പോർട് ഷാഡോ പതിപ്പുകൾക്ക് യഥാക്രമം 41.40 ലക്ഷം രൂപയും 47.30 ലക്ഷം രൂപയുമാണ് ഇന്ത്യയിലെ വില.

ചില്ലറ കോസ്മെറ്റിക് അപ്ഡേഷനുകളോടെയാണ് ബിഎംഡബ്ല്യൂ ഈ പ്രത്യേക പതിപ്പുകളെ അവതരിപ്പിച്ചിരിക്കുന്നത്. തിളക്കമേറിയ കിഡ്നി ഗ്രിൽ, സ്മോക്ക് ചെയ്ത ഹെഡ് ലൈറ്റും ടെയിൽലൈറ്റും, ബ്ലാക്ക് ക്രോം എക്സ്ഹോസ്റ്റ്, 18 ഇഞ്ച് അലോയ് വീലുകൾ എന്നിവയാണ് പ്രധാന സവിശേഷതകൾ.

ഡ്യുവൽ ടോൺ റെഡ്-ബ്ലാക്ക് സീറ്റ് അപ്ഹോൾസ്ട്രെയാണ് അകത്തളത്തിലെ മുഖ്യാകർഷണം. 8.7 ഇഞ്ച് ടച്ച്സ്ക്രീൻ സിസ്റ്റം, 10.5 ഇഞ്ച് ഡിജിറ്റൽ ഇൻസ്ട്രമെന്‍റ് ക്ലസ്റ്റർ, എം സ്പോർട് ലെതർ സ്റ്റിയറിങ് വീൽ എന്നിവയും അകത്തളത്തിലെ സവിശേഷതകളാണ്. റിവേഴ്സ് ക്യാമറ, പാർക്കിങ് സെൻസറുകൾ എന്നീ സവിശേഷതകളും ഷാഡോ പതിപ്പിൽ ഉൾക്കൊള്ളിച്ചിട്ടുണ്ട്.

മെക്കാനിക്കൽ സംബന്ധിച്ച മാറ്റങ്ങളൊന്നും വരുത്തിയിട്ടില്ല. അതെ 2.0 ലിറ്റര്‍ നാലു സിലിണ്ടര്‍ പെട്രോള്‍ എൻജിനാണ്330i എം സ്‌പോര്‍ട് ഷാഡോ എഡിഷന് കരുത്തേകുന്നത്. 248 ബിഎച്ച്പിയും 350 എൻഎം ടോർക്കും നൽകുന്നതാണ് ഈ എൻജിൻ. അതേസമയം 320d സ്‌പോര്‍ട് ഷാഡോ എഡിഷനിലെ 2.0 ലിറ്റര്‍ നാലു സിലിണ്ടര്‍ ഡീസല്‍ എൻജിൻ 187 ബിഎച്ച്പിയും 400 എൻഎം ടോർക്കുമാണ് ഉല്പാദിപ്പിക്കുന്നത്.