ബിഎംഡബ്ല്യൂ G 310 R,G 310 GS ബൈക്കുകളുടെ വിതരണം ഉടനാരംഭിക്കും

അടുത്തിടെയാണ് ബിഎംഡബ്ല്യൂ ജി 310 ആർ, ജി 310 ജിഎസ് ബൈക്കുകളെ ഇന്ത്യയിൽ അവതരിപ്പിച്ചത്. ബിഎംഡബ്ല്യൂ ജി 310 ആറിന് 2.99 ലക്ഷം രൂപയും ജി 310 ജിഎസ് ബൈക്കിന് 3.49 ലക്ഷം രൂപയുമാണ് വില. ഇന്ത്യയിൽ എത്തുന്ന ബിഎംഡബ്ല്യൂവിന്‍റെ ഏറ്റവും കുറഞ്ഞ വിലയ്ക്കുള്ള ബൈക്കുകളാണിവ. വിപണിയിലെ ഔദ്യോഗിക അവതരണത്തിന് പിന്നാലെ ആയിരത്തോളം ബുക്കിംഗിങുകളാണ് ഇരുബൈക്കുകളും നേടിയെടുത്തിരിക്കുന്നത്.

ബുക്കിങ് നടത്തിയവർക്ക് അടുത്ത ആഴ്ച തന്നെ ബൈക്ക് കൈമാറുമെന്ന് കമ്പനി അറിയിച്ചു. 50,000 രൂപയായിരുന്നു ബുക്കിങ് തുകയായി ഈടാക്കിയിരുന്നത്. 313 സിസി റിവേഴ്സ് ഇന്‍ക്ലൈന്‍ഡ് സിങ്കിൾ സിലിണ്ടര്‍ എൻജിനാണ് ഇരു ബൈക്കുകൾക്കും കരുത്തേകുന്നത്. 34ബിഎച്ച്പിയും 28എൻഎം ടോർക്കും നൽകുന്ന എൻജിനിൽ 6 സ്പീഡ് ഗിയർബോക്സും ഇടംതേടിയിട്ടുണ്ട്.

മണിക്കൂറിൽ 145 കിലോമീറ്ററാണ് ബൈക്കുകളുടെ പരമാവധി വേഗത. 30 മുതല്‍ 35 കിലോമീറ്റര്‍ മൈലേജ് ഈ ബൈക്കുകള്‍ കാഴ്ചവെക്കുമെന്നാണ് കമ്പനി അവകാശപ്പെടുന്നത്. വിപണിയില്‍ കെടിഎം 390 ഡ്യൂക്ക് ആണ് മുഖ്യ എതിരാളിയായിട്ടുള്ളത്.