ഏപ്രിൽ ഒന്നു മുതൽ കാറുകളുടെ വില വർധിക്കുമെന്ന് ബിഎംഡബ്ല്യൂ

ജർമ്മൻ ആഡംബര കാർ നിർമ്മാതാക്കളായ ബിഎംഡബ്ല്യൂ ഇന്ത്യയിലെ കാറുകളുടെ വില വർധിപ്പിക്കുന്നു. എല്ലാ ശ്രേണിയിലുമുള്ള കാറുകളുടെ വില 3 ശതമാനം മുതൽ 5.5 ശതമാനം വരെ വർധിക്കുന്നതായിരിക്കും. ഏപ്രിൽ ഒന്നു മുതലാണ് പുതുക്കിയ വില നിലവിൽ വരിക.

കസ്റ്റം ഡ്യൂട്ടിയിൽ ഏർപ്പെടുത്തിയ വർധനവാണ് വില വർധിപ്പിക്കാനുള്ള കാരണമായി കമ്പനി ചൂണ്ടികാണിച്ചിരിക്കുന്നത്. 2018 കേന്ദ്ര ബജറ്റിലാണ് ഇറക്കുമതി തീരുവ വർധിപ്പിച്ചതായുള്ള പ്രഖ്യാപനമുണ്ടായത്. സെകെഡി ചാനൽ വഴി ഇറക്കുമതി ചെയ്യുന്ന വാഹനങ്ങളുടെ തീരുവ 10 ശതമാനത്തിൽ നിന്ന് 15 ശതമാനമായി വർധിക്കുകയാണുണ്ടായത്.

30 ലക്ഷം രൂപ മുതൽ 2 കോടി രൂപ വരെയുള്ള കാറുകളെയാണ് ബിഎംഡബ്ല്യൂ ഇന്ത്യയിൽ അണിനിരത്തിയിരിക്കുന്നത്. ബിഎംഡബ്ല്യൂ മാത്രമല്ല വോൾവോ, ഓഡി, നിസാൻ, ഡാറ്റ്സൻ എന്നിവരും ഇറക്കുമതി തീരുവ വർധിപ്പിച്ചതിന്‍റെ പേരിൽ വില വർധനവ് ഏർപ്പെടുത്തിയ നിർമാതാക്കളാണ്.