ഡാറ്റ്സൻ ഗോ ലൈവ് സ്പെഷ്യൽ എഡിഷൻ അവതരിച്ചു

പുതിയ ഗോ ലൈവ് സ്പെഷ്യൽ എഡിഷനുമായി ഡാറ്റ്സൻ അവതരിച്ചു. കഴിഞ്ഞവർഷം ഡാറ്റ്സൻ അവതരിപ്പിച്ച ഗോ ലൈവ് കൺസ്പെറ്റിനെ അടിസ്ഥാനമാക്കിയാണ് പുതിയ ലൈവ് എഡിഷനെ പുറത്തിറക്കിയിരിക്കുന്നത്. 2018 ഗെയ്ക്കിന്‍ഡോ ഇന്തോനേഷ്യ ഇന്‍റർനാഷണല്‍ ഓട്ടോ ഷോയിലാണ് ഈ പ്രത്യേക പതിപ്പ് അരങ്ങേറിയത്. പരിമിതക്കാലത്തേക്ക് മാത്രമാണ് പുതിയ ഗോ ലൈവ് സ്പെഷ്യൽ എഡിഷൻ ലഭ്യമാവുക. പ്രീ ബുക്കിങ് ഇതിനകം തന്നെ ആരംഭിക്കുകയും ചെയ്തു.

ഒരു അഗ്രസീവ് മുഖഭാവമാണ് പുതിയ ഗോ ഹാച്ച്ബാക്ക് കൈവരിച്ചിരിക്കുന്നത്. ഗ്രെ നിറത്തിലുള്ള ഹാച്ച്ബാക്കിന് മുൻ സ്പ്ലിറ്ററിനും പിൻ ഡിഫ്യൂസറിനും സ്പോയിലറിനും മഞ്ഞ നിറം നൽകി മോടി കൂട്ടിയിട്ടുണ്ട്. അകത്തളത്തിൽ സീറ്റുകള്‍ക്കും സീറ്റ്ബെല്‍റ്റുകള്‍ക്കും ഇന്‍സ്ട്രമെന്‍റ് ക്ലസ്റ്ററിനും മഞ്ഞനിറത്തിലുള്ള ലൈനിങ് നൽകിയിട്ടുണ്ട്. ഈ സവിശേഷതയൊഴിച്ചാൽ അകത്തളത്തിൽ പറയത്തക്ക മാറ്റങ്ങളൊന്നുമില്ല.

1.2 ലിറ്റർ പെട്രോൾ കരുത്തിലാണ് ഗോ ലൈവ് സ്പെഷ്യൽ എഡിഷന്‍റെ ഒരുക്കം. 72 ബിഎച്ച്പി കരുത്തേകുന്ന എൻജിനിൽ 5 സ്പീഡ് മാനുവൽ ഗിയർബോക്സാണ് ഇടംപിടിക്കുക. ഓപ്ഷണലായി എക്സ്ട്രോണിക് സിവിടി ഓട്ടോമാറ്റിക് ഗിയര്‍ബോക്സും ലഭ്യമാക്കിയിട്ടുണ്ട്.