ഇലക്ട്രിക് വാഹനങ്ങള്‍ക്കായി കൈകോര്‍ത്ത് സുസുക്കിയും ടോയോട്ടയും

ന്യൂഡല്‍ഹി: ജപ്പാന്‍ സുസുക്കി മോട്ടോര്‍ കോര്‍പ് ഇന്ത്യയില്‍ ഇലക്ട്രിക് വാഹനങ്ങള്‍ അവതരിപ്പിക്കുവാന്‍ ഒരുങ്ങുന്നു. ആദ്യഘട്ടമായി ഒക്ടോബര്‍ മുതല്‍ ഇലക്ട്രിക് വാഹനങ്ങള്‍ രംഗത്തിറക്കാനാണ് സുസുക്കി തയ്യാറാവുന്നത്.

അടുത്ത മാസം 50 ഇലക്ട്രിക് വാഹനങ്ങള്‍ നിരത്തിലിറക്കി പരീക്ഷണം നടത്തും. ഉപയോക്താക്കള്‍ക്ക് സുരക്ഷിതമായ യാത്രയും വളരെ എളുപ്പത്തില്‍ കൈകാര്യം ചെയ്യുന്ന രീതിയിലുമാണ് നിര്‍മ്മാണമെന്ന് ന്യൂഡല്‍ഹിയില്‍ നടന്ന ഗ്ലോബല്‍ മൊബിലിറ്റി ഉച്ചകോടിയില്‍ ചെയര്‍മാന്‍ ഒസാമു സുസുക്കി പറഞ്ഞു.

ടോയോട്ടോ മോട്ടോര്‍ വിഭാഗത്തിന്‍റെ സഹകരണത്തോടെയാണ് 2020 ല്‍ രാജ്യത്ത് ഇലക്ട്രിക് വാഹനങ്ങള്‍ അവതരിപ്പിക്കുന്നത്. ഇന്ത്യയില്‍ ഇലക്ട്രിക് വാഹനങ്ങളുടെ സാധ്യതയെ കണക്കിലെടുത്താണ് സുസുക്കിയുടെ പുതിയ ചുവടുവെയ്പ്.

2030 എത്തുമ്പോള്‍ ഇന്ത്യയിലെ വാഹനങ്ങള്‍ വൈദ്യുതീകരിക്കാനാണ് പ്രധാനമന്ത്രി നരേന്ദ്രമോദിയുടെ നീക്കം. എന്നാല്‍ ബാറ്ററിയുടെ അമിതവില കാരണം വാഹനത്തിന് വില പൊതുവേ കൂടുതലായിരിക്കും. ചാര്‍ജിംഗ് സ്റ്റേഷനുകളുടെ അഭാവവും വാഹനത്തിന് വെല്ലുവിളിയായിരിക്കും.

മുന്‍നിര വാഹന നിര്‍മ്മാതാക്കളും ഇന്ത്യയിലെ സുസുക്കിയുടെ ഭാഗമായ മാരുതി സുസുക്കി ലിമിറ്റഡ് 2020 തോടെ ഇലക്ട്രിക് വാഹനത്തിനാവശ്യമായ ബാറ്ററി നിര്‍മ്മാണം ആരംഭിക്കുമെന്നും സുസുക്കി അറിയിച്ചു.