പ്രളയത്തിൽ രക്ഷകനായി എത്തിയ ജെയ്സലിന് സമ്മാനമായി 'മരാസോ'

കോഴിക്കോട്: പ്രളയത്തിൽ കുടുങ്ങിയ ഗർഭിണി അടക്കമുള്ളവർക്ക് രക്ഷപ്പെടാൻ സ്വന്തം പുറം ചവിട്ടു പടിയാക്കിയ മലപ്പുറം സ്വദേശി കെ.പി ജെയ്സലിന് മഹീന്ദ്രയുടെ പുതിയ എംപിവി മരാസോ പാരിതോഷികമായി നൽകി. കോഴിക്കോട് ഇറാം മോട്ടേഴ്സ് ആണ് ജെയ്സലിന് മരാസോ സമ്മാനിച്ച് ആദരിച്ചത്. ജെയ്സലിന്‍റെ വാർത്ത സാമൂഹ്യ മാധ്യമങ്ങളിൽ വൈറലായിരുന്നു. തുടർന്നാണ് സമൂഹത്തിന് ഏറെ മാതൃകയായി പ്രളയ ദുരന്തത്തിൽ രക്ഷാപ്രവർത്തനം നടത്തിയ മത്സ്യതൊഴിലാളി ജെയ്സലിനെ ആദരിക്കാൻ ഇറാം ഗ്രൂപ്പ് തയ്യാറായത്.

ദുരിതാശ്വാസ പ്രവർത്തനങ്ങളിലും മനുഷ്യ സഹജമായ സേവനങ്ങളിലും ഇതിനു മുൻപും സജീവമായി പ്രവർത്തിച്ചിട്ടുള്ള ഒരു വ്യവസായ ഗ്രൂപ്പാണ് ഡോ. സിദ്ദിഖ് അഹമദ്ദിന്‍റെ നേതൃത്വത്തിലുള്ള ഇറാൻ ഗ്രൂപ്പ്. നിരവധി സഹായ വാഗ്ദാനങ്ങൾ നൽകിയിട്ടുള്ള ഇറാം മോട്ടേഴ്സ് ശരീരം ചവിട്ടുപടിയാക്കിയ ജയ്സലിന് പുതിയ മരാസോ തന്നെ പാരിതോഷികമായി നൽകാൻ തീരുമാനിച്ചു. കേരളത്തിൽ മരാസോ സ്വന്തമാക്കുന്ന ആദ്യ വ്യക്തി കൂടിയായി മാറിയിരിക്കുകയാണ് ജെയ്സൽ.

കഴിഞ്ഞ ദിവസമാണ് മഹീന്ദ്ര എംപിവി ശ്രേണിയിൽ ഇന്നോവ ക്രിസ്റ്റ, മാരുതി എർടിഗ എന്നീ വാഹനങ്ങൾക്ക് വെല്ലുവിളിയായി മരാസോയെ വിപണിയിൽ അവതരിപ്പിച്ചത്. 9.99 ലക്ഷം പ്രാരംഭ വിലയിലാണ് മരാസോ ഇന്ത്യയിൽ എത്തിയത്. 1.5 ലിറ്റർ 4 സിലിണ്ടർ ടർബോ ചാർജ്ഡ് ഡീസൽ എൻജിനാണ് മരാസോയ്ക്ക് കരുത്തേകുന്നത്. 123 ബിഎച്ച്പിയും 300 എൻഎം ടോർക്കും നൽകുന്ന എൻജിനിൽ 6 സ്പീഡ് മാനുവൽ ട്രാൻസ്മിഷനാണ് ഇടംതേടിയിരിക്കുന്നത്.

സ്രാവിന്‍റെ മാതൃകയിലുള്ള എയറോഡൈനാമിക് ഡിസൈൻ ആണ് മരാസോയുടെ ഏറ്റവും വലിയ സവിശേഷത. സ്രാവിന്‍റെ പല്ലുകൾ പോലെ തോന്നിക്കുന്ന ഗ്രിൽ ആണ് മുൻഭാഗത്തെ മുഖ്യാകർഷണം. വിടർന്ന ബമ്പറുകൾ, എൽഇഡി ഹെഡ് ലാമ്പ്, ഡെ ടൈം റണ്ണിങ് ലാമ്പ്, 17 ഇഞ്ച് അലോയ് വീലുകൾ എന്നിവയാണ് പ്രധാന എക്സ്റ്റീരിയർ ഫീച്ചറുകൾ. 7.0 ഇഞ്ച് ടച്ച് സ്ക്രീൻ, ക്രൂയിസ് കൺട്രോൾ, ഓട്ടോമാറ്റിക് ക്ലൈമറ്റ് കൺട്രോൾ എന്നിവ അകത്തളത്തിലെ പ്രധാന സവിശേഷതകളാണ്. ഡിസ്ക് ബ്രേക്ക്, എബിഎസ്, ഡ്യുവൽ എയർബാഗുകൾ, പാർക്കിങ് സെൻസറുകൾ എന്നിവ ഈ വാഹനത്തിന്‍റെ സുരക്ഷ ഉറപ്പുവരുത്തുന്നു.

Image courtesy: Mathrubhumi