പുതിയ സൂപ്പർകാറുമായി ഫെരാരി എത്തുന്നു

പുതിയ ലിമിറ്റഡ് എഡിഷൻ സൂപ്പർകാറിനെ അവതരിപ്പിക്കാൻ ഒരുങ്ങി ഫെരാരി. '812 മോൺസ' എന്ന പേരിലായിരിക്കും പുതിയ സൂപ്പർ കാർ അവതരിക്കുക. 812 മോൺസയുടെ വളരെ പരിമിത എണ്ണം മാത്രമായിരിക്കും വിപണിയിലെത്തുക. ദശലക്ഷ കണക്കിന് യൂറോ വില ഈ സൂപ്പർകാറിന് പ്രതീക്ഷിക്കാം. പെർഫോമൻസും അതുപോലെ കരുത്തും വർധിപ്പിച്ച മോഡലായിരിക്കും ഇത്.

6.5 ലിറ്റർ വി12 നാച്ചുറലി ആസ്പിരേറ്റഡ് എൻജിൻ ആയിരിക്കും 812 മോൺസ സൂപ്പർകാറിന് കരുത്തേകുക. മൂന്ന് സെക്കൻഡിൽ താഴെ സമയം മതിയാകും പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാൻ. മണിക്കൂറിൽ 340 കിലോമീറ്ററാണ് ഉയർന്ന വേഗത.

പുതിയ സൂപ്പർകാറിന്‍റെ കസ്റ്റം ബോഡി എങ്ങനെയിരിക്കുമെന്ന വിവരം ലഭ്യമല്ല. ഒടുവിലായി നിർമിച്ച കസ്റ്റം ബോഡി റോഡ്സ്റ്ററിൽ ഫെറാറി 288 സ്പൈഡറിൽ നൽകിയതുപോലുള്ള റീട്രാക്ടബിൾ റൂഫ് നൽകിയിരുന്നില്ല. പകരം ടർഗ ടോപ്പിലേതുപോലുള്ള കാർബൺ ഫൈബറിൽ നിർമിച്ച രണ്ട് ചെറിയ റൂഫ് പാനലുകൾ മാത്രമാണ് നൽകിയിരുന്നത്. ഇത് മാന്വലായി ഘടിപ്പിക്കുന്ന വിധത്തിലായിരുന്നു.