ഫിഗോ സിഎൻജി പതിപ്പുമായി ഫോർഡ് ഇന്ത്യയിലേക്ക്

പുതിയ ഫിഗോ സിഎൻജി പതിപ്പിന്‍റെ ഇന്ത്യയിലെ പരീക്ഷണയോട്ടം ഫോർഡ് ആരംഭിച്ചു. ഫിഗോ ഫേസ്‍ലിഫ്റ്റിന്‍റെ അവതരണം അടുത്തിരിക്കുന്ന വേളയിലാണ് സിഎൻജി പതിപ്പിന്‍റെ പരീക്ഷണയോട്ടം ആരംഭിച്ചത്. 1.2 ലിറ്റര്‍ പെട്രോള്‍, 1.5 ലിറ്റര്‍ ഡീസല്‍ എൻജിൻ പതിപ്പുകളിലാണ് നിലവിൽ ഫിഗോ ലഭ്യമായിരിക്കുന്നത്. ഇനി ഫിഗോ സിഎൻജിയെയും വിപണിയിൽ പ്രതീക്ഷിക്കാം.

അടുത്തിടെയാണ് ഫോർഡ് ഫിഗോ ഫേസ്‍ലിഫ്റ്റിനെ ആഗോള വിപണിയിൽ എത്തിച്ചത്. KA+ എന്ന പേരിലായിരുന്നു പുതിയ ഫിഗോ അവതരിച്ചത്. ഒരുപിടി കോസ്മെറ്റിക് അപ്ഡേഷനുകൾക്കൊപ്പം മെക്കാനിക്കൽ മുഖത്ത് കാര്യമായ മാറ്റങ്ങൾ കൈവരിച്ചായിരിക്കും ഫിഗോ ഫേസ്‍ലിഫ്റ്റിന്‍റെ ഇന്ത്യയിലെ അവതരണം.

ക്രോം അലങ്കാരമുള്ള ഹണികോമ്പ് ഗ്രിൽ, വലുപ്പമേറിയ ഹെഡ് ലാമ്പ്, പരിഷ്കരിച്ച മുൻ,പിൻ ബമ്പറുകൾ എന്നിവയായിരിക്കും പ്രധാന എക്സ്റ്റീരിയർ ഫീച്ചറുകൾ. 6.5 ഇഞ്ച് ടച്ച്സ്‌ക്രീന്‍ സിസ്റ്റം, ആപ്പിള്‍ കാര്‍പ്ലേ, ആന്‍ഡ്രോയ്ഡ് എന്നിവയുടെ പിന്തുണയും പുതിയ ഫിഗോയിൽ പ്രതീക്ഷിക്കാം.

93 ബിഎച്ച്പി കരുത്തും 120 എൻഎം ടോർക്കും നൽകുന്ന പുതിയ 1.2 ലിറ്റർ 3 സിലിണ്ടർ ഡ്രാഗൺ സീരീസ് പെട്രോൾ എൻജിനാണ് പുതിയ ഫിഗോയ്ക്ക് കരുത്തേകുക. അതേസമയം 1.5 ലിറ്റർ ഡീസൽ എൻജിനും കരുത്തേകും. 97ബിഎച്ച്പിയും 215 എൻഎം ടോർക്കുമാണ് ഈ എൻജിൻ ഉല്പാദിപ്പിക്കുക. രണ്ട് എൻജിനുകളിലും 5 സ്പീഡ് മാനുവൽ ആയിരിക്കും ഗിയർബോക്സ്. പെട്രോൾ പതിപ്പിൽ ഓട്ടോമാറ്റിക് ഗിയർബോക്സും ഇടംപിടിച്ചേക്കും.