125 സിസി ഓട്ടോമാറ്റിക് സ്കൂട്ടറുമായി ഹീറോ

ഇന്ത്യയിലെ ഏറ്റവും വലിയ ഇരുചക്ര വാഹന നിർമാതാവായ ഹീറോ മോട്ടോർകോപ് പുതിയ 125 സിസി ഓട്ടോമാറ്റിക് സ്കൂട്ടറുമായി വിപണിയിലെത്തുന്നു. ഡിസംബർ 18ന് വിപണിയിൽ അരങ്ങേറുമെന്നുള്ള സൂചനയാണ് കമ്പനി നൽകിയിരിക്കുന്നത്. യമഹ ഫാസിനോ, പ്യാജിയോ വെസ്പ എന്നീ രണ്ട് സ്കൂട്ടറുകൾക്ക് ഒരു വെല്ലുവിളി തന്നെയായിരിക്കും ഹീറോയുടെ ഈ പുതിയ സ്കൂട്ടർ.

ഇന്ത്യയിൽ കമ്മ്യൂട്ടർ മോട്ടോർസൈക്കിളുകളുടെ ആധിപത്യം ഹീറോയ്ക്കാണെങ്കിലും സ്കൂട്ടർ സെഗ്മെന്‍റിൽ ഒരു നിലയുറപ്പിക്കാൻ ഹീറോയ്ക്ക് ഇതുവരെ സാധിച്ചിട്ടില്ല. പുതിയ 125 സിസി സ്കൂട്ടർ അവതരണത്തോടെ വിപണിയിൽ ഒരു സ്ഥാനം നേടിയെടുക്കാനുള്ള കഠിന ശ്രമത്തിലാണ് ഹീറോ.

അതുകൊണ്ട് തന്നെ ഒരു റെട്രോ സ്റ്റൈൽ തീമിലാണ് സ്കൂട്ടർ ഒരുക്കിയിരിക്കുന്നത്. ഇന്ത്യയിലെ യുവതലമുറയാണ് പ്രധാന ലക്ഷ്യം. നിലവിൽ ഡ്യുവറ്റ്, മാസ്ട്രോ എഡ്ജ്, പ്ലെഷർ എന്നീ സ്കൂട്ടറുകളാണ് ഹീറോ ഇന്ത്യയിൽ വിറ്റഴിക്കുന്നത്. ഫാസിനോ, വെസ്പ സ്കൂട്ടറുകൾക്ക് വെല്ലുവിളിയാകുന്ന തരത്തിൽ ഏവർക്കും താങ്ങാനാവുന്ന വിലയ്ക്ക് സ്കൂട്ടറിനെ വിപണിയിലെത്തിക്കാനുള്ള തയ്യാറെടുപ്പാണ് ഹീറോ നടത്തികൊണ്ടിരിക്കുന്നത്. വിലയും മറ്റ് മെക്കാനിക്കൽ ഫീച്ചറുകളും സംബന്ധിച്ചുള്ള വിവരങ്ങളൊന്നും ഇതുവരെ വ്യക്തമാക്കിയിട്ടില്ല.

എന്നാൽ പുതിയ സ്കൂട്ടർ യൂനിസെക്സ് മോഡലാണെന്നും ഏത് പ്രായക്കാർക്കും ഒരുപോലെ ഇണങ്ങുന്ന തരത്തിലുള്ള ഡിസൈനാണെന്നുള്ള സൂചന കമ്പനി നൽകിയിട്ടുണ്ട്. ഡിസംബർ മാസത്തോടെ വിപണിയിലെത്തുന്ന സ്കൂട്ടറിന്‍റെ വിതരണം ജനുവരി ആദ്യവാരത്തോടെ നടക്കുന്നതായിരിക്കും.