വില്പനയിൽ കുതിച്ച് ഹോണ്ട ഗ്രാസിയ

അര്‍ബന്‍ സ്‌കൂട്ടര്‍ എന്ന വിശേഷണത്തോടെ 125 സിസി ശ്രേണിയില്‍ പുതുതായി അവതരിച്ച ഗ്രാസിയയുടെ വില്പന 15,000 യൂണിറ്റുകൾ കവിഞ്ഞതായി ഹോണ്ട മോട്ടോർസൈക്കിൾ ആൻഡ് സ്കൂട്ടർ ഇന്ത്യ. വിപണിയിലെത്തി 21 ദിവസത്തിനകമാണ് ഗ്രാസിയ 15,000ത്തിലധികം യൂണിറ്റുകളുടെ വില്പന കാഴ്ചവച്ചിരിക്കുന്നത്. പുതുമയുള്ള സവിശേഷതകളും സ്റ്റൈലിഷുമായി ഗ്രാസിയ എത്തിയപ്പോൾ വൻ സ്വീകാര്യത തന്നെയാണ് ഉപഭോക്താക്കളുടെ ഭാഗത്ത് നിന്നുണ്ടായിരിക്കുന്നത്.

ആക്ടീവയുടെ അതെ എൻജിനിൽ നവംബർ രണ്ടിനായിരുന്നു ഗ്രാസിയ വിപണിയിലെത്തിയത്. എൽഇഡി ഹെഡ് ലാമ്പ്, ഇക്കോസ്പീഡ് ഇൻഡിക്കേറ്റർ, മൊബൈൽ ചാർജിങ് സോക്കറ്റ്, മള്‍ട്ടി ഫങ്ഷന്‍ ഫോര്‍ ഇന്‍ വണ്‍ കീ ഹോള്‍ഡർ എന്നിവയാണ് ഗ്രാസിയയുടെ പ്രധാന സവിശേഷതകൾ. സ്റ്റാൻഡേർഡ്, അലോയ്, ഡിഎൽഎക്സ് എന്നീ മൂന്ന് വകഭേദങ്ങളിൽ ആറു വ്യത്യസ്ത നിറങ്ങളിലാണ് ഗ്രാസിയ ലഭ്യമായിരിക്കുന്നത്. ഗ്രാസിയയുടെ ടോപ്പ് എൻഡ് വകഭേദത്തിന് 65,948 രൂപയാണ് കോഴിക്കോട് എക്സ്ഷോറൂം വില.

8.52ബിഎച്ച്പിയും 10.54 എൻഎം ടോർക്കും ഉല്പാദിപ്പിക്കുന്ന 124.9സിസി ഫോർ സ്ട്രോക്ക് സിങ്കിൾ സിലിണ്ടർ എൻജിനാണ് ഗ്രാസിയയുടെ കരുത്ത്. വി-മാറ്റിക് ട്രാൻസ്മിഷനാണ് ഗ്രാസിയയിലുള്ളത്. ലിറ്ററിന് 40-50 കിലോമീറ്റർ വരെ മൈലേജും ഗ്രാസിയ വാഗ്ദാനം ചെയ്യും. മണിക്കൂറിൽ 58 കിലോമീറ്ററാണ് ഗ്രാസിയയുടെ ഉയർന്ന വേഗത.