എലൈറ്റ് i20 യുടെ സിവിടി പതിപ്പുമായി ഹ്യുണ്ടായ്

2018 ഓട്ടോ എക്സ്പോയിലാണ് ഹ്യുണ്ടായ് എലൈറ്റ് i20 യുടെ ഫേസ്‍ലിഫ്റ്റ് പതിപ്പിനെ ആദ്യമായി പുറത്തിറക്കിയത്. മാനുവൽ പതിപ്പിനെ മാത്രമായിരുന്നു ഔദ്യോഗികമായി അവതരിപ്പിച്ചത്. ഇപ്പോൾ പുതിയ എലൈറ്റ് i20യുടെ സിവിടി ഓട്ടോമാറ്റിക് പതിപ്പുമായി വിപണിയിൽ എത്തിയിരിക്കുകയാണ് ഹ്യുണ്ടായ്. ആസ്ത, മാഗ്ന എന്നീ രണ്ട് വകഭേദങ്ങളിലാണ് സിവിടി ലഭ്യമാക്കിയിരിക്കുന്നത്.

i20യുടെ ആസ്ത സിവിടി പതിപ്പിന് 8.16 ലക്ഷവും മാഗ്ന സിവിടിക്ക് 7.04 ലക്ഷം രൂപയുമാണ് വില. ബലെനോ സിവിടിയെക്കാളും അല്പം കുറഞ്ഞ വിലയ്ക്കാണ് എലൈറ്റ് i20 സിവിടി എത്തിയിരിക്കുന്നത് എന്നതാണ് ശ്രദ്ധേയമായിരിക്കുന്നത്. 7.1 ലക്ഷം രൂപ മുതലാണ് ബലെനോ സിവിടിയുടെ വിലയാരംഭിക്കുന്നത്. എലൈറ്റ് i20യുടെ പെട്രോൾ വകഭേദത്തിൽ മാത്രമാണ് സിവിടി ലഭ്യമാവുക.

83ബിഎച്ച്പിയും 114എൻഎം ടോർക്കുമാണ് 1.2 ലിറ്റർ 4 സിലിണ്ടർ പെട്രോൾ എൻജിൻ ഉല്പാദിപ്പിക്കുന്നത്. 5 സ്പീഡ് മാനുവൽ ട്രാൻസ്മിഷനൊപ്പം സിവിടിയും ഇനി ലഭ്യമാക്കാം. എബിഎസും എയഡബാഗും എലൈറ്റ് i20 ൽ സ്റ്റാൻഡേർഡ് ഫീച്ചറുകളായി നൽകിയിട്ടുണ്ട്. ഇതിനകം തന്നെ ഇന്ത്യയിലുടനീളമുള്ള ഹ്യുണ്ടായ് ഡീലർഷിപ്പുകളിൽ എലൈറ്റ് i20 സിവിടി പതിപ്പ് ലഭ്യമായി തുടങ്ങിയിട്ടുണ്ട്. ഉടൻ തന്നെ വിതരണം ആരംഭിക്കുന്നതായിരിക്കും.