ഇലക്ട്രിക് എസ്‍യുവി കോനയുമായി ഹ്യുണ്ടായ് ഇന്ത്യയിലേക്ക്

രണ്ടു വർഷത്തിനുള്ളിൽ വൈദ്യുത എസ്‍യുവി 'കോന'യുമായി ഹ്യുണ്ടായ് ഇന്ത്യയിലെത്തുമെന്ന് സൂചന. ഇക്കഴിഞ്ഞ ഓട്ടോ എക്സ്പോ വഴിയായിരുന്നു കോന ഇന്ത്യയിലേക്കുള്ള അരങ്ങേറ്റം നടത്തിയത്. 20 ലക്ഷത്തിനും 25 ലക്ഷത്തിനും ഇടയിലായിരിക്കും കോനയുടെ ഇന്ത്യയിലെ വില. വിദേശത്ത് നിർമ്മിച്ച കാറിനെ ഇറക്കുമതി ചെയ്ത് ചെന്നൈയിലെ നിർമ്മാണ ശാലയിൽ നിന്ന് അസംബിൾ ചെയ്തായിരിക്കും വിപണിയിലെത്തുക. അതുകൊണ്ട് തന്നെ വിലയിൽ അല്പം വർധനവും പ്രതീക്ഷിക്കാവുന്നതാണ്.

നിലവിൽ വിദേശത്ത് വില്പനയിലുള്ള 139 പിഎസ് കരുത്തുള്ള വൈദ്യുത മോട്ടോർ തന്നെയായിരിക്കും കോനയ്ക്ക് കരുത്തേകുക. 325 എൻഎം ടോർക്കും ഇതു സൃഷ്ടിക്കുന്നു. ഒറ്റത്തവണത്തെ ചാർജ്ജിൽ 325 കിലോമീറ്റർ സഞ്ചരിക്കാൻ കഴിയുമെന്നാണ് ഹ്യുണ്ടായ് അവകാശപ്പെടുന്നത്. പൂജ്യത്തിൽ നിന്നും 100 കിലോമീറ്റർ വേഗത കൈവരിക്കാൻ കേവലം 7.6 സെക്കൻഡ് മതിയാകും. ഇന്ത്യയിൽ ചാർജ്ജിങ് സ്റ്റേഷനുകളുടെ അപര്യാപ്തത കണക്കിലെടുത്ത് കൊണ്ട് ഹോം ചാർജിങ് കിറ്റുകൾ അടക്കമായിരിക്കും കോന വില്പനയ്ക്കെത്തുക.