പുതിയ സാൻട്രോ ഓക്ടോബറിൽ അവതരിക്കും

AH2 കോഡ് നാമത്തിൽ അറിയപ്പെടുന്ന പുത്തൻ തലമുറ ഹ്യുണ്ടായ് സാൻട്രോ ഓക്ടോബർ 23 ന് വിപണിയിൽ എത്തുമെന്ന് റിപ്പോർട്ട്. പുതിയ സാൻട്രോയുടെ പേര് ഇതുവരെ ഔദ്യോഗികമായി പ്രഖ്യാപിച്ചിട്ടില്ല. അവതരണ വേളയിൽ മാത്രമെ പേര് വെളിപ്പെടുത്തുകയുള്ളൂ. സാൻട്രോയ്ക്കൊപ്പം മറ്റൊരു പേര് കൂടി ചേർക്കാനാണ് കമ്പനി തീരുമാനിച്ചിരിക്കുന്നത്.

മുന്‍തലമുറ i10 ന്‍റെ അതെ പ്ലാറ്റ്ഫോമിനെ അടിസ്ഥാനപ്പെടുത്തിയാണ് പുതിയ സാൻട്രോയും ഒരുങ്ങുന്നത്. എന്നാൽ i10 നേക്കാൾ വലുപ്പവും നീളവും കൂടുതലുണ്ട് പുതിയ സാൻട്രോയ്ക്ക്. പുതിയ ഗ്രിൽ, വലുപ്പമേറിയ ഹെഡ് ലാമ്പ്, വിശാലമായ അകത്തളം, ത്രീ സ്പോക് സ്റ്റിയറിങ് വീൽ, ട്വിൻ പോഡ് ഇൻസ്ട്രമെന്‍റ് ക്ലസ്റ്റർ,വൈദ്യുത നിയന്ത്രിത ഒആർവിഎമ്മുകൾ, പവർ വിൻഡോസ് എന്നിവ സാൻട്രോയുടെ പുതിയ സവിശേഷതകളിൽപ്പെടും.

ബ്ലാക്ക്, ബീജ് നിറത്തിലാണ് അകത്തളം ഒരുക്കിയിരിക്കുന്നത്. പുതിയ ടച്ച് സ്ക്രീൻ സിസ്റ്റവും സാൻട്രോയിൽ ഒരുങ്ങുമെന്നാണ് സൂചന. ഹ്യുണ്ടായിയുടെ പുതിയ 1.1 ലിറ്റർ പെട്രോൾ എൻജിനായിരിക്കും സാൻട്രോയ്ക്ക് കരുത്തേകുക. BS IV മാനദണ്ഡങ്ങൾ പാലിച്ചുകൊണ്ടുള്ള എൻജിനായിരിക്കും ഇത്. മാനുവലിന് പുറമെ എഎംടി ഗിയർബോക്സും പുതിയ സാൻട്രോയിൽ ഇടംതേടുന്നതായിരിക്കും.

പുതിയ സാന്‍ട്രോ നിരത്തിലെത്തുന്നതോടെ ഇയോൺ വിടവാങ്ങിയേക്കും. നിലവില്‍ ഏറ്റവും വിലകുറഞ്ഞ ഹ്യുണ്ടായി കാറാണ് ഇയോണ്‍.