ഇലക്ട്രിക് എസ്‍യുവിയുമായി ഹ്യുണ്ടായ് ഇന്ത്യയിലെത്തുന്നു

ദക്ഷിണ കൊറിയൻ നിർമാതാക്കളായ ഹ്യുണ്ടായ് ഇലക്ട്രിക് എസ്‍യുവിയുമായി ഇന്ത്യയിലെത്തുന്നു. 2019 രണ്ടാം പകുതിയോടെ ഇലക്ട്രിക് എസ്‍യുവി വിപണിയിൽ അവതരിക്കുമെന്നാണ് ഹ്യുണ്ടായ് നൽകുന്ന സൂചന. ഇപ്പോൾ കംപ്ലീറ്റ്ലി നോക്ക്ഡ് ഡൗൺ (CKD)യൂണിറ്റ് വഴിയായിരിക്കും ഇന്ത്യയിൽ അവതരിക്കുക. കാലക്രമേണ ഇലക്ട്രിക് മോഡലുകളുടെ ഉല്പാദനം ചെന്നൈ പ്ലാന്‍റിൽ വച്ചായിരിക്കും നടക്കുകയെന്നും കമ്പനി അറിയിച്ചു.

2020 ഓടെ ഇന്ത്യൻ നിരത്ത് ഇലക്ട്രിക് വാഹനങ്ങൾക്ക് വഴിമാറി കൊടുക്കണമെന്ന സർക്കാർ നീക്കത്തിന്‍റെ ഭാഗമായാണ് ഹ്യുണ്ടായ് ഇലക്ട്രിക് വാഹനങ്ങളെ ഇന്ത്യയിൽ അവതരിപ്പിക്കാൻ ഒരുങ്ങുന്നത്. ഇക്കഴിഞ്ഞ ഡൽഹി ഓട്ടോഎക്സ്പോയിൽ ഹ്യുണ്ടായ് അയോണിക്, കോണ ഇലക്ട്രിക് മോഡലുകളുടെ അവതരണം നടത്തിയിരുന്നു. 2020 ഓടെ 8 പുതിയ ഇലക്ട്രിക് വാഹനങ്ങളെ ഇന്ത്യയിൽ എത്തിക്കണമെന്നാണ് ഹ്യുണ്ടായ് ലക്ഷ്യമിടുന്നത്. മാത്രമല്ല 2020ഓടെ ഹ്യുണ്ടായുടെ ഉല്പാദന ശേഷി 10 ലക്ഷം യൂണിറ്റായി വർധിപ്പിക്കാനും കമ്പനി പദ്ധതിയിടുന്നുണ്ട്.