സുരക്ഷ വർധിപ്പിച്ച് ഹ്യുണ്ടായ് ഗ്രാൻഡ് i10

ഗ്രാൻഡ് i10 ഹാച്ച്ബാക്കിന്‍റെ സുരക്ഷ വർധിപ്പിച്ച് ഹ്യുണ്ടായ്. ഇനി മുതൽ ഡ്യുവൽ ഫ്രണ്ട് എയർബാഗുകൾ, ഇലക്ട്രോണിക് ബ്രേക്ക്ഫോഴ്സ് ഡിസ്ട്രിബ്യൂഷൻ, എബിഎസ് എന്നിവ സ്റ്റാൻഡേർഡ് സേഫ്റ്റി ഫീച്ചറുകളായി ഒരുങ്ങുന്നതായിരിക്കും. അടുത്തവർഷത്തോടെ ഇന്ത്യയിൽ കർശനമാക്കാനിരിക്കുന്ന സുരക്ഷാമാനദണ്ഡങ്ങൾ പാലിച്ചാണ് ഹ്യുണ്ടായ് i10 ഹാച്ച്ബാക്കിനെ പുതുക്കി അവതരിപ്പിച്ചിരിക്കുന്നത്.

ഗ്രാൻഡ് i10 ഹാച്ച്ബാക്കിന്‍റെ ഏറ്റവും ഉയർന്ന വകഭേദത്തിന്‍റെയും സുരക്ഷ വർധിപ്പിച്ചു. സെൻട്രൽ ലോക്ക്, ആഘാതം തിരിച്ചറിഞ്ഞ് പ്രവർത്തിക്കുന്ന ഡോർ ലോക്ക്, പാർക്കിങ് സെൻസർ, ഡിഫോഗർ തുടങ്ങിയ ഫീച്ചറുകൾ ടോപ്പ് എൻഡ് വകഭേദങ്ങളിലും ഇടംതേടും. സുരക്ഷ ഫീച്ചറുകൾ ഉൾപ്പെടുത്തി എന്നല്ലാതെ പറയത്തക്ക മാറ്റങ്ങളൊന്നും മോഡലിൽ വരുത്തിയിട്ടില്ല. വിലയിലും മാറ്റമില്ല. ഡൽഹി എക്സ്ഷോറൂം 4.73 ലക്ഷം രൂപ തന്നെയാണ് എൻട്രി ലെവൽ ഗ്രാൻഡ് i10 പെട്രോൾ മോഡലിന്‍റെ വില. ടോപ് എൻഡ് ഡീസൽ മോഡലിന് 7.50 ലക്ഷം രൂപയാണ് വില.

1.2 ലിറ്റർ ഡീസൽ, പെട്രോൾ എൻജിനുകളാണ് ഗ്രാൻഡ് i10 ന് കരുത്തേകുന്നത്. 74ബിഎച്ച്പിയും 190എൻഎം ടോർക്കുമാണ് 1.2 ലിറ്റർ ഡീസൽ എൻജിൻ ഉൽപാദിപ്പിക്കുന്നത്. അതേസമയം 82ബിഎച്ച്പിയും 113എൻഎം ടോർക്കുമാണ് പെട്രോൾ എൻജിനുള്ളത്. 5 സ്പീഡ് മാനുവലാണ് രണ്ട് എൻജിനുകളിലും ഒരുക്കിയിരിക്കുന്ന ട്രാൻസ്മിഷൻ.