പുതിയ 'ചീഫ്ടെയ്ൻ എലൈറ്റ്' ആഗസ്ത് 12 ന് ഇന്ത്യയിൽ

ചീഫ്ടെയ്ൻ എലൈറ്റ് അത്യാഡംബര ബൈക്കുമായി ഇന്ത്യൻ മോട്ടോർസൈക്കിൾ ആഗസ്ത് 12 ന് വിപണിയിലെത്തും. ഇതിനകം തന്നെ കമ്പനി വെബ്സൈറ്റിലും ചീഫ്ടെയ്ൻ എലൈറ്റ് ഇടംനേടി കഴിഞ്ഞു. ആകെ 350 യൂണിറ്റുകൾ മാത്രമാണ് കമ്പനി ഇതുവരെയായി നിർമ്മിച്ചത്. അതിൽ വളരെ കുറച്ച് യൂണിറ്റുകൾ മാത്രമെ ഇന്ത്യയിൽ എത്തുകയുള്ളൂ.

350 യൂണിറ്റുകളിൽ ഓരോ ബൈക്കിനും വ്യത്യസ്ത ഡിസൈൻ ആയിരിക്കും ലഭിക്കുക. വ്യത്യസ്തമായ കസ്റ്റം ഇൻസ്പയേർഡ് പെയിന്‍റാണ് ഇതിനായി ഉപയോഗിക്കുന്നത്. ചീഫ്ടെയ്ൻ നിരയിലെ ഏറ്റവും ഉയർന്ന വകഭേദമായിരിക്കും എലൈറ്റ്. നിലവിലെ ചീഫ്ടെയ്ൻ സ്റ്റാൻഡേർഡ് മോഡലുകളിലുള്ള അതെ എൻജിൻ തന്നെയാണ് എലൈറ്റിനും കരുത്തേകുന്നത്. 161.6 എൻഎം ടോർക്കുള്ള 1811 സിസി തണ്ടർസ്ട്രോക്ക് 111 വി-ട്വിൻ എൻജിനാണ് എലൈറ്റിന്‍റെ കരുത്ത്.

7 ഇഞ്ച് ടച്ച് സ്ക്രീൻ സിസ്റ്റം, ക്രൂയിസ് കൺട്രോൾ, റിമോട്ട് ലോക്കിങ് സാഡിൽബാഗ്, ലെതർ സീറ്റ്, കീലെസ് സ്റ്റാർട്ട് തുടങ്ങിയ ഫീച്ചറുകൾക്കൊപ്പം സുരക്ഷ ഉറപ്പാക്കാൻ എബിഎസും ഇടംതേടിയിട്ടുണ്ട്. മുൻഭാഗത്ത് 119 എംഎം ടെലസ്‌കോപ്പിക് ഫോര്‍ക്കും പിന്നില്‍ 114 എംഎം സിംഗിള്‍ ഷോക്കുമാണ് സസ്‌പെന്‍ഷന്‍ ഒരുക്കുന്നത്. ഡിസ്ക് ബ്രേക്കുകളാണ് ഈ ബൈക്കിൽ ബ്രേക്കിങ് സാധ്യമാക്കുന്നത്.

ഇന്ത്യയിൽ ഏതാണ്ട് 35-40 ലക്ഷത്തിന് ഇടയിൽ വില പ്രതീക്ഷിക്കാം. ഹാർലിയുടെ റോഡ് ഗ്ലൈഡ് സ്പെഷ്യലായിരിക്കും നിരത്തിലെ മുഖ്യ എതിരാളി.