കോമ്പസിന് ലിമിറ്റഡ് പ്ലസ് എഡിഷനുമായി ജീപ്പ്

ദീപാവലി ഉത്സവ സീസൺ ലക്ഷ്യമിട്ട് കോമ്പസിന്‍റെ പുത്തൻ വകഭേദത്തെ ഇന്ത്യയിൽ അവതരിപ്പിക്കാൻ ഒരുങ്ങുകയാണ് ജീപ്പ്. 'കോമ്പസ് ലിമിറ്റഡ് പ്ലസ്' എന്നപേരിൽ ഓക്ടോബർ 19 നാണ് വാഹനം പുറത്തിറങ്ങുക. കോമ്പസിന്‍റെ ഉയർന്ന വകഭേദത്തിലാണ് ലിമിറ്റഡ് പ്ലസ് എഡിഷനെ ഒരുക്കിയിരിക്കുന്നത്. ഡൽഹി എക്സ്ഷോറൂം 21.94 ലക്ഷം രൂപയാണ് ജീപ്പ് കോമ്പസിന്‍റെ വില. നിലവിലെ മോഡലിനേക്കാൾ ഒന്നര ലക്ഷം രൂപ അധിക വിലയിലായിരിക്കും പുതിയ കോമ്പസ് ലിമിറ്റഡ് പ്ലസ് വിപണിയിലെത്തുക.

8.4 ഇഞ്ച് ടച്ച് സ്ക്രീൻ, പനരോമിക് സൺറൂഫ്, 18 ഇഞ്ച് അലോയ് വീൽ എന്നിവയാണ് ഈ ലിമിറ്റഡ് പ്ലസ് എഡിഷന്‍റെ പ്രധാന സവിശേഷതകൾ. സുരക്ഷ ഉറപ്പു വരുത്തുവാൻ ഡ്യുവൽ ഫ്രണ്ട് എയർബാഗുകൾ, സൈഡ്, കർട്ടൺ എയർബാഗുകൾ, റെയിൻ സെൻസിങ് വൈപ്പറുകൾ എന്നീ ഫീച്ചറുകളും ഉൾപ്പെടുത്തിയിട്ടുണ്ട്.

2.0 ലിറ്റർ ഡീസൽ എൻജിൻ, 1.4 ലിറ്റർ ടർബോ പെട്രോൾ എന്നീ എൻജിനുകളാണ് ജീപ്പ് കോമ്പസിന് കരുത്തേകുന്നത്. 163 ബിഎച്ച്പിയും 250 എൻഎം ടോർക്കുമാണ് 2.0 ലിറ്റർ ഡീസൽ എൻജിൻ ഉല്പാദിപ്പിക്കുന്നത്. അതേസമയം 173 ബിഎച്ച്പിയും 350 എൻഎം ടോർക്കും ഉല്പാദിപ്പിക്കുന്നതാണ് ഇതിലെ 1.4 ലിറ്റർ പെട്രോൾ എൻജിൻ. 6 സ്പീഡ് മാനുവൽ, ഓട്ടോമാറ്റിക് ട്രാൻസ്മിഷനാണ് എൻജിനുകളിൽ ഉൾക്കൊള്ളിച്ചിരിക്കുന്നത്.