JK Tyres India: തൊഴിലിടത്തിലെ സുരക്ഷയ്ക്ക് ജെകെ ടയേഴ്സിന്‌ അന്താരാഷ്ട്ര അംഗീകാരം!

കൃകൃഇന്ത്യൻ ടയർ ബ്രാൻഡുകൾക്കിടയിലെ അതികായരാണ്‌ ജെകെ ടയേഴ്സ്. ടൂ വീലർ, ഫോർ വീലർ, കമേർഷ്യൽ എന്നിങ്ങനെ എല്ലാത്തരം വാഹനങ്ങൾക്കുമുള്ള റേഡിയൽ ടയറുകൾ ജെ കെയിൽ നിന്നും പുറത്തിറങ്ങുന്നുണ്ട്. ലോകത്തിലെ തന്നെ ഏറ്റവും മികച്ച ടയർ ബ്രാൻഡുകളിലൊന്നായ ജെകെയെ തേടി ഒരു പുത്തൻ അംഗീകാരം.കൂടി എത്തിയിരിക്കുകയാണ്‌ ഇന്ന്.

‘ബ്രിട്ടീഷ് സേഫ്റ്റി കൗൺസിൽ' ഈയിടെ നടത്തിയ ഓഡിറ്റിൽ ജെകെ ടയേഴ്സ് ആൻഡ് ഇൻഡസ്ട്രീസ് സുരക്ഷിതമായ തൊഴിലിടങ്ങൾ ഒരുക്കുന്നതിൽ 5 സ്റ്റാർ റേറ്റിങ്ങ് കരസ്ഥമാക്കി . ഇവരുടെ ചെന്നൈ, മൈസൂർ, ബന്മൂർ, ലക്സർ എന്നിവിടങ്ങളിലെ നിർമ്മാണശാലകൾക്കാണ്‌ അംഗീകാരം.

ജെകെയുടെ തൊഴിലാളികളുടെ സുരക്ഷയും ആരോഗ്യവും സംബന്ധിച്ച പോളിസികളെയും തൊഴിലിടത്തിലെ സുരക്ഷാ സംവിധാനങ്ങളെയും പറ്റി സമഗ്രമായ പഠനങ്ങളും വിശദമായ പരിശോധനകളും മറ്റും ബ്രിട്ടീഷ് കൗൺസിൽ ഈയിടെ നടത്തിയിരുന്നു. തുടർന്ന് ഔദ്യോഗിക രേഖകളുടെ സൂക്ഷ്മ പരിശോധന, അധികൃതരുമായുള്ള സുദീർഘ ചർച്ചകൾ, തൊഴിലാളികളിൽ നിന്നുമുള്ള വിശദമായ അഭിപ്രായശേഖരണം, എന്നിവയും അരങ്ങേറുകയുണ്ടായി.

അങ്ങനെ കമ്പനിയുടെ ആകെ പെർഫോമൻസിനെ തൊഴിലാളികളുടെ ആരോഗ്യവും തൊഴിലിടത്തിലെ സുരക്ഷയും അടക്കം അറുപതോളം ഘടകങ്ങളുടെ അടിസ്ഥാനത്തിൽ വിലയിരുത്തിയാണ്‌ ഒടുവിൽ 5 സ്റ്റാർ റേറ്റിംഗ് എന്ന വിധിയിൽ എത്തിച്ചേർന്നത്.

തങ്ങളിൽ നിന്നും തൊഴിലിടത്തിലെ സുരക്ഷയ്ക്ക് ഒരു അംഗീകാരം ലഭിക്കുക, അതും 5 സ്റ്റാർ റേറ്റിംഗ് തന്നെ ലഭിക്കുക എന്നത് മഹത്തരമായ കാര്യമാണെന്നും തൊഴിലിനോടെന്ന പോലെ തൊഴിലാളികളോടും നിസീമമായ പ്രതിബദ്ധതയുള്ള ഒരു സ്ഥാപനത്തിനാൽ മാത്രമേ ഇതു സാധ്യമാവുകയുള്ളുവെന്നും ബ്രിട്ടീഷ് സേഫ്റ്റി കൗൺസിലിന്റെ പോളിസി ആൻഡ് ടെക്ക്നിക്കൽ സർവീസസ് മേധാവി ഡേവിഡ് പാർ അഭിപ്രായപ്പെട്ടു.

തൊഴിലിടങ്ങളിൽ വച്ച് തൊഴിലാളികൾക്ക് പരിക്കോ മറ്റു ആസ്വാസ്ഥ്യങ്ങളോ ഉണ്ടാവരുതെന്ന ഉദ്ദേശ്യത്തോടെ രൂപീകൃതമായ സംഘടനയാണ്‌ ബ്രിട്ടീഷ് സേഫ്റ്റി കൗൺസിൽ. 1957ൽ രൂപം കൊണ്ട സമിതി തൊഴിലാളികളുടെ സുരക്ഷയ്ക്കും ക്ഷേമത്തിനുമായി ഇന്നും അശ്രാന്തം പ്രയത്നിക്കുന്നു. ഏതാണ്ട് അറുപതോളം രാജ്യങ്ങളിൽ നിന്നുള്ള അംഗങ്ങളുണ്ട് ബ്രിട്ടീഷ് സുരക്ഷാ സമിതിയിൽ.

അംഗീകാരലബ്ധിയിൽ അത്യന്തം അഭിമാനിക്കുകയാണ്‌ ജെ കെ ടയേഴ്സും. ലോകോത്തര നിലവാരമുള്ള തങ്ങളുടെ നിർമ്മാണശാലകളിൽ എല്ലാം തന്നെ തൊഴിലാളികൾക്ക് വിട്ടുവീഴ്ചകൾ ഇല്ലാത്ത സുരക്ഷ ഒരുക്കാൻ ജെകെ ടയേഴ്സ് പ്രതിജ്ഞാബദ്ധരായതിന്റെ ഫലമാണ്‌ ഈ വലിയ നേട്ടമെന്നും ഈ അംഗീകാരലബ്ധി കൂടുതൽ മികച്ച സുരക്ഷയോടു കൂടിയ തൊഴിലിടങ്ങൾ ഒരുക്കാൻ തങ്ങളെ കാര്യമായി പ്രേരിപ്പിക്കുന്നുവെന്നും ജെ കെ ടയേഴ്സ് ഇന്ത്യ ഓപ്പറേഷൻസ് മേധാവി രാജീവ് പ്രസാദ് മാധ്യമങ്ങളോടു പറഞ്ഞു.

ആറ്‌ ഭൂഖണ്ഡങ്ങളിലായി ഏതാണ്ട് നൂറോളം രാജ്യങ്ങളിൽ ജെകെ ടയറുകൾ ഇന്ന് വില്ക്കപ്പെടുന്നുണ്ട്. ഇന്ത്യയിൽ ഒൻപതും മെക്സികോയിൽ മൂന്നുമായി ആകെ 12 നിർമ്മാണശാലകളാണ്‌ ജെകെയ്ക്കുള്ളത്. ഇവയുടെ ആകെ പ്രതിവർഷ ഉത്പാദനക്ഷമതാവട്ടെ ഏതാണ്ട് 35 മില്യണും !

ഇവർ തന്നെയാണ്‌ ഇന്ത്യയ്ക്ക് റേഡിയൽ ടയറുകളെ ആദ്യമായി പരിചയപ്പെടുത്തിയതും. 1977ലായിരുന്നു ജെകെ ഇവിടേക്ക് ആദ്യ റേഡിയൽ ടയറിനെ എത്തിച്ചത്. ഇന്ന് ട്രക്ക്, ബസ് റേഡിയൽ ടയറുകളുടെ നിർമ്മാണത്തിലും വില്പനയിലും അഗ്രഗണ്യരാണ്‌ ജെ കെ .