കാവസാക്കി നിഞ്ച 650 ബ്ലൂ വേരിയന്‍റ് അവതരിച്ചു

നീല നിറത്തിലുള്ള പുതിയ കാവസാക്കി നിഞ്ച 650 വിപണിയിലവതരിച്ചു. 5.33 ലക്ഷം രൂപയാണ് പുതിയ നിഞ്ച 650യുടെ ഡൽഹി എക്സ്ഷോറൂം വില. നിലവിലെ ബ്ലാക്ക് നിറത്തിലുള്ള നിഞ്ച 650 യെ പിൻവലിച്ചാണ് പുതിയ നീല നിറത്തിലുള്ള നിഞ്ച 650യുമായി കാവസാക്കി എത്തിയിരിക്കുന്നത്. കഴിഞ്ഞവർഷമാണ് ഈ പുത്തൻ തലമുറ നിഞ്ച 650യെ കമ്പനി പുറത്തിറക്കിയത്. നിഞ്ച 650 യുടെ ചുരുക്കം ചില യൂണിറ്റുകളെ മാത്രമെ കാവസാക്കി വിപണിയിൽ എത്തിച്ചിരുന്നുള്ളൂ.

ഗ്രീൻ, ബ്ലാക്ക് നിറങ്ങളിലായിരുന്നു നിഞ്ച 650 ലഭ്യമായിരുന്നത്. ഇപ്പോഴിതാ പുതിയ നീല നിറവും അവതരിപ്പിച്ചിരിക്കുകയാണ് കാവസാക്കി. പുത്തൻ നിറത്തിൽ അവതരിച്ചു എന്നല്ലാതെ കാര്യമായ മാറ്റങ്ങളൊന്നും ഈ പ്രീമിയം മോട്ടോർസൈക്കിളിൽ വരുത്തിയിട്ടില്ല. 67.2 ബിഎച്ച്പിയും 65.7എൻഎം ടോർക്കുമാണ് 649സിസി പാരലൽ ട്വിൻ എൻജിനാണ് നിഞ്ച 650 ബൈക്കിന് കരുത്തേകുന്നത്.

പുതിയ ഭാരം കുറഞ്ഞ ഫ്രെയിമിലാണ് നിഞ്ച 650 ഒരുങ്ങിയിരിക്കുന്നത്. മുൻമോഡലുകളെക്കാൾ 22 കിലോഗ്രാം ഭാരക്കുറവുണ്ട് പുതിയ നിഞ്ച 650 ക്ക്. ഭാരക്കുറവായതിനാൽ മികവുറ്റ പെർഫോമൻസ് കാഴ്ചവെക്കുമെന്നാണ് കമ്പനി അവകാശപ്പെടുന്നത്. 140 mm ഗ്രൗണ്ട് ക്ലിയറന്‍സും, 410 mm വീല്‍ബേസും, 790 mm സീറ്റ് ഉയരവുമാണ് നിഞ്ച 650 യ്ക്കുള്ളത്. കൂടാതെ ഇലക്ട്രിക് സ്റ്റാര്‍ട്ട്, ഡിജിറ്റൽ ഈഗ്നീഷൻ, സുഗമമായ ഡൗണ്‍ഷിഫ്റ്റുകള്‍ക്ക് വേണ്ടി സ്ലിപ്പര്‍ ക്ലച്ച് എന്നീ ഫീച്ചറുകൾ പുത്തൻ നിഞ്ച 650 ൽ കാവസാക്കി ഒരുക്കിയിട്ടുണ്ട്.

ബ്രേക്കിങ് സാധ്യമാക്കാൻ മുൻചക്രത്തിൽ 300 mm ഡ്യൂവല്‍ ഡിസ്‌കും പിന്നിൽ 220 mm ഡിസ്‌കും നൽകിയിട്ടുണ്ട്. സസ്പെന്‍ഷന്‍ ദൗത്യം നിര്‍വഹിക്കുന്നതിനായി മുന്നിൽ 41 mm ടെലിസ്‌കോപിക് ഫോര്‍ക്കുകളും പിന്നിൽ അഡ്ജസ്റ്റബിള്‍ പ്രീലോഡോടെയുള്ള ഹൊറിസോണ്ടല്‍ ബാക്ക്-ലിങ്ക് യൂണിറ്റുമാണ് നൽകിയിരിക്കുന്നത്. ബെനലി ടിഎന്‍ടി 600i, ഹോണ്ട CBR650F എന്നീ ബൈക്കുകളായിരിക്കും നിഞ്ച 650ക്ക് മുഖ്യ എതിരാളികളാവുക.