Lamborghini Urus: രണ്ടാം ലംബോർഗിനി ഉറുസ് കേരളത്തിലേക്ക്, ഉടമ മോഹൻലാൽ അല്ല

ഏതാനും ദിവസങ്ങൾക്ക് മുൻപാണ് ഇറ്റാലിയൻ വാഹന നിർമാതാക്കളായ ലംബോർഗിനിയുടെ എസ്‌യുവി ഉറുസിന്റെ കേരളത്തിലെ ആദ്യ മോഡൽ മലബാറിലെത്തിയത്. കോഴിക്കോട് സ്വദേശിയായ അബ്ദുൾ അസീസ് പുല്ലാളൂരാണ് കേരളത്തിലെ ആദ്യ ലംബോർഗിനി ഉറുസിന്റെ ഉടമ. തുടർന്ന് നടൻ മോഹൻലാൽ ഉറുസ് ടെസ്റ്റ് ഡ്രൈവ് ചെയ്യുന്നതിന്റെ ചിത്രങ്ങൾ വൈറൽ ആയതോടെ കേരളത്തിലെ രണ്ടാമത് ഉറുസ് ഉടമ മലയാളത്തിന്റെ മഹാനടനാവും എന്നൊരു ശ്രുതി പരന്നിരുന്നു. ഊഹാപോഹങ്ങൾക്ക് വിരാമമിട്ട് കേരളത്തിലേക്കുള്ള രണ്ടാമത്തെ ഉറുസിന്റെയും വില്പനയും ബെംഗളൂരു ഡീലർഷിപ്പിൽ നടന്നു. മോഹൻലാൽ അല്ല ഉടമ.

കോലഞ്ചേരി ആസ്ഥാനമായി പ്രവർത്തിക്കുന്ന സിന്തൈറ്റ് ഇൻഡസ്ട്രീസ് ലിമിറ്റഡ് മാനേജിങ് ഡയറക്ടർ, ഡോക്ടർ വിജു ജേക്കബ് ആണ് കേരളത്തിലെ രണ്ടാമത് ലംബോർഗിനി ഉറുസിന്റെ ഉടമ. കറുപ്പ് നിറത്തിലുള്ള ഉറുസാണ് വിജു ജേക്കബ് തിരഞ്ഞെടുത്തത്. 3 കോടിയോളം രൂപയാണ് ഉറുസിന്റെ എക്‌സ്-ഷോറൂം വിലവരുന്ന ഉറുസിനെ മിക്കവാറും എറണാകുളം ജില്ലയിലുള്ള ഒരു ആർടിഓയിലാവും രജിസ്റ്റർ ചെയ്യുക. കേരളത്തിലെ ആദ്യ ഉറുസ്രജിസ്റ്റർ ചെയ്യാൻ ഏകദേശം 75 ലക്ഷത്തോളം രൂപയാണ് അബ്ദുൾ അസീസ് ചിലവാക്കിയത്. ഏകദേശം ഇത്രത്തോളം രൂപ തന്നെ വിജു ജേക്കബും തന്റെ പുത്തൻ ഉറുസ് രജിസ്റ്റർ ചെയ്യാൻ ചിലവഴിക്കേണ്ടി വരും. കെഎൽ 11 ബിആർ 1 എന്ന ഫാൻസി നമ്പറാണ് കേരളത്തിലെ ആദ്യ ഉറുസിന്. വിജു ജേക്കബ് തന്റെ ഉറുസിന് ഫാൻസി നമ്പർ തിരഞ്ഞെടുക്കുമോ എന്ന് കണ്ടറിയാം.

ലംബോർഗിനി ഉറുസ്

ലംബോർഗിനി എസ്‌യുവി ചുമ്മാ ഒരു എസ്‌യുവി ഒന്നും അല്ല. ലോകത്തിലെ ആദ്യത്തെ സൂപ്പർ സ്പോർട്സ് യൂട്ടിലിറ്റി വെഹിക്കിൾ (SSUV) എന്ന വിശേഷണമാണ് ഉറുസ് എത്തിയിരിക്കുന്നത്. അതായത് സാധാരണ എസ്യുവികളെക്കാളും മേലെ. 6000 ആർപിഎമ്മിൽ 650 ബിഎച്ച്പി കരുത്തും 2250 ആർപിഎമ്മിൽ 850 ന്യൂട്ടൺ മീറ്റർ പരമാവധി ടോർക്കും പുറപ്പെടുവിക്കുന്ന 4.0 ലിറ്റർ വി8 ട്വിൻ-ടർബോ പെട്രോൾ എൻജിനാണ് ഉറുസിന്റെ ഹൃദയം. ഈ എൻജിൻ ZF 8-സ്പീഡ് ഓട്ടോമാറ്റിക് ഗിയർബോക്‌സുമായി ബന്ധിപ്പിച്ചിരിക്കുന്നു. പൂജ്യത്തിൽ നിന്ന് 100 കിലോമീറ്റർ വേഗത്തിലെത്താൻ വെറും 3.6 സെക്കൻഡുകൾ മതി ഉറുസിന്. അതായത്, എതിരാളികളിൽ പ്രധാനിയായ ബെന്റ്‌ലീയുടെ ബെൻടൈഗയെ മറികടന്നു ലോകത്തിലെ ഏറ്റവും വേഗതയുള്ള എസ്‌യുവി ആണ് ഉറുസ്. 305 കിലോമീറ്ററോളമാണ്‌ ഏറ്റവും കൂടിയ വേഗത. എസ്‌യുവിയുടെ രൂപവും സൂപ്പർകാറിന്റെ സ്വഭാവവും, ഇതാണ് സൂപ്പർ സ്പോർട്സ് യൂട്ടിലിറ്റി വെഹിക്കിൾ എന്നതുകൊണ്ട് ലംബോർഗിനി ഉദ്ദേശിച്ചത്.

Also read: ലംബോർഗിനി ഉറുസ് മോഹൻലാൽ സ്വന്തമാക്കുമോ? ടെസ്റ്റ് ഡ്രൈവ് ചിത്രങ്ങൾ വൈറൽ

ഒരു പ്രീമിയം വാഹനം ആണെന്ന് കരുതി ഓഫ്-റോഡ് മികവിൽ ഒട്ടും പിന്നിലല്ല ലംബോർഗിനി ഉറുസ്. സ്ട്രാഡ, സ്പോർട്ട്, കോഴ്സ, നീവ്, ടെറ എന്നിങ്ങനെ ആറ്‌ വ്യത്യസ്ത ഡ്രൈവ് മോഡുകലുള്ള ഉറുസ് ഏതു ദുർഘടം പിടിച്ച പാതയും താണ്ടാൻ ശേഷിയുള്ള വാഹനമാണ്. വിവിധ മോഡുകളിലെ ടെറ ഓഫ്‌റോഡ് യാത്രകൾക്കായി പ്രത്യേകം തയ്യാറാക്കിയതാണ്‌. അഡാപ്റ്റീവ് എയർ സസ്പെൻഷനുമുള്ള ഉറുസിന്റെ ഉയരം 158 എംഎം മുതൽ 248 എംഎം വരെ ക്രമീകരിക്കാവുന്നതുമാണ്. ഓഫ് റോഡ് സമയത് വളരെ ഉപകാരപ്രദമാണ് ഈ സംവിധാനം.

ഉറുസിന് മികച്ച തുടക്കം

2018 ജനുവരിയിലാണ് ലംബോർഗിനി ഉറുസിനെ ഇന്ത്യയിൽ വില്പനക്കെത്തിച്ചത്. ഗംഭീര വരവേൽപ്പാണ് ലംബോർഗിനി എസ്‌യുവിയ്ക്ക് ലഭിച്ചത്. ഇതിനകം 50 യൂണിറ്റിന് മുകളിൽ ഉറുസുകളാണ് ലംബോർഗിനി ഇന്ത്യയിൽ വിറ്റഴിച്ചത്. ആദ്യഘട്ടത്തിൽ ലംബോർഗിനി ഇന്ത്യയ്ക്കായി നീക്കിവച്ചിരുന്ന എല്ലാ ഉറുസ് യൂണിറ്റുകളും വിറ്റഴിഞ്ഞു. 70 ശതമാനത്തോളം ഉറുസ് ഉപഭോക്താക്കളും ആദ്യമായി ഒരു ലംബോർഗിനി വാഹനം സ്വന്തമാക്കുന്നവരാണെന്ന് ലംബോർഗിനി ഇന്ത്യ മേധാവി ശരദ് അഗർവാൾ അടിവരയിടുന്നു. ഇന്ത്യയിൽ മാത്രമല്ല ആഗോളവിപണയിലും ഉറുസ് ഹിറ്റ് ആണ്. വില്പനക്കെത്തി ആദ്യ ആറു മാസം കൊണ്ട് ഏകദേശം 2,700 യൂണിറ്റ് ഉറുസുകളാണ് ലംബോർഗിനി വിറ്റഴിച്ചത്. അതായത് ലംബോർഗിനി എന്ന വാഹനനിർമാതാവ് ഇതുവരെ വിറ്റഴിച്ചിട്ടുള്ള വാഹനങ്ങളിൽ പാതിയും ഉറുസാണ്.