കിയയുടെ സ്റ്റോണിക്, ഗ്രാൻഡ് കാർണിവൽ കാറുകൾ ഇന്ത്യയിലേക്ക്

ഇന്ത്യയിൽ കാലുറപ്പിക്കാനുള്ള ശ്രമത്തിലാണ് കൊറിയൻ നിർമാതാക്കളായ കിയ. ഇക്കഴിഞ്ഞ ഡൽഹി ഓട്ടോഎക്സ്പോയിൽ കിയ തങ്ങളുടെ പുത്തൻ കാറുകളെ അവതരിപ്പിച്ചിരുന്നു. അതിൽ പ്രധാനികളായിരുന്നു സ്പോർട് യൂട്ടിലിറ്റി വാഹനമായ സ്റ്റോണിക്കും മൾട്ടി പർപ്പസ് ശ്രേണിയിലെ ഗ്രാൻഡ് കാർണിവലും. ഈ രണ്ട് മോഡലുകളും ഉടൻ വിപണി പിടിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.



അടുത്ത വർഷമാദ്യത്തോടെ എസ്പി കൺസ്പെറ്റ് എസ്‍യുവി ഇന്ത്യയിലവതരിക്കും. അതിന് പിന്നാലെയായിരിക്കും ഈ രണ്ട് മോഡലുകളും അവതരിക്കുക. ഇതിനുപുറമെ സെഡാൻ, ഹാച്ച്ബാക്ക് ശ്രേണിയിലും കാറുകളെ അവതരിപ്പിക്കാൻ കിയ തയ്യാറെടുക്കുന്നുണ്ട്. ഇന്ത്യയിലെ സാന്നിധ്യം ശക്തപ്പെടുത്താനാണ് കിയയുടെ നീക്കം.



യൂറോപ്യൻ വിപണികളിൽ നാലുമീറ്ററിലധികം നീളമാണ് സ്റ്റോണിക്കിനുള്ളത്. ഇന്ത്യയിൽ നീളംകുറച്ചയായിരിക്കും സ്റ്റോണിക്ക് എത്തുക. വിറ്റാര ബ്രെസ, ഇക്കോസ്പോർട്, നെക്സോൺ എന്നിവയ്ക്കായിരിക്കും സ്റ്റോണിക്ക് മുഖ്യ എതിരാളികളാവുക. ഏഴ്, എട്ട് സീറ്റുകളിലാണ് ഗ്രാൻഡ് കാർണിവൽ നിലവിൽ നിരത്തിലുള്ളത്. വേണമെങ്കിൽ 11 സീറ്റുകൾ ആകാനുള്ള സ്ഥല സൗകര്യവും ഈ വാഹനത്തിലുണ്ട്. ഇന്ത്യയിൽ ഇന്നോവ ക്രിസ്റ്റയായിരിക്കും ഗ്രാൻഡ് കാർണിവലിന് മുഖ്യ എതിരാളിയാവുക.