എസ്‍യുവി ലോകത്തേക്ക് ലംബോർഗിനിയുടെ 'ഉറൂസ്'

25 വർഷങ്ങൾക്ക് ശേഷം വീണ്ടുമൊരു എസ്‍യുവിയെ അവതരിപ്പിച്ച് ലംബോർഗിനി. ഉറൂസ് എന്ന പേരിലാണ് ഇറ്റാലിയൻ സൂപ്പർ കാർ നിർമാതാവായ ലംബോർഗിനി പുത്തൻ എസ്‍യുവിയെ അവതരിപ്പിച്ചിരിക്കുന്നത്. LM 002 വിന് ശേഷമുള്ള രണ്ടാമത്തെ എസ്‍യുവിയാണ് ഉറൂസ്. എസ്‌യുവി ലോകത്തേക്കുള്ള ലംബോര്‍ഗിനിയുടെ രണ്ടാം വരവിനെ കാർ പ്രേമികൾ വളരെ ആകാംക്ഷയോടെയാണ് ഉറ്റുനോക്കുന്നത്.

4.0 ലിറ്റര്‍ ട്വിന്‍-ടര്‍ബ്ബോ V8 എൻജിനാണ് ഉറൂസിന് കരുത്തേകുന്നത്. ടർബ്ബോചാർജ്ഡ് എൻജിനിൽ എത്തുന്ന ലംബോർഗിനിയുടെ ആദ്യ മോഡൽ കൂടിയാണ് ഉറൂസ്. 641 ബിഎച്ച്പിയും 850എൻഎം ടോർക്കുമാണ് ഈ എൻജിനുല്പാദിപ്പിക്കുന്നത്. 8 സ്പീഡ് ഓട്ടോമാറ്റിക് ഗിയർബോക്സാണ് എൻജിനിൽ ഇടംതേടിയിരിക്കുന്നത്.

മണിക്കൂറില്‍ 306 കിലോമീറ്ററാണ് ഉറൂസിന്‍റെ ഉയർന്ന വേഗത. നിശ്ചലാവസ്ഥയിൽ നിന്നും നൂറ് കിലോമീറ്റർ വേഗത കൈവരിക്കാൻ കേവലം 3.6 സെക്കന്‍ഡുകള്‍ മതിയെന്നാണ് കമ്പനി അവകാശപ്പെടുന്നത്. ഓഫ് റോഡിങ് ലക്ഷ്യമിട്ട് സാബിയ, ടെറ, നിവി എന്നീ മൂന്ന് ഡ്രൈവിംഗ് മോഡുകളും ഉറൂസിൽ ഇടംപിടിച്ചിട്ടുണ്ട്.

ഫോര്‍-വീല്‍ സ്റ്റീയറിംഗ്, അഡാപ്റ്റീവ് എയര്‍ സസ്‌പെന്‍ഷന്‍, ആക്ടീവ് റോള്‍ സ്റ്റബിലൈസേഷന്‍, ആക്ടീവ് ടോര്‍ഖ് വെക്ടറിങ്ങ് തുടങ്ങിയ സാങ്കേതികതകളും ഉറൂസിൽ ഒരുക്കിയിട്ടുണ്ട്. വലുപ്പമേറിയ ഫ്രണ്ട് ഗ്രിൽ, വലിയ എയർ ഇൻടേക്കുകൾ, ഫ്രണ്ട് സ്പ്ലിറ്റര്‍ എന്നിവയാണ് ഉറൂസിന്‍റെ ഡിസൈൻ സവിശേഷതകൾ.