നെക്സോൺ ക്രേസ് ലിമിറ്റഡ് എഡിഷനുമായി ടാറ്റ

ക്രേസ് എന്ന പേരിൽ നെക്സോണിന്‍റെ ലിമിറ്റഡ് എഡിഷനെ പുറത്തിറക്കി ടാറ്റ. നെക്സോൺ വിപണിയിലെത്തി ഒരു വർഷം തികയുന്നതിന്‍റെ ഭാഗമായിട്ടാണ് പുതിയ ലിമിറ്റഡ് എഡിഷനായ ക്രേസിനെ വിപണിയിലെത്തിച്ചിരിക്കുന്നത്. ഡൽഹി എക്സ്ഷോറൂം 7.14 ലക്ഷം രൂപയാണ് നെക്സോൺ ക്രേസിന്‍റെ വില. ഡീസൽ, പെട്രോൾ വകഭേദങ്ങളിലാണ് ക്രേസ് എത്തിയിരിക്കുന്നത്. പുതിയ ഡിസൈൻ ശൈലിയാണ് ടാറ്റ നെക്സോൺ ക്രേസിൽ പിന്തുടർന്നിരിക്കുന്നത്.

ട്രോംസോ ബ്ലാക്-സോണിക് സിൽവർ നിറങ്ങൾ ഇടകലർന്ന ക്രേസിന് ബ്ലാക്ക് നിറത്തിലുള്ള റൂഫ് ആണ് നൽകിയിരിക്കുന്നത്. മിററുകളിലും മുൻഗ്രില്ലിലും വീലുകളിലും നൽകിയിരിക്കുന്ന നിയോൺ ഗ്രീൻ നിറം വാഹനത്തിന്‍റെ ചാരുത വർധിപ്പിക്കുന്നു. അകത്തളത്തിലും ശ്രദ്ധേയമായ മാറ്റങ്ങളാണ് കൈവരിച്ചിരിക്കുന്നത്. പിയാനോ ബ്ലാക്ക് നിറത്തിലുള്ള ഡാഷ്ബോർഡ്, നിയോൺ ഗ്രീൻ നിറത്തിലുള്ള ഏസി വെന്‍റുകൾ എന്നിവ അകത്തളത്തിന് പ്രീമിയം ഫീൽ കൈവരുത്തുന്നു.

സീറ്റിന് അരികിലായി നൽകിയിരിക്കുന്ന നിയോൺ ഗ്രീൻ നിറവും ശ്രദ്ധേയമായ മറ്റൊരു സവിശേഷതയാണ്. 1.2 ലിറ്റർ റെവട്രോൺ പെട്രോൾ, 1.5 ലിറ്റർ റെവടോർഖ് ഡീസൽ എന്നീ എൻജിനുകളാണ് നെക്സോൺ ക്രേസിന്‍റെ കരുത്ത്. 108 ബിഎച്ച്പിയും 170 എൻഎം ടോർക്കുമാണ് പെട്രോൾ എൻജിൻ ഉല്പാദിപ്പിക്കുന്നത്. അതേസമയം 108 ബിഎച്ച്പിയും 260 എൻഎം ടോർക്കുമാണ് ഡീസൽ എൻജിൻ ഉല്പാദിപ്പിക്കുന്നത്. ചക്രങ്ങളിലേക്ക് വീര്യമെത്തിക്കാൻ ഇരു എൻജിനുകളിലും 6 സ്പീഡ് മാനുവൽ ഗിയോർബോക്സും ഇടംതേടിയിട്ടുണ്ട്.