ഇന്ത്യൻ നിർമ്മിത ജാഗ്വർ എഫ് പെയ്സ് വിപണിയിൽ

പ്രാദേശികമായി നിർമ്മിച്ച പെർഫോമൻസ് എസ്‍യുവി എഫ്-പെയ്സിനെ ജാഗ്വർ വിപണിയിലെത്തിച്ചു. 60.02 ലക്ഷം പ്രൈസ് ടാഗിലാണ് 2018 മോഡൽ അവതരിച്ചിരിക്കുന്നത്. ഇന്ത്യയിൽ ഇതുവരെയായി ഇറക്കുമതി ചെയ്യപ്പെട്ടിരുന്ന എഫ് പെയ്സിനെ അപേക്ഷിച്ച് 16 ലക്ഷത്തോളം വിലക്കുറവിലാണ് ഇന്ത്യൻ നിർമ്മിത എഫ് പെയ്സ് അവതരിച്ചത്. പൂനൈയിലുള്ള പ്ലാന്‍റിൽ വച്ചാണ് പുതിയ എഫ് പെയ്സിന്‍റെ നിർമ്മാണം നടത്തിയിരിക്കുന്നത്.



എഫ്-പെയ്സിന്‍റെ 20d AWD പ്രെസ്റ്റിജ് പതിപ്പിന്‍റെ നിർമാണമാണ് ജാഗ്വർ പ്രാദേശികമായി ആരംഭിച്ചിരിക്കുന്നത്. 2.0 ലിറ്റർ ടർബോചാർജ്ഡ് ഫോർ സിലിണ്ടർ ഇൻജീനിയം ഡീസൽ എൻജിനാണ് ഈ മോഡലിന് കരുത്തേകുന്നത്. 179ബിഎച്ച്പിയും 430 എൻഎം ടോർക്കും സൃഷ്ടിക്കുന്ന ഈ എൻജിനിൽ 8 സ്പീഡ് ഓട്ടോമാറ്റിക് ഗിയർബോക്സും ഉൾക്കൊള്ളിച്ചിട്ടുണ്ട്.

എല്‍ഇഡി ഹെഡ്‌ലൈറ്റുകള്‍, ടെയില്‍ ലാമ്പുകള്‍, ഡ്രൈവ് കണ്‍ട്രോള്‍, 380V മെറീഡിയന്‍ സൗണ്ട് സിസ്റ്റം, 10.2 ഇഞ്ച് ടച്ച്‌സ്‌ക്രീന്‍, 12.3 ഇഞ്ച് ഇന്‍സ്ട്രമെന്‍റ് ഡിസ്‌പ്ലെ തുടങ്ങിയവാണ് പ്രധാന സവിശേഷതകൾ.