മുംബൈയിൽ ഇനി ഉബറിൻ്റെ എയ‍ര്‍ ടാക്‌സി; മണിക്കൂറിൽ 300കി.മീ വേഗം

മുംബൈ: പ്രശസ്ത ടാക്‌സി ഓണ്‍ലൈന്‍ കമ്പനിയായ ഉബറിൻ്റെ എയര്‍ ടാക്‌സി മുംബൈയില്‍ പറക്കാനൊരുങ്ങുന്നു. ഡ്രോൺ സർവീസിന് അംഗീകാരം നൽകിയെന്നും ഇത് സംബന്ധിച്ച റിപ്പോര്‍ട്ട് കേന്ദ്രത്തിന് സമർപ്പിച്ചതായും മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസിൻ്റെ ഓഫിസിലെ ഉന്നത ഉദ്യോഗസ്ഥൻ വ്യക്തമാക്കി. ഉബര്‍ എയര്‍ ടാക്സി സർവീസിൻ്റെ നടത്തിപ്പിന് കൂടുതൽ സ്ഥലം അനുവദിക്കണമെന്നും കേന്ദ്രത്തോട് ആവശ്യപ്പെട്ടിട്ടുണ്ടെന്നാണ് ലഭിക്കുന്ന വിവരം.

മുംബൈയിൽ ഇപ്പോൾ 200 മീറ്ററിൽ കൂടുതൽ ഉയരമുള്ള എല്ലാ കെട്ടിടങ്ങളിലും ഹെലിപാഡോ ചെറിയ വിമാനം ഇറങ്ങാനുള്ള സൗകര്യമോ ഒരുക്കാൻ അനുവദിക്കുന്നുണ്ട്. മുംബൈയുടെ ഏറ്റവും പുതിയ ഡവലപ്മെൻ്റ് പ്ലാൻ 2034 പ്രകാരമാണിത്. 2020 ഓടെ പരീക്ഷണ അടിസ്ഥാനത്തിലും 2023ല്‍ വാണിജ്യ അടിസ്ഥാനത്തിലും എയര്‍ ടാക്സി സേവനങ്ങള്‍ തുടങ്ങാനാകുമെന്നാണ് കമ്പനിയുടെ പ്രതീക്ഷ.

എയര്‍ ടാക്സി പദ്ധതിക്ക് കേന്ദ്ര സർക്കാർ അംഗീകാരം നൽകി. മുംബൈയിലെ അത്യാവശ്യ യാത്രക്കാർക്ക് ഈ സേവനം പ്രയോജനമാകുമെന്ന് സര്‍ക്കാര്‍ വൃത്തങ്ങള്‍ കരുതുന്നു. ലോകത്തിലെ തന്നെ ഏറ്റവും കൂടുതൽ ഗതാഗതക്കുരുക്കുള്ള നഗരങ്ങളിലൊന്നാണ് മുംബൈ.

എയര്‍ ടാക്സിയുടെ വിപണി സാധ്യതയുള്ളതായി ആദ്യം പരിഗണിക്കുന്ന അഞ്ചു രാജ്യങ്ങളിൽ ഇന്ത്യ ഉള്ളതായി ഉബർ മുൻപ് അറിയിച്ചിരുന്നു. തുടര്‍ന്നാണ് ഇതിനു വേണ്ട അനുമതിയ്ക്കായി ഉബറിൻ്റെ അധികൃതര്‍ പ്രധാനമന്ത്രിയുമായി കൂടിക്കാഴ്ച നടത്തിയത്.

കുത്തനെ പറന്നുയരുകയും കുത്തനെ പറന്നിറങ്ങുകയും ചെയ്യുന്ന ഇലക്ട്രിക് വെര്‍ട്ടിക്കല്‍ ടേക് ഓഫ് ആന്‍ഡ് ലാന്‍ഡിങ് വെഹിക്കിൾ കണ്‍സപ്റ്റ് എന്ന ആശയത്തെ ഹെലികോപ്റ്ററിൻ്റെയും ഡ്രോണിൻ്റെയും സമന്വയമെന്ന് യൂബര്‍ അവകാശപ്പെടുന്നു. മുംബൈയിലെ സിറ്റി എയര്‍പോര്‍ട്ടില്‍ നിന്നും ചര്‍ച്ച് ഗേറ്റ് വരെ റോഡ് വഴി യാത്ര ചെയ്യാന്‍ 100 മിനിറ്റ് വേണ്ടി വരുമെന്നും വായുമാര്‍ഗമാണെങ്കില്‍ ഇതിന് കേവലം 10 മിനിറ്റ് മതിയെന്നും ഉബര്‍ ഏവിയേഷന്‍ പ്രോഗ്രാം ചീഫ് എക്‌സിക്യൂട്ടീവ് എറിക് അലിസണ്‍ പറഞ്ഞു.

എയര്‍ ടാക്‌സിയുടെ മാതൃക ആദ്യമായി അവതരിപ്പിച്ചത് ലൊസാഞ്ചലസില്‍ നടന്ന ഉബര്‍ എലിവേറ്റ് സമ്മിറ്റിലാണ്. ബാറ്ററിയിലാണ് എയര്‍ ടാക്‌സിയുടെ ഊര്‍ജ്ജം. മണിക്കൂറില്‍ 300 കിലോമീറ്ററിലേറെ വേഗതയിൽ സഞ്ചരിക്കാൻ ഈ വാഹനത്തിനു കഴിയുമെന്ന് കമ്പനി അവകാശവാദമുന്നയിക്കുന്നു. ഒരു തവണ ചാര്‍ജ്ജ് ചെയ്യുന്നതിലൂടെ ഏകദേശം 100 കിലോമീറ്ററോളം സഞ്ചരിക്കാൻ സാധിക്കും.

എയര്‍ ടാക്‌സികളുടെ ആദ്യ ഘട്ട സര്‍വ്വീസിൽ പൈലറ്റുമാരാണ് ടാക്സി നിയന്ത്രിക്കുക. പിന്നീട് സ്വയം പറക്കുന്ന രീതിയില്‍ ഇവ അവതരിപ്പിക്കുമെന്ന് കമ്പനി ചൂണ്ടിക്കാട്ടുന്നു. ഭാവിയിൽ ഓണ്‍ലൈനായി ടാക്‌സി ആവശ്യപ്പെടാവുന്ന സാഹചര്യം ഒരുക്കുമെന്നും കമ്പനി അവകാശപ്പെടുന്നു.