ഇന്നോവ ക്രിസ്റ്റയ്ക്ക് എതിരാളിയാകാൻ മഹീന്ദ്ര മരാസോ അവതരിച്ചു

ഇന്നോവ ക്രിസ്റ്റയ്ക്ക് കടുത്തൊരു എതിരാളിയെ നിരത്തിലിറക്കി മഹീന്ദ്ര ആൻഡ് മഹീന്ദ്ര. ഏറെനാളത്തെ കാത്തിരിപ്പിന് ശേഷം മഹീന്ദ്രയുടെ പുതിയ എംപിവി മരാസോ എത്തിയിരിക്കുന്നു. ഡൽഹി എക്സ്ഷോറൂം 9.9 ലക്ഷം രൂപയാണ് മഹീന്ദ്രയുടെ ഈ പുതിയ എംപിവിയുടെ വില. മറാസോയുടെ ഏറ്റവും ഉയർന്ന പതിപ്പിന് 13.90 ലക്ഷം രൂപയാണ് വില.

ഇന്ത്യയിൽ ടൊയോട്ട ഇന്നോവ ക്രിസ്റ്റ, മാരുതി എർടിഗ എന്നിവയാണ് മറാസോയ്ക്ക് പ്രധാന എതിരാളികളാവുക. സെഗ്മെന്‍റിൽ തന്നെ ആദ്യമെന്ന് പറയാവുന്ന ഫീച്ചറുകളുമായാണ് മരാസോയുടെ വരവ്. സ്രാവിന്‍റെ ആകാരം, സാവ്രിന്‍റെ പല്ലുകൾ പോലെ തോന്നിപ്പിക്കുന്ന മുൻഗ്രിൽ എന്നിവ മരാസോയുടെ മാത്രം സവിശേഷതയായി കമ്പനി വിശേഷിപ്പിക്കുന്നു. 'ഷാർക്ക് ടൂത്ത് ഗ്രിൽ' എന്നാണ് മഹീന്ദ്ര ഇതിനെ വിശേഷിപ്പിക്കുന്നത്.

വിടർന്ന ബമ്പറുകൾ, എൽഇഡി ഹെഡ് ലാമ്പുകൾ, ഡെ ടൈം റണ്ണിങ് ലാമ്പുകൾ, പുതിയ ഫോഗ് ലാമ്പുകൾ എന്നിവ ഫ്രണ്ട് എൻഡിലെ സവിശേഷതകളായി പറയാം. വീതിയേറിയ ഷാർക്ക് ടെയിൽ ലാമ്പാണ് പിൻവശത്തെ മുഖ്യാകർഷണം. റൂഫിനോട് ചേർന്നുള്ള സ്റ്റോപ് ലാമ്പ്, സ്പോർടി ബമ്പർ, 17 ഇഞ്ച് അലോയ് വീലുകൾ എന്നിവ മറ്റു പ്രധാന സവിശേഷതകളാണ്.

ഡ്യുവൽ ടോൺ നിറത്തിലാണ് അകത്തളം ഒരുങ്ങിയിരിക്കുന്നത്. ബ്ലാക്ക് നിറത്തിലുള്ള ഡാഷ്ബോർഡും ബീജ് നിറത്തിലുള്ള സീറ്റുകളും അകത്തളത്തിന് ഒരു പ്രീമിയം ലുക്ക് കൈവരുത്തുന്നു. സറൗണ്ട് കൂളിംഗ് സാങ്കേതികതയാണ് മരാസോയിൽ എടുത്തു പറയേണ്ടതായിട്ടുള്ള ഒരു സവിശേഷത. 7.0 ഇഞ്ച് ടച്ച്സ്ക്രീൻ സിസ്റ്റം, ഡ്യുവൽ പോഡ് ഇൻസ്ട്രമെന്‍റ് ക്ലസ്റ്റർ, 3 സ്പോക്ക് അലോയ് വീലുകൾ, ക്രൂയിസ് കൺട്രോൾ, ഓട്ടോമാറ്റിക് ക്ലൈമറ്റ് കൺട്രോൾ എന്നിവ മറ്റു സവിശേഷതകളാണ്.

ഡ്യുവൽ എയർബാഗുകൾ, ഡിസ്‌ക് ബ്രേക്ക്, എബിഎസ്, ISOFIX ചൈല്‍ഡ് മൗണ്ടുകള്‍, ഇംപാക്ട് സെന്‍സിറ്റീവ് ഡോര്‍ ലോക്കുകള്‍, പാർക്കിങ് സെൻസറുകൾ എന്നിവ സുരക്ഷ ഫീച്ചറുകളായി ഇടംനേടിയിട്ടുണ്ട്. ഷിമ്മറിംഗ് സില്‍വര്‍, മറീനര്‍ മറൂണ്‍, ഓഷ്യാനിക് ബ്ലാക്, അക്വാ മറീന്‍, ഐസ്ബര്‍ഗ് വൈറ്റ്, പൊസീഡണ്‍ പര്‍പ്പിള്‍ എന്നീ നിറങ്ങളിലാണ് മരാസോ ലഭ്യമാവുക. ഏഴു സീറ്റര്‍, എട്ടു സീറ്റര്‍ പതിപ്പുകളിൽ എത്തിയിരിക്കുന്ന മറാസോയില്‍ M2, M4, M6, M8 എന്നിങ്ങനെ നാലു വകഭേദങ്ങൾ ലഭ്യമാകും.

മഹീന്ദ്ര പുതുതായി വകസിപ്പിച്ച 1.5 ലിറ്റർ 4 സിലിണ്ടർ ഡീസൽ എൻജിനാണ് മരാസോയുടെ പ്രധാന ഹൈലേറ്റ്. 120 ബിഎച്ച്പിയും 300 എൻഎം ടോർക്കുമാണ് ഈ എൻജിൻ ഉല്പാദിപ്പിക്കുന്നത്. 6 സ്പീഡ് ആണ് ഗിയർബോക്സ്. ലിറ്ററിന് 17.6 കിലോമീറ്റർ മൈലാജാണ് മരാസോ വാഗ്ദാനം ചെയ്യുന്നത്. ഉടൻ തന്നെ മരാസോയുടെ പെട്രോൾ പതിപ്പിനെയും വിപണിയിൽ എത്തിക്കുമെന്നാണ് കമ്പനി അറിയിച്ചിരിക്കുന്നത്.