മഹീന്ദ്രയുടെ U321 എംപിവിയുടെ പേരിടൽ ഈ മാസം 31ന്

ഇന്നോവ ക്രിസ്റ്റയ്ക്ക് എതിരാളിയായി U321 എന്ന കോഡ് നാമത്തിൽ മഹീന്ദ്രയുടെ പുതിയ എംപിവി വിപണിയിൽ എത്തുന്നു. സെപ്തംബറിൽ അവതരിക്കുന്ന ഈ എംപിവിക്ക് ഈ മാസം 31 ന് പേരിടുമെന്നാണ് മഹീന്ദ്ര അറിയിച്ചിരിക്കുന്നത്. ഉത്സവക്കാലത്തെ വിൽപ്പന ലക്ഷ്യം വെച്ചാണ് മഹീന്ദ്ര പുതിയ എംപിവിയെ നിരത്തിലെത്തിക്കുന്നത്. മഹീന്ദ്രയുടെ മറ്റു വാഹനങ്ങളെപ്പോലെ ഇംഗ്ലീഷ് അക്ഷരം 'ഒ' യിൽ അവസാനിക്കുന്ന പേരുതന്നെയായിരിക്കും പുതിയ എംപിവിക്കും ലഭിക്കുക.

മോണോകോക്ക് പ്ലാറ്റ്ഫോമിലാണ് മഹീന്ദ്ര ഈ വാഹനത്തിന്‍റെ നിർമാണം നടത്തിയിരിക്കുന്നത്. നീളമേറിയ ക്രോമിയം ഗ്രിൽ, പ്രോജക്ടർ ഹെഡ് ലാമ്പ്, സ്പോർടി അലോയ് വീലുകൾ എന്നിവയാണ് ഈ എംപിവിയുടെ പ്രധാന എക്സ്റ്റീരിയർ ഫീച്ചറുകൾ. ബ്ലാക്ക് ഫിനിഷിങ് ആണ് അകത്തളത്തിന് നൽകിയിരിക്കുന്നത്. ടച്ച് സ്ക്രീൻ സിസ്റ്റം പ്രധാന ഫീച്ചറായി ഒരുങ്ങുന്നതായിരിക്കും.

1.6 ലിറ്റർ പെട്രോൾ, ഡീസൽ എൻജിനുകളിലായിരിക്കും പുതിയ മഹീന്ദ്ര എംപിവി എത്തുക. 6 സ്പീഡ് ഓട്ടോമാറ്റിക്, മാനുവൽ ഗിയർബോക്സുകൾ ഇടംപിടിക്കും. ടൊയോട്ട ഇന്നോവ ക്രിസ്റ്റ, ടാറ്റാ ഹെക്‌സ, റെനൊ ലോഡ്ജി എന്നിവയാണ് പ്രധാന എതിരാളികൾ.