നിർമ്മാണം രണ്ട് കോടി തികച്ച് മാരുതി സുസൂക്കി

ഇന്ത്യയിലെ മുൻനിര കാർ നിർമ്മാതാക്കളായ മാരുതി സുസൂക്കി ഇപ്പോൾ നേട്ടങ്ങളുടെ പരകോടിയിലാണ്. ഇതുവരെയായി നിരത്തിലെത്തിച്ച വാഹനങ്ങളുടെ എണ്ണം രണ്ട് കോടി കവിഞ്ഞെന്ന് പ്രഖ്യാപിച്ചിരിക്കുകയാണ് മാരുതി. ഡിസയർ, സ്വിഫ്റ്റ്, വിറ്റാര ബ്രെസ, ഓൾട്ടോ, വാഗൺ ആർ എന്നീ വാഹനങ്ങൾ ഉല്പാദിപ്പിച്ച ഗുരുഗ്രാമിലെ നിർമാണശാലയിൽ നിന്നും ഓറഞ്ച്-വൈറ്റ് ഡ്യുവൽ ടോൺ നിറത്തിലുള്ള വിറ്റാര ബ്രെസയുടെ നിർമാണം പൂർത്തിയാക്കി പുറത്തിറങ്ങിയപ്പോഴാണ് രണ്ട് കോടി എന്ന നാഴികകല്ല് മാരുതിക്ക് സ്വന്തമായത്.

ഇതുവരെയായി വിറ്റാരയുടെ മൂന്ന് ലക്ഷം യൂണിറ്റുകളാണ് മാരുതി വിറ്റഴിച്ചത്. അതുപോലെ കഴിഞ്ഞ വർഷം പുറത്തിറങ്ങിയ സ്വിഫ്റ്റും മാരുതിയുടെ ഐശ്വര്യമാണെന്ന് പറയണം. നിരത്തിലെത്തി അഞ്ച് മാസത്തിനുള്ളിൽ 10 ലക്ഷം യൂണിറ്റുകളാണ് വിറ്റഴിച്ചത്. മുപ്പത്തിയഞ്ചിന്‍റെ നിറവിലാണ് മാരുതി ഇപ്പോൾ. 1983ൽ മാരുതി 800 എസ്എസ് 80നെ നിരത്തിലിറക്കി കൊണ്ടാണ് മാരുതി ഇന്ത്യയിലെ ജൈത്രയാരംഭിച്ചത്.

2001 ആയപ്പോഴേക്കും ഏതാണ്ട് 50 ലക്ഷം കാറുകളെ മാരുതി നിരത്തിലെത്തിച്ചു. 2011 ആയപ്പോഴേക്കും മാരുതിയുടെ വളർച്ച പതിന്മടങ്ങായി വർധിച്ചു. പ്രതിവർഷം 15 ലക്ഷം കാറുകളെ വിപണിയിലെത്തിക്കുന്ന നിലയിലേക്കായിരുന്നു മാരുതിയുടെ പിന്നീടുള്ള വളർച്ച. 2017-18 കാലയളവിൽ ഏതാണ്ട് 1.77 മില്യൺ കാറുകളെ മാരുതി ഉല്പാദിപ്പിച്ചു. ഡിസയർ, സ്വിഫ്റ്റ്, ബലെനോ, വിറ്റാര ബ്രെസ എന്നീ കാറുകളുടെ വിൽപ്പനയാണ് മാരുതിക്ക് ഇന്ന് ഈ നേട്ടം കൈവരിക്കാൻ കഴിഞ്ഞത്.

മൂന്ന് പതിറ്റാണ്ടുകളായി ജനങ്ങൾക്കൊപ്പം നിന്ന മാരുതിക്ക് ജനങ്ങൾ തന്ന അംഗീകാരമാണ് ഇതെന്നാണ് കമ്പനി അവകാശപ്പെടുന്നത്. ജനങ്ങൾ മാരുതിയിൽ അർപ്പിച്ച വിശ്വാസമാണ് ഈ നേട്ടമെന്നും കമ്പനി അധികൃതർ അവകാശപ്പെട്ടു.