സ്വിഫ്റ്റിന്‍റെ z പ്ലസ് വേരിയന്‍റുകളിൽ എഎംടി ലഭ്യമാക്കി മാരുതി

സ്വിഫ്റ്റിന്‍റെ ഉയർന്ന വകഭേദങ്ങൾക്കും ഓട്ടോമാറ്റിക് ഓപ്ഷൻ ലഭ്യമാക്കി മാരുതി. സ്വിഫ്റ്റിന്‍റെ ZXI പ്ലസ്, ZDI പ്ലസ് വകഭേദങ്ങളിലാണ് മാരുതി എഎംടി ഒരുക്കിയിരിക്കുന്നത്. 7.76 ലക്ഷം രൂപയാണ് പുതിയ സ്വിഫ്റ്റ് ZXI പ്ലസ് എഎംടിയുടെ വില. സ്വിഫ്റ്റ് ZDI പ്ലസ് എഎംടിക്ക് 8.76 ലക്ഷം രൂപയാണ് വില. ഓട്ടോ ഗിയർഷിഫ്റ്റ് എന്നാണ് മാരുതി ഈ എഎംടി സംവിധാനത്തെ വിശേഷിപ്പിച്ചിരിക്കുന്നത്.

ഓട്ടോമാറ്റിക് ഹെഡ്‌ലാമ്പുകള്‍, എല്‍ഇഡി പ്രൊജക്ടര്‍ ഹെഡ്‌ലാമ്പുകള്‍, എല്‍ഇഡി ഡെ ടൈം റണ്ണിങ് ലാമ്പുകൾ, ഇരട്ട നിറമുള്ള അലോയ് വീലുകൾ, ടച്ച്സ്ക്രീൻ സിസ്റ്റം എന്നിവ ZXI പ്ലസ്, ZDI പ്ലസ് മോഡലുകളുടെ പ്രധാന സവിശേഷതകളിൽപ്പെടും.

1.2 ലിറ്റർ പെട്രോൾ, 1.3 ലിറ്റർ ഡീസൽ എൻജിനുകളാണ് ഈ വകഭേദങ്ങൾക്ക് കരുത്തേകുന്നത്. 83 ബിഎച്ച്പിയും 113 എൻഎം ടോർക്കുമാണ് പെട്രോൾഎൻജിൻ സൃഷ്ടിക്കുന്നത്. അതേസമയം 74 ബിഎച്ച്പിയും 190എൻഎം ടോർക്കുമാണ് ഡീസൽ എൻജിനുല്പാദിപ്പിക്കുന്നത്. 5 സ്പീഡ് മാനുവൽ, 5 സ്പീഡ് ഓട്ടോമാറ്റിക് ഗിയർബോക്സ് ഓപ്ഷനുകളും ലഭ്യമാക്കിയിട്ടുണ്ട്.