മാരുതിയുടെ സ്വിഫ്റ്റ് ആർഎസ് ഇന്ത്യയിലേക്ക്

സ്വിഫ്റ്റിന് ആർഎസ് പതിപ്പുമായി മാരുതി ഇന്ത്യയിലേക്ക്. നേരത്തെ സ്വിഫ്റ്റ് സ്പോർടി പതിപ്പ് ഇന്ത്യയിൽ എത്തുമെന്നായിരുന്നു മാരുതി അറിയിച്ചിരുന്നത്. എന്നാൽ സ്പോർടി പതിപ്പിന്‍റെ ഉയർന്ന വില സാധാരണക്കാർക്ക് താങ്ങാനാകില്ലെന്ന മനസിലാക്കിയാണ് മാരുതി ആർഎസ് പതിപ്പുമായി എത്തുന്നത്. ബലെനോ ആർഎസ് ഇന്ത്യയിൽ വൻ ഹിറ്റായിരുന്നു. അതെ പിന്തുണ സ്വിഫ്റ്റ് ആർഎസിനും ലഭിക്കുമെന്ന പ്രതീക്ഷയിലാണ് മാരുതി.

ബലെനോ ആർഎസിലുള്ള അതെ 1.0 ലിറ്റർ ബൂസ്റ്റർജെറ്റ് പെട്രോൾ എൻജിനായിരിക്കും സ്വിഫ്ററ് ആർഎസിനും കരുത്തേകുക. 101 ബിഎച്ച്പിയും 150എൻഎം ടോർക്കുമാണ് ഈ എൻജിൻ ഉല്പാദിപ്പിക്കുന്നത്. 5 സ്പീഡ് മാനുവൽ ഗിയർബോക്സായിരിക്കും എൻജിനിൽ ഇടംതേടുക. കരുത്തുറ്റ എൻജിന് പുറമെ സ്പോർടി ലുക്കും സ്വിഫ്റ്റ് ആർഎസ് കൈവരിക്കും.

വീതിയേറിയ ബമ്പർ, സൈഡ് സ്കേർട്ടുകൾ, റൂഫ് സ്പോയിലർ, പുത്തൻ ഗ്രാഫിക്സ് എന്നിവയോടു കൂടിയായിരിക്കും സ്വിഫ്റ്റ് ആർഎസ് വിപണിയിലെത്തുക. ബലെനോ ആർഎസിനേക്കാളും കുറഞ്ഞ വിലയ്ക്കായിരിക്കും സ്വിഫ്റ്റ് ആർഎസ് എത്തുക. ഡൽഹി എക്സ്ഷോറൂം 7.31 ലക്ഷം രൂപയാണ് സ്വിഫ്റ്റിന്‍റെ വില. സ്വിഫ്റ്റ് ആർഎസിന് 7.80 മുതൽ 8 ലക്ഷം വരെ വില പ്രതീക്ഷിക്കാം.