പുതിയ സ്വിഫ്റ്റ്, ഡിസയർ മോഡലുകളെ തിരിച്ചുവിളിച്ച് മാരുതി

ഇന്ത്യയിലെ മുൻനിര കാർ നിർമ്മാതാക്കളായ മാരുതി സുസൂക്കി പുതിയ സ്വിഫ്റ്റ്, ഡിസയർ മോഡലുകളെ തിരിച്ചുവിളിക്കുന്നു. എയർബാഗിലുള്ള തകരാർ കണ്ടെത്തിയതിനെ തുടർന്ന് 1,279 യൂണിറ്റുകളെയാണ് തിരിച്ചുവിളിക്കുന്നത്. എയര്‍ബാഗുകളുടെ വിന്യാസം മൂലം ഇതുവരെ ആർക്കും പരുക്കേറ്റതായി റിപ്പോര്‍ട്ട് ചെയ്യപ്പെട്ടിട്ടില്ല. എന്നിരുന്നാലും യാത്രക്കാരുടെ സുരക്ഷ കണക്കിലെടുത്ത് എയർബാഗുകൾ മാറ്റിനൽകാനുള്ള തീരുമാനം കൈകൊണ്ടിരിക്കുകയാണ് കമ്പനി.

നിലവിൽ 566 പുതിയ സ്വിഫ്റ്റ് ഹാച്ച്ബാക്കും 713 ഓളം ഡിസയറുകളെയുമാണ് മാരുതി തിരിച്ചുവിളിച്ചിരിക്കുന്നത്. 2018 മെയ് 7നും ജൂലായ് 5നുമിടയിൽ ഉല്പാദിപ്പിച്ചിട്ടുള്ള കാറുകളാണ് തിരിച്ചുവിളിക്കലിൽ ഉൾപ്പെട്ടിരിക്കുന്നത്. തിരിച്ചുവിളിക്കലിൽ ഉൾപ്പെട്ടിട്ടുള്ള കാർ ഉടമകൾ മാരുതി ഡീലർഷിപ്പുമായി ബന്ധപ്പെടണമെന്ന് കമ്പനി അറിയിച്ചിട്ടുണ്ട്. തകരാറു സംഭവിച്ച എയർബാഗുകൾ സൗജന്യമായി തന്നെ മാറ്റി നൽകുമെന്നും കമ്പനി ഉറപ്പുവരുത്തിയിട്ടുണ്ട്.

മാരുതി സുസൂക്കിയുടെ ഔദ്യോഗിക വെബ്സൈറ്റിൽ 14 അക്ക ചാസിസ് നമ്പർ നൽകിയാൽ നിങ്ങളുടെ കാറും ഈ തിരിച്ചുവിളിക്കലിൽ ഉൾപ്പെട്ടിട്ടുണ്ടോ എന്ന് പരിശോധിക്കാം. കൂടാതെ അടുത്തുള്ള മാരുതി ഡീലർഷിപ്പിൽ നേരിട്ട് ചെന്നും അന്വേഷിക്കാവുന്നതാണ്.