ആദ്യ ഇലക്ട്രിക് എസ്‍യുവിയെ അവതരിപ്പിക്കാൻ ഒരുങ്ങി മാരുതി

ഇന്ത്യയിലെ മുൻനിര കാർ നിർമ്മാതാക്കളായ മാരുതി തങ്ങളുടെ ആദ്യ ഇലക്ട്രിക് കാറിനെ അവതരിപ്പിക്കാൻ ഒരുങ്ങുന്നു. ഫെബ്രുവരിയിൽ നടക്കുന്ന ഓട്ടോ എക്സ്പോയിലായിരിക്കും 'ഇ സർവേയർ' എന്ന കൺസ്പെറ്റിനെ അവതരിപ്പിക്കുക. കഴിഞ്ഞ വർഷം നടന്ന ടൊക്കിയോ മോട്ടോർ ഷോയിലായിരുന്നു മാരുതി ആദ്യമായി ഈ കൺസ്പെറ്റിനെ അവതരിപ്പിച്ചത്. അന്ന് മോട്ടോർഷോയിലെ ഏവരുടെയും ശ്രദ്ധയാകർഷിച്ച കൺസ്പെറ്റായിരുന്നു ഇ സർവേയർ.

ഇപ്പോഴിതാ ആ കൺസ്പെറ്റ് മോഡൽ ഇന്ത്യയിലും അരങ്ങേറുകയാണ്. ഓൾവീൽ ഡ്രൈവ് ഇലക്ട്രിക് എസ്‍യുവി ആയിരിക്കും ഇത്. മസിലൻ രൂപവും ഉയർന്ന ഗ്രൗണ്ട്ക്ലിയറൻസും വലിയ ടയറുകളുമാണ് ഈ എസ്‍യുവിയുടെ മുഖ്യാകർഷണം. ലാഡർ ഫ്രെയിം ഷാസിയിൽ നിർമാണം നടത്തുന്ന ഈ വാഹനത്തിന്‍റെ നാലു ചക്രങ്ങളിലേക്കും പ്രത്യേക ഇലകട്രിക് മോട്ടോറുകളാണ് കരുത്തേകുന്നത്.

മെക്കാനിക്കൽ സംബന്ധിച്ച കൂടുതൽ വിവരങ്ങളൊന്നും കമ്പനി പുറത്തുവിട്ടിട്ടില്ല. 2020 ഓടെ ഇ സർവേയറിന്‍റെ പ്രൊഡക്ഷൻ മോഡലുകളെ വിപണിയിലെത്തിക്കുമെന്നാണ് കമ്പനി അറിയിച്ചിരിക്കുന്നത്. വിപണിയിലവതരിച്ചു കഴിഞ്ഞാൽ മാരുതിയുടെ ആദ്യ ഇലക്ട്രിക് വാഹനമായിരിക്കുമിത്. ഇ സർവേയർ കൺസ്പെറ്റിനെ കൂടാതെ എക്സ്പോയിൽ സ്വിഫ്റ്റ്, ജിംനി, സിയാസ് എന്നീ വാഹനങ്ങളെയും മാരുതി അവതരിപ്പിക്കുന്നതായിരിക്കും.