കാറുകളുടെ വില വർധിപ്പിച്ച് മാരുതിയും

ഇന്ത്യയിലെ മുൻനിര വാഹന നിർമാതാക്കളായ മാരുതിയും കാറുകളുടെ വില വർധിപ്പിക്കുമെന്ന് പ്രഖ്യാപിച്ചു. ജനുവരി മുതൽ വിലയിൽ രണ്ട് ശതമാനം വർധനവുണ്ടാകുമെന്നാണ് മാരുതി അറിയിച്ചിരിക്കുന്നത്. ഉല്പാദന ചെലവ് ക്രമാധീതമായി വർധിച്ചതാണ് വില വർധിപ്പിക്കാനുള്ള കാരണമായി മാരുതിയും ചൂണ്ടികാണിക്കുന്നത്.

2.45 ലക്ഷം രൂപയുടെ ഓൾട്ടോ 800 മുതൽ 11.29ലക്ഷം രൂപ വിലയുള്ള എസ്-ക്രോസ് ക്രോസോവർ മോഡലുകളെയാണ് മാരുതി ഇന്ത്യയിൽ അണിനിരത്തിയിട്ടുള്ളത്. വിവിധ മോഡലുകളുടെ അടിസ്ഥാനത്തിൽ വിലയിലും വ്യത്യാസമുണ്ടായിരിക്കുമെന്നും കമ്പനി വ്യക്തമാക്കി. കഴിഞ്ഞ ദിവസങ്ങളിൽ ടാറ്റ മോട്ടേഴ്സ്, ഫോർഡ്, ടൊയോട്ട, ഹോണ്ട, സ്കോഡ, ഇസുസു തുടങ്ങിയ വാഹനനിർമാതാക്കളും വില വർധനവ് പ്രഖ്യാപിച്ച് രംഗത്തെത്തിയിരുന്നു.