തരംഗമാകാൻ ക്ലീവ്‌ലാന്‍ഡ് ബൈക്കുകൾ ഇന്ത്യയിൽ അവതരിച്ചു

അമേരിക്കന്‍ മോട്ടോര്‍സൈക്കിള്‍ നിർമാതാവായ ക്ലീവ്‌ലാന്‍ഡ് സൈക്കിള്‍വര്‍ക്ക്‌സ് പുതിയ എയ്‌സ് ഡീലക്‌സ്, മിസ്ഫിറ്റ് മോഡലുകളെ ഇന്ത്യയിൽ അവതരിപ്പിച്ചു. തുടക്കത്തിൽ എയ്‌സ് ഡീലക്‌സിനെയാണ് കമ്പനി വിപണിയിൽ എത്തിച്ചത്. അടുത്ത മാസമാണ് മിസ്ഫിറ്റ് പുറത്തിറങ്ങുക. 2.24 ലക്ഷം രൂപയാണ് എയ്‌സ് ഡീലക്‌സിന്‍റെ വില. മിസ്ഫിറ്റിന് 2.49 ലക്ഷം രൂപയുമാണ് വില.

റെട്രോ സ്‌റ്റൈല്‍ നേക്കഡ് ബൈക്കാണ് എയ്‌സ് ഡീലക്‌സ്. മുന്നില്‍ അപ്പ്‌സൈഡ് ഡൗണ്‍ ഫോര്‍ക്കും പിന്നില്‍ ഡ്യുവല്‍ഷോക്ക് അബ്‌സോർബറുമാണ് എയ്‌സ് ഡീലക്‌സിന് സസ്പെൻഷൻ ഒരുക്കുന്നത്. മുന്നില്‍ 298 എംഎം ഡിസ്‌ക്ക് ബ്രേക്കും പിന്നില്‍ 210 എംഎം ഡിസ്‌ക്ക് ബ്രേക്കും ബ്രേക്കിങ് ചുമതല നിർവഹിക്കും.

229 സിസി സിങ്കിൾ സിലിണ്ടര്‍ എയര്‍ കൂള്‍ഡ് എന്‍ജിനാണ് എയ്‌സ് ഡീലക്‌സിന്‍റെ കരുത്ത്. 15.4 ബിഎച്ച്പിയും 16 എന്‍എം ടോര്‍ക്കുമാണ് ഈ എൻജിൻ ഉല്പാദിപ്പിക്കുന്നത്. 5 സ്പീഡാണ് ഗിയര്‍ബോക്‌സ്. 133 കിലോഗ്രാമാണ് ഭാരം. 30 കിലോമീറ്റര്‍ ഇന്ധനക്ഷമതയും ഈ ബൈക്ക് ഉറപ്പുവരുത്തുന്നു.